هٓووّسّ ألبٓنّوُت..!!

(20)

بهناك نانا جاها خوجلي يصلح ليها وصلة التلاجة وكم كوبس كدة واثناء مابتتونس معاهو وادتو راحتو في الكلام وقهوة كدة وصراحة..خوجلي وقع وحكا ليها هو عمل شنو وقال قصدو يبعد اكرم من نيروز لانو اكرم بصور البنات في تلفونو وبشهر بيهم...

نانا استنتجت من خوجلي انو الشله دي كلها وسخة وهدفا التشهير بالبنات...

نيروز بقت خايفه علي اختها..لانها حست بيها اليومين دي متدهورة شكلا ونفسيآ ..قعدت تفكر ناريز الحاصل ليها شنو...

ناريز وصلت البيت ومن دون سلام غيرت ملابسا ورقدت أتغطت...نيروز لاحظت ليها مشت جابت ليها اكل وعصير وقعدت جمبها...

نيروز:نحن اخوات ياناريز لوعيانه ولا في زول مزعلك وريني وانا باخد حقك..ياناريز وين اهتمامك بنفسك ..شوفي وشك وعيونك ديل متغيرين كيف...

ناريز ماردت وماقامت خالص وكانت بتبكي بسكات...

باب الشارع فتح ..محي جا من سفريه بضائع..كورك من برة يانيروز جيبي لي غيار وحضري لي اكل وشاي سريع..

ناريز سمعت صوت اخوها ورجفت وقلبها ده دق شدييييد. ..جاتا دوخة كدة ..اتصلت في رقم منصور ..لايمكن الوصول اليه..دخلت الواتساب لقتو عامل ليها حظر..دخلت الفيس لقتو ناشر صورو وهو في رحله نهريه مع اصحابو وبنات وصور كتيرة وهو مبسوط فيها...دخلت ليهو في الماسنجر ابا يرد نهائي قدر ماترسل وترسل وترسل..تعبت شديدمن التفكير والبكا...

قالت تتصرف اتصلت بنانا وقالت ليها بجيكي البيت ..لبست عبايه وختت تلفونا في الدولاب وطلعت ومااتصادفت هي ومحي اخوها برة لانو دخل الحمام...

نيروز جهزت الاكل لمحي وجات لقت ناريز ماف...
قالت تغير ملابسا وعايزة تشيل بجامه من هدوم ناريز لقت التلفون راقد..واثناء ماشايله التلفون جات رساله ماسنجر من فوق كدة ظاهرةمنبثقه مكتوب فيها(انا مابصلحك بشي وشوفي غيري اتهميهو وماترسلي هنا وحسي بحظرك مافاضي ليك..)..نيروز اتفاجأت وقفلت باب الغرفه من جوة وحاولت تفتح رمز الهاتف ماقدرت لحد مااداها تجاوزت المرات المسموحه..اتزكرت انو ناريز دايما بتعمل رمز الpinتبع الغاء النقش بسنة ميلادا..

كتبت 1994طوالي جيييك اتلغي الرمز...حاولت تفتح الواتس لقت عامله ليهو رمز بتطبيق محملاه . ..فكرت تمسح التطبيق..مسحتو الواتس طوالي فتح..عاينت للدردشات كلها جايطه كدة قروبات اول شي وناريز كان مسجله منصور ب (نون)نيروز اتخطت منصور ولقت مكتوب دكتور سفيان..طوالي فتحت المحادثه...

نيروز ركزت في اخر كلام ..🎇🎉🎆.مبروك انتي حامل ووووووو.....
عاينت للصورة لقت جهاز حمل مصور فيهو خطين ...راجعت كل المحادثة فهمت الحاصل وبقت تبكي بانين مكتوم ويديها بترجف وهي ماسكه التلفون ..قعدت في الارض علي رجليها وبتبكي وبتكتم صوتا عشان محي مايسمعا...

فتحت الماسنجر قرت رسايل ناريز وتحنيسا وترجيها لمنصور ..وهو بشتما كيف وبهينا...رجعت الواتس فتحت محادثه محادثة لقت نون ياهو منصور ورجعت للاول من بداية المحادثة فهمت هو جرجرا كيف وغشاها وكلامو المنمق المخادع...

نيروز سجلت رقم منصور في الحيطة تحت ورا الستارة بخط رفييييع...

وقفلت التلفون شالتو عندها...

طلعت الحوش لقت محي بتغدا..عاينت ليهو .وقلبها وجعا عليهو قعدت في عتبة الباب تبكي بصوت مخنوق وماقدرت تدس صوتا...

محي عاين ليها وسالا مالك بتبكي ومشي عليها مخلوع...

نيروز مسكت محي من يدو وتبكي وهي دايسه يدو شديد..خافت انو يفهم في حاجه..قالت ليهو عندي وجع معدة وقبضه شديدة...رفعا من الارض ودخلا الغرفه ومشي جاب ليها حبة فلاجين ومسكن وأصر عليها الا تاخدم...نيروز اخدت الحبوب ورقدت...

امها جات داخله لقت محي قاعد جم راس نيروز...اتهجمت في شنو مالكم الحاصل شنو

محي ردا انو نيروز عيانه شويه..امها قعدت جمبها وبقت تسالا وتطمنا انو يكون شطه ولا برد ولا حاجه اكلتا مانفعت معاها...

بهناك ناريز ..قاعدة ونانا جابت ليها قهوة ابت تشرب وجابت ليها عصير ابت تشرب...

قالت لنانا تعالي معاي بعيد من امك في الراكوبه دي...

نانا:اها جيتك وريني مالك وشك ضارب كدة ..لونك ولون الطرحة واااحد...

ناريز:بدت تبكي وتلطم وشها..

نانا اتهجمت وجات علييها وقعدت جمبها وبدت تسالا باستمرار في شنو في شنو مالك...

ناريز:انا اتحطمت انا ادمرت انا استحق الموت..يانانا انا محتاجه ليكي..لوكلمت نيروز حتضبحني لوكلمت امي حتموت .انتي اكتر زول ممكن يساعدني..انا حامل يانانا..

نانا دي قامت علي حيلا واتنفضت وضربت سدرها كر عليك ..سجمي ..ناريز انتي نصيحة ولابتهضربي ..

ناريز:انا حامل ايوة ايوة انا حامل...

نانا:وقعت علي رجليها وبقت تضرب نفسها وقامت علي ناريز كفوف جاي وجاي وطلعت الحوش وقفت وختت يديها في راسا ورافعا راسا فوق وتشهق بصوت مكتوم...

ناريز جوة تبكي وتلطم وشها...

نانا جاتا راجعا وحضنتا وقعدو يبكو شدييييد...

نانا :ناريز انتي ليه عملتي كدة ...ليه انتي دمرتي نفسك..ليه مافكرتي قبل تمشي الدرب دة....

ناريز:ساعديني يانانا قبل محي يعرف وعلا يعرف.حيضبحوني والله...واااااه ااااه ااااه بقت تبكي...

قعدت نانا تفكر وتفكر وتفكر...

يتبع