Biringan: The Lost and Enchanted (On Going)

CHAPTER 8: Trianggulo

NICOLE

Halos isang buwan na ang nakakalipas nang magsimula si Nicole sa kanyang trabaho bilang katulong sa palasyo. Marami siyang natutunang mga bagay na hindi at dapat na gawin sa loob ng palasyo dahil na rin sa tulong ng kanyang kaibigang si Sabel at ng tatlong alalay ng Reyna na sina Maria, Patrisyah at Janis.

Tulad na lamang ng pakikipagkamayan ng mga Tao sa isa't isa. Hindi ito pinahihintulutan sa loob ng palasyo dahil ang ano mang mga nakasanayang gawain ng mga Tao sa kanilang mundo ay dapat nang kalimutan at tuluyan nang baguhin dito sa loob ng Biringan. Dahil rito ay unti-unting nagbabago ang mga nakasanayan ng mga Taong na-trap sa mundong ito hanggang sila ay matulad na sa mga dapat na ikinikilos ng mga Engkanto.

Sa loob ng tatlong linggong pagsisilbi ay maraming nasaksihan si Nicole na mga pangyayari na dapat niyang iwasan. May mga katulong na nasisigawan, napapagalitan, pinapalayas at ang nakakatakot pa ay hindi na nakikita ang iba sa mga ito kinabukasan. Minsang tinanong ni Nicole si Sabel tungkol sa bagay na ito ngunit umiling lamang ito, tila iniiwasan ang ganung klase ng usapan.

Paminsan-minsan ay nakaka-kuwentuhan niya rin ang The Sisters - pa-sikretong bansag niya kina Maria, Patrisyah at Janis - sa tuwing magagawi ang mga ito sa main kitchen ng palasyo kung saan nagtatrabaho ang grupo ni Nicole.

Nalaman niya sa mga ito na hindi gumagamit ng apelyido ang mga Engkanto, hindi nagkakaroon ng matinding sakuna sa loob ng Biringan tulad ng bagyo, lindol at matinding tag-init, umuulan dito paminsan-minsan ngunit tama lang ang lakas nito.

Nalaman niya rin na hindi naman pala ipinagbabawal ang lahat ng salitang Ingles. Maaari itong gamitin bilang bansag sa mga bagay-bagay ngunit hindi sa pakikipag-usap lalo na sa mga Engkanto na hindi naman nakapag-aral ng ganung salita.

Nalaman niya ang tungkol sa Dome-shaped na Harang na bumabalot at nagpoprotekta sa buong bayan ng Biringan. Ang Poste ng Harang ay makikita sa pinaka-sentro ng Biringan, nagsisilbi itong suporta ng Harang.

“Hindi mo matatanaw ang Harang mula rito sa palasyo. Makikita mo lamang ito kung pupuntahan mo ang hangganan nito.” paliwanag sa kanya noon ni Maria. “Maihahalintulad ang Harang sa singaw ng init sa kalsada kaya binansagan rin itong The Shimmering Wall.”

O singaw ng nag-leak na gas sa LPG tank.

Sa paglipas rin ng mga araw ay tila unti-unting nagbago ang tunog ng kanyang pangalan sa kanyang pandinig. Imbis na ang pagkakabanggit at ang dapat na tunog nito ay Ni-kowl, hindi nagtagal ay nawalan ito ng arte at naging Ni-kol na lamang ito.

Nakakita rin siya ng mga bagong mukha sa loob ng palasyo. Ang iba ay mga bisita ng Reyna na galing pa sa kabilang bayan at palasyo. Meron ding mga negosyante na pumupunta upang makipagkasundo sa mga bagay na maaari nilang mai-barter. Kabilang na ang mga gulay, prutas at ang iba ay mga kagamitan na galing pa sa mundo ng mga Tao.

Sa tuwing maghahanda sila ng pagkain ay pila-pila nila itong kukunin sa lamesa, ilalagay sa mga de-hilang tray, at dadalhin sa iba't ibang parte ng palasyo. Sa Library, sa mga opisina ng opisyal ng palasyo, sa mga alagad na nagpapahinga, sa loob ng isang malaking gallery kung saan inuukit ang mga statwa, pinipinta ang mga Wall Paintings at gumagawa ng mga palamuti para sa pagpapaganda ng palasyo, sa armory, at iba pang kuwarto.

Nagpapadala rin sila sa kabilang gusali ng palasyo kung saan ay may malaking pagawaan ng mga tela at espada.

Nakilala rin ni Nicole ang iba pang mga Tao at Engkanto dahil parin sa tulong ni Sabel ngunit makakausap niya lamang ang iba sa mga ito sa oras ng kanilang pagtulog dahil buong araw ay abala ang karamihan sa pagtatrabaho. Minsan ay hindi na lamang siya makikipag-usap para makapagpahinga narin ang mga ito.