هٓووّسّ ألبٓنّوُت..!!

(19)

الصباح ناريز لبست وطلبت من امها مبلغ350ج لزوم انها محتاجه كتاب غالي ...امها احتجت في الاول بس وافقت وادتا...

مشت دخلت المكتبه واشترت قلم شين اسود واشترت من السوق العربي وهي ماشه دبله فالصو دهب صيني ..قعدت في مظله بعيدة وقمعت اصابعا بالقلم زي الحنة السودا البناشدر ديك...ومشت علي وصف دكتور سفيان...

كدة ناريز ظهرت انها متزوجه لانها لابسة جزمة بشراب ومحننه يديها بالقلم...وقلم الشين الا تغسل يدك علي كم مرة حتي يطلع اثر القلم...

دخلت لقت الحجز كتير وزحمة..وكانت ملثمه بالطرحة خافت يشوفا زول بعرفا...

قعدت واتصلت علي الدكتور قال هو برة قريب علي العيادة مسافه عشرة دقايق ويصل...

ناريز مابتصل عليها منصور الا هي تتصل ليهو لانها كانت مجرد نزوة وزيها وزي اي بت اتغشت لمنصور...

دكتور سفيان جا داخل بهيبه كدة بدله وكرفته وخدار ناااعم وشايل شنطة راقيه كدة في ايدو ووقف جمب البت البتسجل ودخل...

البت البتسجل ندهت المدام نون...المدام نون...المدام نون...

ناريز نست اسم نون وقاعدة سرحانه في الاخير ركزت في المدام نوووون...قامت ولبست شنطتا ومشت علي المسجله وقالت انا المدام نون...

البت البتسجل اتلائمت معاها وقالت ليها لي زمن بنده فيك مالك مااتحركتي وانا شايفاك قاعده بهناك...

ناريز ماردت خالص ودخلت وهي بترجف وجسمها مولع بالخوف..

فتحت وشها وسلمت علي الدكتور وقعدت وغالبت دموعا...

دكتور سفيان عاين ليها والقلم في ايدو وجزو منو في خشمو ..ومتكي علي الكرسي وبتهوزز كدة زي قعدة المدير العايز يهرشك ...

ناريز اتوترت وختت يدها في الطربيزة عشان تظهر الدبله والحنه...

سفيان:مرحب نون..مبروك الحمل..والاسف انك عايزة تجهضيهو...لازم تغنعي زوجك انك تواصلي جامعتك وتكوني حامل..حرام قتل روح بدون سبب..نحن بنعمل اجهاض للجنين اذا كان بضر بصحة الام او مشوه وقبل يتم اربعين يوم ومااتنفخت فيه روح...وسكت مسااافه كدة واتلفت بالكرسي كدة والقلم لسه في خشمو ....وبعد سكات بتفكير ...قال ليها خلاص اتصلي علي زوجك يجيني حسي ويملا لي فايل ويمضي عليهو وانا بتم ليك الموضوع دة....

ناريز:اتهجمت واتوترت بس اتحملت عشان توترا مايظهر...قامت قالت حاطلع اتصل عليهو...

ناريز طلعت وغطت وشها بطرحة وطوالي نزلت من العيادة الفي الطابق الاول ..بسرعه طلعت ووقفت برة..

دكتور سفيان عاين ليها من شباك المكتب الكان مطل علي الشارع...ونزل وراها..

ناريز مشت قعدت في مصطبه في محل رايق من زحمة الناس...ودكتور سفيان مراقبا من بعيد ...

طلعت منديل من شنطتا وقعدت تمسح في حنة القلم الفي اصابعا وتبكي بهدوء وتتخج بندم...وشالت الدبله رمتا وتبكي ومدنقرة مواصله تمسح اصابعا...

جا دكتور سفيان براحه بدون صوت رجول...وقعد في المصطبه..وقال نون...

ناريز:اتلفتت سرعه وقلبها صوتو واضح مع طلوع النفس...

سفيان:اتورطتي لشنو يابت الناس وبهدلتي نفسك كدة..ليه مافكرتي في اللحظة دي?انا دكتور حالف قسم ومستحيل اشارك في جرائم ذي دي مهما كان...انا ضللتك عشان امنعك وحسي بمنعك...وين ابوهو ليه انتي شايله المصيبه براك...عارفه انا ممكن ابلغ عنك واحبسك..وتاخدي عقابك وحدودك..

هنا ناريز غطت وشها بيديها وبقت تبكي بصوت عاااالي ...وترجف وتقول لالالا لالا الله يخليك استرني الله يخليك استرني...

سفيان:ماف حل غير انك تصلحي غلطك وتثبتي نسب ابنك بزواجك من ابوهو..قومي امشي يانون وانا ماحأضرك بشي ....ومشي سفيان علي عيادتو...

ناريز :طوالي اتصلت بمنصور...انت وين يامنصور...طيب تمام وطق قفلت الخط..

قامت ركبت واتجهت علي الكدرو ولما وصلت البيت ضربت جرس الباب لامن فترت وقعدت في المصطبه واتصلت علي منصور تاني..

منصور:اها في شنو

ناريز:انا برة افتح الباب

منصور:طلعت انا قومي ارجعي بيتكم

ناريز:بصوت مهزوز ومكتوم مخنوق مقطع باكي...انا حامل منك يامنصور...انا في ورطه..انا حاموت يامنصور...

منصور:هه حامل?(بكل برود)

ناريز:ايوة انا حاااااامل..

منصور:مني انا?هههههااااهههه..البلياردو ملان بالدولارات الشبهي ...انا ماعايز اربي طفل مامني انا يادنيئه يارخيصه...وحسك عينك اشوفك متصله هنا تاني...وطق قفل الخط..

ناريز قعدت في مطبة البيت وختت يديها في راسا ...جاها ولد عمرو زي 20سنه كدة قال ليها انتي دايرة منو في البيت دة..

قالت عايزة سياد البيت ديل...

قال ليها ديل ليهم قريب سنتين في السعوديه ..لكن ولدم واحد موجود وشغال هنا.. قاعد هنا ومرات صحبو بجيهو...

ناريز سالتو ولدم اسمو منو..قال ليها اسمو مؤيد وصاحبو اسمو منصور...

ناريز قامت ومشت ركبت المواصلات وبتبكي متجهه علي الشباك علي الشارع ...ولما وصلت في محطة كدة اتزكرت السيدة المسنة الركبت معاها واتونست معاها وقالت انها دايه قديمة ..انها نزلت هنا وقالت بيتا قريب بجاي...عاينت للحي وقشت دموعا ...

يتبع...