مجرد ما وصلت البرندة مرقت التوب و دخلت المطبخ بس هنا سامى اتصدم و خاف و حس انو الموضوع فيهو انه اكيد ......ختت الغدا في الصحانة و جات قعدت قالت ليهو اتفضل معليش انا باكل معاك عادي لاني ما اتغديت .......سامي بدا يغالط في روحو اكيد ما قاصدة حاجة اكيد دا كلو بي حسن نية اكيد المراة دي طيبة لي درجة بعيدة او بريئة او تكون بالجد بتغري فيني .......بقت تتدلع و خلفت رجلها و تتونس عادي و القميص اللابساهو قصير و سامي بقى ما قادر يعاين باتجاها و فهم كل حركات الإغراء بس جان في لحظتها زي الشافع البتعرض للتحرش ما قادر يتصرف ........ما حصل اتعرض لي موقف زي دا و هو شخصية محترمة بدا يلعن الشيطان و يستغفر .......سامي ما قدر ياكل كتير و عايز يخلص سريع عشان المراة دي تتخارج و ما تجيب ليهو بلوة. .......
.مشى قعد في الحوش قال عشان يديها فرصة تمشي بس دخلت المطبخ بقت تغسل في عدتها و عملت شاى .......جابت الشاي لي سامي في الحوش و سامي هنا قنع و قال المراة دي الطريقة التفكني منها الليلة شنو ........طوالي وقف على حيلو قال ليها شكرا ليك ما قصرتي انا عندي مشوار طالع لو خلصتي عشان اطلع مستعجل عندي ناس مواعدهم ........فاتن اتخلعت و قالت ليهو كويس ماف مشكلة و رجعت لبست توبها و شالت عدتها و طلعت .......سامي قفل الباب وراها و ما طلع ........زحل فعلا كلامها صاح المراة دي لصقة ياخ ......
ما .بدري .......بدري من عمرك يا حبيبي .......مالك قعدتي معاهم قدر دا الناس ديل قالو عرسان يعني ما كل شوية تنطي ليهم ........جلال انت عايز معاي مشاكل ولا شنو مش كفاية معرس فيني مراة و لاصق معاها و انا ماشغال بي .......هي دقيقة اولا انا معرسك انتي فيها ما معرسها فيك و بعدين اعمل ليك شنو اكتر من كل يومين معاك ......بس انا طول ما انت معرس واحدة انا ما بكون مرتاحة ما عايزة زول يشاركني في حاجة ياخ ........فاتن الموضوع دا تاني حنعيدو و نزيدو .......انا اسمح منها انت العاجبك فيها شنو ما تطلقها و تخلصنا منها ياخ .......فاااااتن قفلي بوزك دا و خليك في حالك ما عندك بيها شغلة ........كيف ما عندي بيها شغلة انت يوم في و يوم مافي و انا ما بقدر اعيش كدا صراحة ......قصدك شنو يعني .......يعني يا انا يا هي يا جلال ......يا انا ياااااا هي. .......خلاص هي يا فاتن هي و انتي امشي اهلك .......فاتن اتصدمت .......يعني خلاص قنعت مني عايز تتطلقني .......انا ما طلقتك قلت ليك امشي اهلك. .......عشان اخليها تبرطع معاك على كيفها في ايام غيابي .......ايوة اظهري علي حقيقتك يا حاقدة انتي ما همك اشاركك زول بس ما عايزة فاطمة تكون مبسوطة و مرتاحةّ.......نفسي افهم عملت ليك شنو عشان تعملي معاها كدا؟ بتنتقمي علي شنو........فاتن اتخلعت ؟ عملت فيها شنو يعني انا دي قسمتي ربنا قاسم لي راجل مراة ......لا لا لا. كنتي بتحاولي تخربي بيت فاطمة و البيني و بينها دائما و بعد غلبك بقيتي مركزة معاي انا و جرجرتيني لحدي ما عرستك ........وقت محموووق عليها كدا طلقني و خليها هي في زمتك .......لالا الطلاق ما بالسهولة دي عمممري ما حاطلقك لاني عرفت من فاطمة اني ما عاجبك و لا حاعجبك و عارف اي شي بس تقعدي هنا دا طول عمرك كان عجبك ........طلقني يا جلال وقت عرفت انك ما عاجبني طلقني بس ما عايزة اعيش معاك انت ما راجل ياخ ...........ما بطلق انتي فاكرة الزواج دا ساهل كدا و الطلاق دا اسهل ؟ انا اديت ابوك و اعمامك كلمة و هم ختو فيني الثقة ما بطلقك لو تموتي ......
.فاتن لملمت حاجاتها و حست انو كل الحقائق اتكشفت عشان كدا البجبرها تقعد مع جلال شنو احسن تتطلق و هي متأكدة وواثقة انو بعد تتطلق من جلال حتجيب سيدو .......مشت بيتهم في الليل داك تبكي و تشكي لي اهلها و تحكي ليهم قصص ملفقة ........ظالمنيي يا جماعة ظالمني شديد و انا ما عارفة اعمل شنو حاسة اني ما متزوجة اصلا .......ابوها قال ليها خلي الواطة تصبح و الله الا اوريهو .......ما عايزاهو تاني انا بس فكوني منو قال ما بطلق .......لالا ما تفكري في الطلاق و الولد الفي بطنك يا فاتن اصبري بعد تلدي ربنا يسهلها ........الصباح ابوها مشى لي جلال زفاهو زين ......لالا والله يا عمي ما حصل دا كلو بالعكس هي طلعت غصبا عني و انا كنت معاها في البيت و كل الناس تشهد انا كل يوم مع واحدة و عادل بينهم جدا بس بنتك قالت انا من الاول ما كنت عاجبها و عايزة تتطلق ........دا كلام شنو دا يا جلال ......والله دا الحصل .......خلاص اصلك ما تطلقها التصبر لي هو العرس دا لعبة .........مشى الزين لي فاتن و بقى يقرر فيها في الحقيقة و في الاخر فالت ليهو اي ما عاجبني ما عايزة اعيش معاهو بالغصب هو .......اااي بالغصب و غصبا عن عينك ترجعي بيتك و تقعدي فيهو
يتبع.....
