..فاتن بقت تبكي و قلبها مقطوووع من الصدمة معقول يا دكتور مافي علاج ........احسن نشيلو لي مصلحتك و دا انا شايف انو اسلم حل .........فاتن بس عاينت لي امجد و بقت تبكي .........امجد هداها و قال ليها كلو لي خير و انا ما حاسيبك .......فعلا فاتن كلمت اهلها و دخلت العملية .........بعد العملية جوها ناس امها و فدوى و ابوها و امجد و بقو يحمدو ليها السلامة ..........فدوى جات مدت ليها يدها فاتن ابت تمد يدها قالت ليها .........كلو منك يا حاقدة حسدتيني على الجنا العندي و ما كان عندك ........فدوى بقت تبكي و قالت ليهم عن اذنكم انا تعبانة شوية بمشي البيت .......امها قالت ليها ما تقولي كدا يابت حسدتك كيف يعني اسي انتي في شنو ........امجد استغرب كلام فاتن و حس انها جرحت اختها و أحرجتنا قدامهم .........امها قعدت معاها اسبوعين تساعدها في البيت بعد العملية و فدوى كانت يا الله تشتغل في البيت و تاكل ابوها ........
بعدها امها رجعت بعد كم يوم ..........فدوى صحت امها تلاتة صباحا قالت ليها انا عندي وجع نادي لي الداية ........هوي يابت داية شنو ، دي ما البلد نمشي المستشفى عديل و انتي عندك توم اضمن ليك المستشفى .........ابوهم مشى سريع لي جارهم عندو عربية صحاهو من النوم .......ساقوها المستشفى تعبت شوية بس ولدت طبيعي .......و رجعت البيت بعد ساعتين من الولادة و اهلهم و اقاربهم ألفي الخرطوم لما سمعو بالخبر جو جارين جري خاصة اهل سالم و امو .......
حليمة جات لي فاتن في البيت قالت ليها فدوى اختك ولدت تعالى حمدي ليها السلامة .......حمدلله على سلامتها يا امي وصلي ليها لكن انا مستحيل امشي ليها .......ما عايزة تباركي لي اختك جابت توأم ........فاتن اتخلعت و نفسها قام من الغيظ ......توأم ؟ معقول راجلها العقيم دا جاب توأم اجي يا اخواني من وين ........يا بت من وين كيف يعني .......بالمنطق يا امي راجلها عقيم و انتي فاهمة كيف فدوى تحمل اساسا و كمان تجيب توأم ........راجلها اتعالج زمان و بعدين كان بتناول منشطات دي الخلتها تحمل بي توأم الدكتور قال كدا .......عشنا و شفنا .......امها طلعت منها قالت ليها لو ما جيتي حمدتي ليها السلامة ما عافية ليك يا فاتن ........فاتن قالت ليها بجي خلاص بجي في السماية ........
سالم لما اهلو كلموهو انو فدوى ولدت و جابت ولدين توأم ما صدق روحو جا جاري جري و بقى واقف في حاجاتها و بقي يجهز للسماية و سماهم حسن و حسين ( تيمنا بي حسن و حسين احفاد رسول الله صلى الله عليه وسلم ). .......اصلو ما فارقهم لحدي يوم السماية جاب خرفانو و ضبحهم و عملو سماية حلوة و عزم البعيد و القريب ، و فدوى مبسوطة من وقفة سالم دي و كل مرة بقول لي حليمة جيبيهم لي اسلم عليهم .......بتجيبهم ليهو .......
سالم اتعلق بي اولادو جدا و حس انو ما بقدر يبعد عن اولادو و امهم و قرر يعقد عليها من اول و جديد ........فاتن جات اخر زول بعد الناس بدات تلملم في عدة الفطور .......سالم شافها من بعيد و اتحرق عليها .......عاينت ليهو بي قعر عينها و ابتسمت مشت عليهو ........اهلا يا سالم عاش من شافك .......بي برووود ، تمام الحمد لله.......طبعا كنت عايزة اقول ليك حاجة كدا ......سالم بطنو طمت و عرف الشر طالع من عيونها و عايزة تخرب عليهو فرحتو ......طبعا انا و انت عارفين انك ما بتجيب اولاد اجي ؟ توأم كمان من وين دا كلو .......سالم اتصدم من كلامها عن اختها و تلميحاتها و بدون ما يشعر قشطها كف لمن قربت تقع .........فاتن بدأت تهرج فيهو و الناس لمو .......انت منو عشان تضربني قايلني ما عندي راجل و الله اكلمو ليك ما يخلي فيك عضم سليم يا عواليق انا زاتي ما عارفة فدوى عرستك كيف ، ما راجل الناس كلها عارفة انك ما راجل ، عايز تتمرجل على مراة زي .......ابوها جا كورك ليها .......فااااتن ؟ ........ابوي تخيل بس وقاحتو مد يدو علي ........ابوها اداها كف تاني قال ليها دا شنو الكلام الفارغ البتقولي فيهو دا ما بتختشي انتي فضحتينا الله يفضحك .......لزاها دخلها جوة الغرفة احسن ليك تسكتي و تقعدي بي ادب عشان ما اربيك بالعكاز دا من اول .......سالم أتأكد تماما انو كان غبي جدا لما سمع كلامها في المرة الأولى ، اتاكد انها قالت ليهو كلامها داك مخصوص عشان تخرب على اختها ، بس ليييه السبب شنو ما معروف ........مالك يا سالم الحصل شنو لي الفضائح دي كلها و كيف اساسا تتجرأ و تمد يدك عليها في راجل بمد يدو على مراة .....ّ.يا عمي الزين انت ما فاهم الحصل انا بي سببها طلقت فدوى المرة الفاتت .......كيف الكلام دا .......سالم بدأ يحكي ليهو بالتفاصيل و عن كلامها الاخير بس ما ذكر ليهو نقطة (المشكلة تبعو) .......لا حول ولا قوة إلا بالله العلي العظيم انا الظاهر ما عرفت اربي والله ما ربيتها بت الكلب لكن ما فات شئ بربيها من جديد .......اسي يا عمي انا عايز اعقد على فدوى من اول و جديد و كفاية الحصل .......جدا يا ولدي مافي مشكلة نسالها و نعمل ليكم عقد بعد تتم الاربعين بإذن الله ........
فاتن يا بت الكلب انا الظاهر ما ربتيك يا عواليق ........في شنو يا ابوي الحصل شنو .......وقع فيها بالعصاية .......حليمة حجزتهم و فدوى جوة ما قادرة تقوم من مكانها كانت متالمة جدا .......و اولادها واحد نايم و التاني صاحي .......فاتن جرت بيتها و هي تبكي و تتوعد لي اختها ما حتسيبها في حالها مهما حصل لازم توريها النجوم عز الضهر
يتبع....
