هٓووّسّ ألبٓنّوُت..!!

(17)

ربنا بسترك الف مرة عسي ولعل ترجع من الطريق الانت فيهو ...بس بفضحك في لحظة وانت بتندم علي كل لحظة كنت مستور فيها...

ناريز حائرة وخايفه حتي من صوت نيروز لماتتكلم معاها...خايفه من امها وابوها واخوانا الحتكسر عينم جم الناس..وخصوصا الاهل اهل الوالد لانو علاقتم بيهم نوعا ما حساسه..واهل الام الممكن يعملوها شماته لامهم الاختارت عيشة العاصمة وام درمان وخلت البلد وجات عشان تعلم بناتا احسن تعليم...

عبودي جاب غيارو الكان بلعب بيهو في الشارع وسلمو لامو...امو بدت تنفض في الهدوم من التراب ..وبتلقي دايما حصا او خرز البلي جوة الجيوب وبخسرو ليها مروحة الغساله ..دخلت يدها جوة الجيب ولقت الورقه فتحتا مكتوب بقلم جاف(جهاز فحص حمل)...ربطت كلام حمودي مع بعض واتزكزت انو قال ليها بت جيرانا...فمن طبع الحريم لازم يحفرو اي شي قرارو واصلو وليه ومنو وماادراك...ركزت انو في الحله ماف وحدة ممكن تحتاج لجهاز الحلة كلها بنات مامتزوجات حتي المتزوجات كل وحدة في جهة بعيدة..قالت امكن وحدة منهم جات الحي زيارة لاهلها وحبت تفحص...

نادت عبودي ولدا الكان قاعد جمب التلفزيون وبحضر قناة كراميش..وبصوت الغساله هو ماسامعه..قلعت سفنجتا ودخلت ليهو جاتو هجوم من القفا صبجك صبجك صبجك لحد ماعبود دة وقف في ركن الغرفه وبحك ضهرو كدة من جميع الجهات...

وااااي وااااي ابووووي 🏃🏃🏃

مها :تعال تعال..مش بناديك انا ياصايع انت... منو الرسلك للصيدليه...قوووول...وهي رافعه السفنجه واصبعا في خشمها قائم علي وضع هووووس👆👆👆...

عبودي:يمة بت ناس البيت الجمبو دفار داك زي حق خالو مهند...مابعرف اسمها منو..

مها:قعدت في السرير وطشت بعيييد... والسفنجه خطفا عبود وقام جري لبرة...

مها ختت يديها في خدها متحيرة وبقت تلعن شيطانا علي الظنون الجاتا في راسا...

قامت علي حيلا وقالت استغفر الله من كل ظن...بري يمة مالي ومال الامور دي... انا عندي بنات صغار ومامعروف الزمن يسوي فيهم شنو..احسن لي احفظ لساني واحفظ بناتي علي وماعندي دخل بالبحصل ربنا وحده اعلم بكل الخفايه..استغفر الله استغفرالله يارب ومشت وقفت جم الغساله وتفكر في الدنيا وخايفه...

مها دي النوع الحقاااااني داك يعني كافيه خيرا وشرها نهائي مابتفتح خشمها الا بالكلام الكويس ومابتشارك حريم في ونسه ولاسواطه..تمش جلسة الجمعيه مع الحريم واول وحدة بتطلع ..لابسه شرابات ومكوزة طرحة تحت التوب وحواجبيها دي غزييييرة لاهبشا موس ولاخيط...انسانه واعيه...زوجها عندو محل كدة بتاع لحام سراير وحدادة وعفش حديد...

اها ناريز ماعارفه تتصرف كيف قعدت فكرت ترجع لدكتور سفيان بس خايفه من البحصل..

رجعت برساله لسفيان...وكتبت التالي...:

السلام عليكم دكتور سفيان جيتك راجعه وعايزة منك طلب اخير...انا زوجي قال لي ياالجامعه ياالحمل وزوجي النوع المتخلف واتجاهو واحد وجاهل ومافارق معاهو اطفال لانو متزوج وعندو كمية اطفال...وانا الزوجة التانيه..وانا جامعتي مابتتحمل اجمد او اشيل بدايل وغير كدة مابثق في زوجي انو يرجعني تاني الجامعه..فانا اخترت اجهض البيبي ..الحمدلله اطمنت اني ممكن احمل تاني ...ممكن توريني اعمل شنو غير العمليه لاني عندي فوبيا من غرف العمليات..(تفكير معدوم من الضمير...)

دكتور سفيان قرا الرساله وسكت ..بقي يدور الكلام ده في راسو معقول في زول بتلهف علي طفل ويجي يتهاون فيه كدة...لالا دة موضوع خطير وعايزة تستخف بعقلي..قال مايظن فيها...ورد ليها

سفيان:مرحبا...يااخت نون ناس بالقروش بسافرو لابعد مكان عشان يلقو طفل  وبتعبو فيهو علاجات وابر وعمليات ..انتي عايزة تجهضيه عشان جامعه...علي العموم تعالي لي العيادة في...???...شارع..???...عمارة..???..في مجمع طبي???وانا بديك الحل الاكيد...

هنا سفيان حبا يجرها ويعرف الحقيقه ويوعيها من الحاصل اذا هي فعلا غلطت...

ناريز وافقت واطمنت شويه واتغطت رقدت تفكر...قالت ماتكلم منصور لانو اكيد حيزوق وما حيوافق بطفل غير شرعي...

امها سعديه جات تكورك فيها..

سعديه:يابت حركاتك اليومين دي زي الزول الرايح ليهو شي. ..لابتاكلي مع الناس لابتسويلك شغله لامهتمه بنفسك لاقرايه لاشكل...مالك فيك شنو.  ..قومي ردي علي احسن ليك تسيبي الدلع...الحق علي الخربت طبعكم وخليتكم مامسؤلين ...يابت يانيروز جيبي لي حقنة الاونسلين وامليها لحد عشرين سيسي.جسمي دة ينفض زي الكهربه...

ناريز متجهه علي الحيطة ومتغطيه وبتبكي وتتكلم في سرها اريتك يمة عرفتي البي والحاصل انا تعبانه يمه...انا حاكون سبب لموتك وعارك...

نيروز جات داخله وضربت الحقنة لامها وبدت تنقنق...دي كمان اليوم كلو راقدة وسايبه لي كل الشغل في يدي ...قومي ياناريز غسلي ملابس ابوي دي..الصباح طلع بجلابيه ومابتنفع مع شغلو بتتوسخ سرعه...قومي هديتي حبال السرير برقادك وبقيتي زي المركب المنخور...

ناريز الكانت بترد كلمة بالف كلمة نهائي ماردت وكانت دموعا جاريه وبتمسحا بطرف اصابعا ..

نيروز كملت خدمتا كلها وجات كاالعادة تتمسح جابت كل كريماتا ..وبدت تكورك..اها ياناريز ياحرامية قمتي علي الكريم بتاعي تخمي لامن وصل قعر العلبه ..الاهي ماينفعك..ياحراميه ..انا ماعندي قروش وانتي البتوفري من مصروف الجامعه تشيلي حقي...

اتمسحت ولبست الاكياس..ومسحت وشها بقع بقع بالخلطه.. ولفلفت شعرا وجابت تلفون امها ومسكلت لنانا...تييييت...تييييت... وقفلت...

يتبع...