هٓووّسّ ألبٓنّوُت..!!

(1)

يابت يانيروز تعالي طبقي الملابس الغسلتيهم الفايدة شنو من غسيلم وهم لسه في الحبل..

يمة انا فترت من البيت دة ولشنو ادخلم حسي ابوي وولدك برجعوهم السله قبل يخشو الدولاب..واطبق لشنو ذاااتو. اذا الدولاب بسوطوهو. سواطه عشان يطلعو فنله..

يابت ختي التلفون الفي ايدك دة وتعالي بأدب ..وألا يحرم عليك قرش للرصيد البتعملي بيهو خمجك دة ..

لالالا خلاص يمة جايه اها 🏃🏃🏃

(نيروز عادل .من سكان ام درمان..عمرها 24اتخرجت وعاطله ابوها عادل موظف بسيط في شركة تجاريه بالاقصاد.
..امها سعديه ربة منزل.عندها اختها ناريز تقرا الجامعه..اخوانا اولاد اتنين واحد مغترب اسمو علاء والتاني عندو عربية نقل كبيرة متنقله بين الولايات بالبضائع اسمو محي الدين )..(نيروز طويله وملانه القامه..خدرتا ناااعمه بالاضافه للفسخ..وملامحا ناااعمه..وجميله..)

ماشه وين يانيروز..😣

نيروز:يمة ماشه عند الجيران خلصت شغلي كلو وبرجع قبل ابوي ومحي يجو..

يمة عليك الله اديني عشرين جنيه ضروري🙏🙏🙏اتسلفتها من نسرين وبخجل كل مااشوفا.. لازم ارجعن ليها..

يابت كل يوم طالعه بكضبه وطلب قروش ..انا اكفيكي ولا اكفي اختك الجنها قروش ..حق الصندوق العندي ومابنقص جنيه..

نيروز:يمممه🙇🙇

سعديه:امشي امشي ماتوجعي راسي ..كفايه صوت الغساله وغسيلك زي وشك ..

طلعت نيروز بتوب الهزاز ومبلمة وشها خوفا من الشمس.ووشها مربوط ماقدرت تصطاد حبة قريشات...بقت تتكلم براها ...حسي اعمل شنو ابوي وراتبو في يد امي ومحي الدين جلدددة مابتهبش وعلاء البرسلو كلو في يد امي..أحييي انا لازم اشوف لي شغله ولا خدمة انزلا تجيب لي حق الرصيد والخلطات بس...

نيروز:سلامات يانسرين قدر ماالزول يجيك يلقاك ماسكه ليك يامخدة بتنجديها يا ملايه بتكويها..انا الغسيل بالعافيه لزيتو علي دفعتين وفم وووواحد ..

نسرين:هههههه النضافه من الايمان وانتي كسلك ده خلي في بيتكم لما تعرسي ..

نيروز:زهجانه يانسرين اشتقت لايام الجامعه والرمتله...حسي من الصباح امي تشغلا لي من خدمة لخدمة من المطبخ للحوش للعدة ..

نسرين:يعني عايزة تشغلي امك وترقدي..امي يانيروز مابتتزكر غسلت صحن بتين..لما اشوفا في المطبخ ساي قلبي بوجعني...

نيروز:كدة انسألك بوتيك عمر دة ماجاب شي جديد ..ارح عليك الله نغشاهو..

نسرين:انتي سوسه بس..من ألم لي حبة قريشات تجي تجريني للبوتيك..

نيروز:تعملي بيهن شنو طيب لاماهن كدي بلا فايدة...حسي يجي عرس في الحلة دي فجاأة ووشنا يكون مكودب لا فسخ لا نورة فيهو..وبراك عارفه نحن في وش سوق وقطرنا باقيلو لفه وحدة ويفوت..

نسرين:القروش بلمهن لما تجي عربية العدة بستفيد بطقم طقمين ..

