هٓووّسّ ألبٓنّوُت..!!

(14)

سلمي بعد سلمان فات..وهي بتفتح باب الشارع برجلها وبتدخل قروش في محفظتا وفي يدها التانيه كيس حلويات (العٓبّد)

سيد دة جا من هناك زي التور الاسباني هايج هيجان..

الله يشيلكم وسختو لينا الحله وبقيتوها مشبوهة ياصايعات ياحوامات..والله الا اجيب ليكم البوليس يشيل وسخكن دة من جم دكاني...ليه الحله دي مافيها راجل مالي عينكن..اتفوووو علي الربكان يا رخيصات...وصوتو ده عاااالي لامن كل البيوت اتفتحت ابوابا طلات شمشرة كدي من خلف الضلف...

الزول في ايدو عجين بجري بتشمشر ويطل..لا ولا الفي يدو فراشة جرعات حقن..تلقاهو نصيييح ومتشمشر..والبترضع تجدع جناها في السرير وتخت ليهو مخدة عشان مايقع وتجري تشمشر..لا ولا البيكون في الحمام دة حقو كُتُر ..بلبس هدومو كدي بالقلبه وجري علي الباب...

نرجع...

توسل فتحت باب البيت وختت الحاجات الفي يدها ورا الباب ومشت علي سيد..

توسل:انت ياسيد بتتكلم عن الرجاله ...كدي وريني معني الرجاله شنو...الرجالة راجل خشمو اليوم كلو جوة اضانات الحريم..ولا مباراتك لبنات البيوت وطلوعن ومروقن بتعاين لاضافريهن فيها شنو..دي ياها الرجاله البتقولا..فاقد الشيئ لا يعطي...انت اصلا ماتتكلم عن الرجاله..لو فاكر نفسك محسوب مع الرجال معليش ..شنبك ده بقوم في الغنمايه عادي ...ودكانك الكلو صراصير وفيران ديل خايف علي نضافتو وسمعتو..يعني نحن بنوسخو ليك...اسمعو هنا يالمطلعين ريسانكم زي تماسيح الدميرة..سلمان ده خطيبي وعندو شغل مع ابوي..والعندو فهم في راسو تعال ونكملو ليهو..ولو انت مبارين سيد دة اخير تخلو قعدة الختمات والمديح والجمعيه الخيريه الراس مالا تخربو في بيوت الناس وتألفو...
وان علي سيد الصابونه في الظلط بجنيه عندو هنا بجنيهين..دة انسان مبخس الكيل والميزان...وبالكضب الكتير لامن سنونو بقن صفر من صدي قلبو وعفانتو...

اها الحله دي بقت صنننننن ماف غير صوت  الضفادع(ذي دار الاوبرا)...

وكرووو توسل رزعت الباب ودخلت..
ّّ

سيد ده ياخ بقي وقف كدة وراسو دي من جوة اتفكت صاموله صاموله...مشي علي الدكان قفلو ورجع الميز الهو قاعد فيهو..

توسل دخلت وحزرت البيت كلو مايشتري حاجه من دكان سيد الملعون..وحلفت للشفع البتلقاهو في دكان سيد الا تدقو...قعدت وزعت عليهم الحلويات ..

فطين تاني يوم في الختمة فكت ليك الشمار دة بعد دعاء ختم القران..وبزيادات..

وفي حريم شافو نقاش سيد وتوسل..بس النطق بالحق ثقيل علي القلوب السوداء...

المسا كدة توسل راجعه من الجامعه لمحت اخوها الصغير داخل دكان سيد..وسيد جراهو من يدو ونتقو لبرة الدكان وقال ليهو ماعندي اي بسكويت ابيعو ليكم واوعي تجو هنا...

توسل جرت ووقفت ليهو في وشو لامن سيد رجع واتخبط بالرفوف..

توسل:اسمع ياسيد تلفون واحد وبجيب ليك ناس الصحة والمواصفات والمقايس هنا..بضاعتك نصها مدتا منتهيه..وغير كدة الفار طالع من شوال السكر داخل جوة شوال الرز..والصرارير شدة ماكتيرة ماتفرزا من البلح الخاتيهو في القفه دة....

وطاخ طاخ خبطت اخوها الصغير..ودنقرت عليهو قالت ليهو ..الدكان دة بمرضك بجيب ليك الطاعون وبسممك..وبسكويتو معتت زي ريحة الكركار القديم...

وساقت اخوها وبقت ماشه طجق طجق طجق.

هههههه ياخ منظر سيد دة يوصفو كيف...شفتو الزول لما يفتح قناة طبيخ في التلفزيون ويبحلق في المحمر والمشمر ويبلع ريقو بس ياهو سيد دة...ماعارف لتوسل دي اي رد ..طار من راسو...

سيد بعد جهد جهيد قال. كنت عايز اعرسك يسمك..

توسل:اتلفتت وقالت أهييييييي وااااي منو انت....ياخ ماتخاف الله ..اعرس لي زول ضميرو مدفون... ومندوب شمارات حروم الحله...وحات الله مرمطت بي الارض...خجلتني مع نفسي. خُجُلوت خُجُلوت...وضحكت ودخلت...

سيد:الله يضرك يااللسان زي مكنة النشارة ...الله يضرك ردحتي فيني زي الاعلانات المصريه....جُب عليك ياالصفرا زي اليرقان....وحات الله كلب نّفٓسيه مازيك..

هههههههههههههه عاد ياسيد لابطيقك لابحمل بلاك..الوداك تهبش جحر الكلب شنوووو?...

نشوف ناريز بقت كيف...

ناريز قامت زي الحصان اتاري....ولبست للجامعه وطلعت ولاقت منصور..وقعدت اتفقت معاهو علي الزواج...اها اغنعا انو اقرب وقت يجي يتقدم...خلاص ارح معاي لامي لانو المرة الفاتت غلطنا وهم كانو ماف وسالوني منك ووووو وبتاع ..

طيب مدام سالوك منها مايتصلو بيها. ياوهم انت....

ولا اقول ليكم ناريز غيرت راي من الوهم  دة...الحمارة دي تااااني قامت مشت مع الذئب دة...

واها اتفقت ترجع طوالي عشان الكدرو بعيدة..

دخلت البيت وكالعادة فاضي..طوالي مشت ع باب الشارع منصور جرا ورجعا...اقيفي نيزو روحي..اناعارفك ماحتجي معاي الا كدة..انا خلاص حاتزوجك خليك معاي صريحة انا زوجك حاكون تعالي نتفاهم كدة جوة...ماتخافي مني كلها مسالة شهر وناس امي يجو من السعوديه مشو زيارة لاختي..وبجيبو معاهم الشيله والريحة والمصاصه والشبس واللبان والشوكلاته.والحلاوة ....ودخلت نيزو لمخبأ الاوجاع مرة اخري...

اها نيزو دي بقت معتاد ماشه جايه ع الكدرو...

وموحي جاب عمال قسمو ليهو الجزء الحيتزوج فيهو وشغالين فيهو...

وكل بعد كم يوم ناريز متحججه المظاهرات المواصلات الشرح..وووووو..

يتبع