هٓووّسّ ألبٓنّوُت..!!

(28)

فتحي جرجر هاله في المحكمة ..قعدو معاهو اهلو يعفيها من قضية القذف...وافق بس بشروط انو تدفع اي حاجه خسرا في الزواج وترجع الدهب وحتي السفنجة الجابا في الشيله..والمبلغ الحددو كان 100.000غير الدهب والشيله وووو....وانتهي موضوع هاله وطلقا ..وفتحي خلي شغلو مع خالو وفضل شغال في كريز خط العربي ام درمان...

فتحي بدا يشتاق لسلمي ويتندم علي فراقو ليها ..وبدا يقارن بين سلمي وهاله ..كيف كانت سلمي بتتحملو ومحافظه عليهو..وكيف كانت بتحبو...

كل يوم فتحي يمشي يقف بالهايس جمب الصيدليه الشغاله فيها سلمه ويراقبا من بعيد ويبكي كل مايشوف سلمي طالعه وداخله..وكيف هي جميله ومحتشمة ومحترمه..وتبتسم مع الناس وتتعامل بادب..

فتحي دة اتأثر شديد بخسارتو لسلمي ..وعارف انو سلمي عقدو عليها وحتسافر لزوجها...

فتحي شال روشتة علاج لامو ودخل الصيدليه...والصيدليه زحمة وسلمي بتحاسب الناس ومامنتبهة للموجودين..وجا دور فتحي وسلمة شغاله في الحاسوب والماكينه...ومابتعاين للزول البمد الورقه...

سلمي عاينت للورقه قرت الاسم..ورفعت راسا لقت فتحي...اتضايقت شديد واستاذنت من البت المعاها تقعد وتحاسب...

دخلت جوة في مكان بياكلو وبصلو فيهو وقعدت تبكي بشدة....

فتحي قال للبت عليكي الله تنادي لي سلمي ضروري...واثناء مابتكلم مع البت تلفون سلمي راقد جمب الحاسوب..التلفون ضرب وجات في الشاشه صورة سامر عريس سلمي ومكتوب (حبي وغلاتي)

فتحي مسك دموعو بالعافيه وطلع ركب في الهايس وختا راسو في الدركسون ويبكي زي الطفل الفاقد امو...لانو سلمي كانت كاتباه في التلفون حبي وغلاتي....

البت دخلت لسلمي وادتا التلفون وقالت ليها الزول البرة دة دموعو في عينو وحنسني اناديك..وبلاحظ ليهو كل يوم بقف برة جمب خط العربات وبكون بعاين للصيدليه...

سلمي ابت تطلع وتبكي وتتزكر في اهانتو ليها وكيف اتخلي عنها بسهوله..

فتحي رجع وقال للبت ..قولي لسلمي انا ماماشي من هنا لبكرة بس تطلع لي ثانيه وحدة ..وانا منتظرة برة..

سلمي طلعت بعد تحنيس من البت لأنو البت شفقت علي فتحي وحنت عليهو شديد..

سلمي طلعت تتلفت جاي وجاي تفتش فتحي..

فتحي مسح دموعو ونزل من العربيه وأشر علي سلمي رفع يدو ليها...

سلمي مشت ليهو ووقفت..

سلمي:كيفك فتحي

فتحي:طوالي بكي ..اناماكويس بدونك ياسلمي..سلمي اعفي لي اني وجعت قلبك في يوم..

سلمي:لا يافتحي ماتبكي..قبل تطلب انا عفيتك والله..وحسي امسح دموعك دي الناس حتنتبه لينا..وانا بقيت اخاف من الناس...اتعذبنا بسبب الناس..

فتحي:سلمي اتطلقي من الزول دة..وانا بعمل المستحيل واتزوجك...امي ياسلمي مرضت وتتمناك مني وتتاسف عليكي ليل ونهار...وانا مابنوم اصلا ولاباكل ولا لاقي عافيه بدونك..كل البنات دي شايفا سلمي..تعبان ومتمني الموت بدونك...نفسي ارجع بيتكم وتجيبي لي الشاي وتتخجلي بتوبك وخمارك ..وترجيني بشوق ..نفسي تعاتبيني زي زمان وتبكي يوم سفري زي زمان...وفتحي ده ببكي بصوتو الرجولي لامن صوتو بحا...

سلمي مدنقرة وبتهز براسا...

سلمي:الله يشفيها خالتي..وربنا يديك السعادة وعفيت ليك كل اللقيتو معاك...وانا بعتزر ليك ماحاقدر اقيف اكتر من كدة..انا في الحسبان مرة متزوجه وماصح اتكلم معاك...ولوسمحت يافتحي ماتعيد موضوع اتقفل..عن اذنك ومشت..

فتحي دة بكا لامن صوتو واصل لسلمي وهي ماشه...

كل دعاك ياسلمي صاب وماخاب...

بهناك حققو مع نانا وقالت ماحصل اي حاجه من القالتو نسمة دة ...عكست اي حاجه هي عملتا..هي الاتصلت علي وهي الكانت عايزة تضربني وتسممني...

العسكري حارس نانا ..ونانا بتحكي ليهو التفاصيل في كل تحقيق..

العسكري قال ليها لو هي اتصلت عليكي..اطلبي منهم يجيبو قائمة الاتصال بتاعك من شركة الاتصالات...ولو انتي ماهبشتي كباية القهوة خليهم يشيلو البصمات..وبرضو من الحديدة يشيلو البصمات..

نانا طلبت تتكلم مع القاضي..كل القالو ليها العسكري...

سبحان الله ربنا بديك في نص احزانك ملجأ وحلول...ربنا بسخر ليك ناس طيبين..وبيكونو اسباب ليك في صلاحك..

الضابط بعد كم يوم جاب قائمة الاتصال ولقي مكالمة نسمة هي الواردة لنانا...دة نمر واحد...

شالو البصمات من الكبابي والحديدة لقوها بصمات نسمة فقط...

وبهناك صفيه دي كتمت الحق دة نهائي مافكرت تنقذ نانا وتعمل خير فيها..لانها هي اصلا الحرشت نسمة وولعت النار ....

ونانا قالت للضابط انا متاكدة ساعه الحادث ونسمة هاجمه علي ..في صوت من الجيران طلع لانو بكون شاف نسمة هاجمه علي وصرخ..وعشان تتاكدو لازم تجيبو صفيه الجارة الاقرب لنسمة...

جابو نسمة وووها البصمات والاتصال تبعا هي...ومازالت نسمة تتحلف وتبرر انو ده كلو من نانا...

صفيه بهناك ولدا ده عيان لامن عايز يموت وتكورك وتبكي...وتتحسر ..قالت في نفسها ده حق نانا الانا كاتماهو..لبست توبا وجري علي المركز..

دخلت لقت التحقيق شغال بين نانا ونسمة..

قالت صفيه:ياسعادتك انا بوريك الحاصل...نانا دي جات بطلب من نسمة ..ونانا اتكلمت كلام كويس من نسمة وقالت ليها العايزاه بعملو..لكن نسمة غدرت بيها...وانا الوريتا انو حودة ده جاري ورا نانا...ونانا دي شوف عيني البتاكلا الدود...  واضاني البتسدها القطنه.. طردتو من جمب بيتا لما جاها طالب الزواج منها...

تم الافراج عن نانا وبدت قضيه جديدة مع نسمة..

نانا طلعت البيت وبكت مع امها والناس انهالت تبارك ليها البرائة ...

صفيه ولدا بقا نصيييح واتاكدت انها كانت حتخسر ولدا بسبب حق الناس الفي رقبتا...

يتبع...