.يا اختي البيت دا حق واحد اسمو سالم و قال نقعد فيهو لحدي ما يرجع من السفر ........السفر ؟؟؟ سافر وين هو ........سافر بلاد برة ......فدوى مشت وهي بتبكي من القهر و قررت تمشي لي اهلو في بيتهم رغم انو امها و ابوها كانو رافضين تماما الفكرة قالو ليها دي إهانة بالنسبة ليك .......بس اصرت تمشي ......فعلا مشت ليهم رحبو بيها عادي جدا كانو ما حاصل شي و امو قالت ليها .......والله يا بتي ولدي دا ما عرفت الجاهو شنو فجأة كدا اتغير من الناس كلهم ما تزعلي منو برجع أن شاء الله ........يا خالتي انا ما زعلانة منو بس جيت عايزة اقول ليكم انو انا حامل .......امو وقفت على حيلها .......خشششمك فيهو اللبن يابتي عليك الله .......اي والله يا خالتي .......المرأة قلدتها و باركت ليها و كلمت باقي البيت و كلهم جو باركو .......اخوهو قال ليها إلا نضبح بالمناسبة دي و فدوى خجلت وقالت ليهم لما يجي سالم ......
.رجعت البيت و قالت لي امها انا عملت العلي الباقي على الله .......رجعو البلد و اصرو يرجعو فدوى معاهم بس رفضت و قالت ليهم عايزة اشغل نفسي بالشغل هنا .......امها قالت ليها ما تتعبي نفسك شديد و قالت ليها مجرد ما تخشي في التامن تجي على طول ........فدوى رجعت شغلها عادي و كمان اهلها رجعو البلد .......قعدو ليهم كم اسبوع كدا و جاهم امجد اتقدم لي فاتن و قال مستعجل .......فاتن ما صدقت و بقت تجيه في روحها و امها حست خلاص دا فرج ربنا علي بنتها ، و فاتن جهزت حالها و كلمو فدوي و باركت بس فدوى كانت بائسة لانها في الشهور الأولى الصعبة كلها طمام و نفسيات و كسل ........سالم اهلو اتصلو بيهو في التلفون الاداهم ليهم يتصلو بيهو و كلموهو بالحاصل كلو .......اتبسط جدا و فرح بس لسة كان عندو حاجات مضايقاهو من فدوى حاجات مهينة ما بتتنسي .......
بعدها بي فترة فاتن اتزوجت امجد و مشت معاهو هي وولدها (عمر) الخرطوم و استقرت هناك و فدوى كمان قاعدة هناك بس مع اقاربهم ........حليمة اقنعت زوجها انو يجو يستقرو في الخرطوم لانو في البلد ما عندهم زول.......و قالت ليهو بتي عايزة تلد احسن ليها الخرطوم .......فعلا اقتنع و باع بيتو و اراضيهو الزارعية و أشتري ليهو بيت كويس شديد و ناصية و فتح فيهو دكان .......فدوى استقرت مع امها و ابوها ........و فاتن مع زوجها وولدها ........بعد اول شهرين فاتن عرفت انو امجد ساب تهاني حبيبتو القديمة عشان ابت تصبر معاهو و اتزوجت و ولدت كمان .......فاتن عاشت مع امجد اجمل و اسعد الايام .......حست نفسها ياداب اتزوجت ........و كمان حبت امجد جدا و بقت عايشة دور جوليت و امجد روميو .......انشغلت بي نفسها عن الناس و بقت في حالها شوية الفترة ديك ......بس للاسف ما حملت و امجد كان مقلق شديد و خايف يكون العيب فيهو و هي ما هاميها لانو عندها بي ولدها ........
و في يوم فدوى كانت قاعدة في المعمل و بطنها بقت تكيلة و على وش ولادة بس مصرة تشغل نفسها بالشغل ما عايزة تفكر في حاجات تزعلها وهي حامل ........فدوى ازيك .......فدوى طوالي عرفت الصوت و اتلفتت سريع لقتو زي ما اتوقعتو سالم زوجها .......ما حست بي نفسها إلا و هي حاضناهو و بتسلم عليهو و تبكي ........سالم برضو دمع بس ما اظهر ليها .......كيفك كويسة ........كويسة بي شوفتك يا سالم انت كيفك ........انا الحمد لله بخير ........ليه يا سالم عملت كدا انا عملت ليك شنو عشان تعمل فيني كدا ........دا ما وقتو يا فدوى بحكي ليك كل شئ بس ما اسي ........لالا انا عايزة اعرف اسي دي ......خلاص يلا نطلع من هنا .......فدوى سريع لملمت حاجاتها و طلعت يدها ما فكت يدو ........سالم ضعيف قدامها و نفسو يرجعو زي اول بس ما قادر ينسى الحصل منها ........مشو قعدو ليهم في كافتريا و طلبو عصير ........سالم بقى بس بعاين لي فدوى و ما قادر يبعد عينو منها و فدوى متكبكبة و خجلانة من الحصل بس مبسوطة بي جيتو ........حرام عليك يا سالم ليه بتعمل معاي كدا ........انتي يا فدوى ليه عملتي فيني كدا .......انا عملت شنو ؟ انت حتى ما وريتني الاسباب الخلتك تطلقني و الله كنت مصدومة لانو لاخر لحظة كنا مبسوطين ........ما عارفة نفسك يعني عملتي شنو ؟ .......والله ما عارفة اعرف كيف انا كنت فاكراك زعلت من كلام فاتن لما قالت اتاخرنا في الولادة او كذا مع اني اتداركت الموقف و سكتها في لحظتها و انت ما زعلت تاني الجد شنو ........سسالم اتضايق منها و اتذكر كلام فاتن ضرب التربيزة قال ليها في انك انتي الخربتي بيتك بي يدك يا فدوى
يتبع.....
