هٓووّسّ ألبٓنّوُت..!!

(23)

صفيه مشت لنسمة وقعدت معاها ونسه ونستين...وسالتا من ذوجها حودة..قالت شغال بالركشه..قالت ليها بديك كلام لمصلحتك..ابعدي حودة من نانا بت محاسن...حودة مباريها وحايم معاها بحري شي ونسه وشي هدايا..ولو مامصدقاني راقبيهو وشوفي هو بتكلم مع منو وبمشي لمنو.واظن لماعايز يقابل نانا بوقف الركشه جم مظلة المرحوم صديق..وغير كدة نانا دي بت ماتمام وبتتعامل بالكاش ..امس باليل الساعه تلاته نانا جاها ودعمها وقامت جوطة وشرطة وقيامه...عشان كدة يانسمة لمي راجلك عليك وامسكيهو قوي..

نسمة زوجة حوته صبت فيها مطرة ومسكتا رجااافه...بعد صفيه مشت..قعدت نسمة تفكر انها تتاكد من الموضوع دة كيف..جا حودة راجع البيت نهاااائي ماظهرت ليهو انها ناقشاهو وعارفه حاجه ..اتعاملت معاهو زي الفل وعااادي ونسه وضحك..بس بقت تراقب رمز التلفون طريقة فتحو كيف...

لما عرفت الرمز انتهزت فرصة انو طلع النادي وحيرجع متاخر...قعدت فتحت الرمز براحة ودخلت الواتس. ولقت اسم نانا وجمبو💝وفتحت المحادثة وياصدمة جاتك يانسمة ..الصور والحركات والحب والشوق والمواعيد وووو..نسمه حذفت حساب الواتساب بتاعا وسجلت برقم حودة واستلمت الرمز بتاع حودة كدة بقا شغال ليها نفس واتساب حودة في تلفونا..ودة عملتو بتطبيق (إن واتساب)الجديد..ورجعت التلفون مكانو...

مشت علي غرفتا ونزلت ليها رسايل لاتحصي ولاتعد شي بنات وشي حبشيات وشي عجايب..دة كلو ماهماها ..بس الهماها نانا السمحة بت حلتا..

جا حودة راجع واتونس معاها عادي واتعشي ورقد وبعد ماأتاكد انو نسمه نامت. دخل الواتساب علي نانا..ونسمه صاحيه بس عملت نايمه..

اها الصباح نسمة فتحت الرسايل وقرت المحادثة التاليه:

حودة:اها السمعتو دة صح يانانا..

نانا:قول السمعتو كدي..لوفي زيادات عشان احذفا واقول الحاصل..

حودة:مامهم المهم هو لمسك ولا لا..لولمسك بقتلو يانانا..

نانا:ماتخمني بالكلام وخليني انا زهجانه ..ّّ

حودة:رأيك شنو بكرة افسحك وافك زهجك..بتصل عليك الساعه عشرة كدة نتلاقي..

نانا:خلاص تمام يلا تصبح علي خير..

نسمه عاينت كدة لقت الساعه تسعه وكم خمسين..لبست توبا..وبين كل دقيقه تتصل علي حودة وتجدع التلفون جم الشافع عشان يقول ولدو بيلعب بيهو..كان هدفا تلقي التلفون مشغول...

طلعت مشت وقفت بعيد لقت حودة واقف بالركشه جم المظله وبتكلم بالتلفون..وقفت لحد ماجات نانا بعبايتا ومحفظتا واللبانه كيف كيف شي عجيب...ووقفت بعيد من حوتة كانو مابتعرفو..

نسمة مااتحركت ووقفت لحد مانانا ركبت براها مواصلات..وحودة براهو... مواصلات..والركشه مقرشه جمب المظله..رجعت البيت وبقت تفكر تحل الامر دة....

(

وبهناك..)

ناريز مشت الجامعه واتصلت علي نيروز تجيها باي طريقه. لانو محي سافر والطلوع ساهل...