نيروز قومي قومي ارح ..كدة لحظة 📲📲📲
اتصلت نيروز علي حبيبا اسمو اكرم وخبرتو انها طالعه للبوتيك القريب علي بيتم..

اكرم دة النوع الاربعه وعشرين ساعه ايدو في شعرو يلف ويفك ..ويبرررررم..(تظبيطة الخرشه)
النوع البنطلونو باهت وملان بسكن عادم الركشه وتراب المصاطب..عيونو مزيته وبجر شهقه نفس في كل دقيقه👃...

اها نيروز دي عاجباها روح شديد وعايزا تملا فراغا باي شي...

طلعت معاها نسرين واتجهو علي بوتيك عمر...في الطريق نيروز متواصله مع اكرم خطوة بخطوة وتكسر كلاما وتتدلع وهي ماشه.

نسرين:وحات الله يانيروز خجلتيني شوفي سيد البقاله ده حسي خلي الفي يدو وبقي مقهي فينا كيف.. ارخي صوتك دة شويه..

نيروز:🙎🙎هسسسسس دقيقه يا نيسرين..بتاشر بهمس...اها ياكروما اتفقنا يلا بااااي...مالك يانسو ياخ مايعاين ولا يتفرج بعدين هو زاتو شحدني رقمي طنشتو لانو ظاهر عليهو بخيل من شنبو الذي دركسون العجله دة...

بقن يتضاحكن ودخلو البوتيك ويتفرجو جاي وجاي..
نيروز:سلام ياعمر اها نفس الحال ماف ريحة حاجه جديدة..ان شاء الله جبت بزور العنب حاسه وشي اليومين دي اقلة شمس بيطلع زيت..

عمر:جبتها وجبت خلطات حلوة بس الا يانيروز ديونك لطخه وتقيله..حسي نسرين دي بتدفع اول باول وانتي تردمي شهر في شهر..

نيروز:عاد ياعمر نسرين دي عندها ومقرشه انا عااااطله وبلمهن ليك بالعافيه واللقيط جاي وجاي ..كدة سويلي خلطة تفتح وتشيل الزيت البطلع دة واحسب عندك واديني كرت اريبا عشرة جنيه..

عمر:ماتطولي الديون عشان تسلكي كل ماتطلبي حاجه..

نيروز:ماممكن يانسرين انا كل مرة الزك لز عشان تشتري ليك شي ينضفك. ..خليك تفتيحة واطلبي براك ماتكرهيني الجيت معاكي..
كدة ياعمر جهز لي خلطتي والكرت انا جايه لحظة خليك يانسرين معاه

طلعت نيروز ووقعدت في ركشة اكرم وقعدت تتونس
كانو في شباب في مصطبة بيت مقابل للبوتيك بس مسافه ميدان ماكبير شديد ولمحو نيروز واكرم..

نسرين بقت تتلفت منتظرة نيروز وتاكل في طرف توبا بالخوف لانو تصرفات نيروز جريئة ومابتهتم بالحواليها..

رجعت نيروز وشايله في ايدا قروش زي50ج وادتا لعمر..اها ياعمر خففت دمي وجبت ليك جزو من الدين الفات عشان تشتغل لي خلطاتي بضمير..

وطلعو هي ونسرين واتجهت نيروز علي الركشه وركبت ..ارح ارح يانسرين اكرم بوصلنا..

نسرين رجعت كم خطوة لورا واشرت بيدها لالالا
نيروز:ياخ سيبي تخلفك دة اعتبريهو اجار ونوصل اصلا البيت قريب ماف مشي كدة ولاكدة

وفي دة كلو الشله البهناك بتصور وتسجل المنظر..

اكرم ضرب بوري الركشه شديد نسرين اتوترت وركبت طوالي...
اكرم شغل الاستريو بصوت عالي ونسرين تتلفت في الشارع زي الرايح ليها طفل وخايفه.. ونيروز ترقص باكتافا بحركة بطيئه وتضرب نسرين في كتفها(عيشي حياتك وفكي الخوف دة)

يتبع