نيروز قالت لامها ناريز نست كتاب مهم ولازم اوصلو ليها...طلعت وشايله كتاب وهمي في يدها ومشت الجامعه وقعدت مع ناريز

ناريز:من يوم منصور عرف بالحمل ..الجامعه بقي مايجيها واي زول من طرفو الكنت بشوفم معاه برضو ماظاهرين..

نيروز:مصيرو يجي وتاخدي حقك منو...
حسي الحل شنو ووصلتي لشنو...انا مشكلتي أخف منك..اكرم عمل لي سمعه في الحي لانو محي دقاهو جم الناس واكيد كلهم افتكروها حاجه تانيه..وخوجلي مابخليهو لو طار السما...بس كدي نحل مشكلتك دي..وشوفي نانا اخدت حقها كيف بس ماهماها الناس قالت شنو ..المهم حقها رجع...المشكله في الناس البتألف ..كلهم ساتراهم بيوتم وحيطانم...وكل واحد مشكلتو اكبر..بس مايلقو تور واقع.. ويكترو السكاكين..

ناريز:قومي يلا معاي..نمش الكدرو..

نيروز:طيب ننتظر نانا تجينا ونمش..اتصلت علي نانا ونانا كانت مع حودة ..واتفقت تصلم باقرب فرصه..

اجتمعو التلاته وركبو مواصلات الكدرو ونزلو في محطة السيدة المسنه الكانت حافظاها ناريز...

اتجهو علي الحي وهم ماعارفين بيت السيدة...في النهايه نانا اتجهت علي بيت ودقت الباب جاتا مرة وسالتا نانا من بيت الدايه لانو عندهم حالة وضوع مستعجله ..المرة وصفت ليهم البيت ..

مشو التلاته ووصلو البيت ودقو الباب.جات السيدة المسنه ورحبت بيهم ودخلو البيت...

ناريز:كيفك خالتي كدة عايني لي ماعرفتيني..

السيدة:بري يابتي ماعرفتك..نظري راح مع العمر..انتي منو يابتي..

ناريز:لو متزكرة قبل كم شهر اتقابلنا في المواصلات وكنت قاعدة جمبك وبرجف وانتي قلتي لي كيت كيت وانا قلت ليكي كيت كيت...

السيدة:اعفيني يابتي مامتزكرة..

نانا:ياامي نحن جاينك تساعدينا. ..اختي دي حامل وعايزة تجهض ومالقينا واجهة غيرك..

السيدة:ليه عايزة تجهض...انا العجوزة دي بتمني لي جنا يعيش معاي..عشت حياتي بشيل اطفال الناس بايدي وانا ماعندي جنا...احساس صعب...وقعدت تبكي..

ناريز:كونك ياخالتي عايشه برضا ربنا يكفي انك ماشه صح...بس انا زنيت وشايله طفل غير شرعي...واتمني الموت ولا امي تعرف. ..

السيدة:لالا يابتي ماتجهضيهو خليهو يتم شهورو وانا بولدك وبربي عندي..ماتقولي انا كبيرة وعجوز وبهملو..اطمني عليهو مابتجيهو عوجه معاي...

ناريز:بس بطني حتكبر ويعرفو الناس وبقتلوني اهلي ..وبكت ناريز برجفه وخوف..

السيدة:يابتي انتي بكريه وجسمك النوع المابظهر الحمل الاول يعني بطنك مابتكون ظاهرة شديد بس انتي اعملي حسابك ماتظهري في التسعه شهور دي لحد مايجيك المخاض وتجيني اولدك ..ومن تدخلي الشهر التامن اكلي بلح كتير عشان يسهل ليك طبيعي..وبرجعك بت زي ماكنتيّّ.وبديكي رقمي وبتابع معاكم..بس انتي من تلاحظي بطنك كبرت البسي توب طوالي ..وهدوم واسعه وماتطلعي كتير ولا المناسبات ..ولو عندك جامعه ..في الشهر التامن دايما اتاخري في الجامعه وبعيد من نظر الناس

نانا:تعالي عندي ...ووقت الولادة ياناريز نحن حنتصرف ماتخافي

ناريز شبه قبلت واتفقو مع السيدة وشالو رقما وطلعو...

يتبع