هٓووّسّ ألبٓنّوُت..!!

(29)

نانا رجعت بيتا ..لكن كارهة ام درمان وكارهة الحله كلها.....

يوم قاعدة تسرح في شعر امها وتتونس معاها..وقفت عربيه جمب بيتم وتييييت دقت بوري..نانا اتصنتت الصوت.وسمعت الباب دق دق دق..

لبست التوب ومشت فتحت الباب لقت في مرة ومعاها بنات قدر نانا في العمر..شايلين حلاوة وبارد..

دخلو وقعدو جم ام نانا..ونانا جابت ليهم العصير..

وبعد تعارف اتضح انو المرة هي ام العسكري الساعد نانا ..والبنات اخواتو...

المرة شرحت لنانا انو ولدا عايز يتزوجا ..واتكلمو واتفقو علي انو نانا ترد ليهم وادوها ارقام تلفوناتم....

نانا بعدها بكم يوم استشارت نيروز وناريز وامها واخواتا ووافقت..لانو الولد ادب واحترام...

توسل بهناك اتزوجت سلمان وسكنت في شقه في الفيحاء...وسلمي عايشه مبسوطة وبعد فترة حتسافر لسامر...وكل يومين يجيها فتحي يبكي ويتندم ويتأسف....

نانا وافقت بالعريس..واتخطبت ليهوو..

وناريز الايام ماشه وبطنها بدت تتكور بس ماف زول بشوفا اصلا لانها مابتطلع ..واذا طلعت للجامعه بتطلع بحزر...

ونيروز اتغيرت شديد وبقت تخاف من اي حاجه..حتي الكريمات الكانت مهووسه بيها خلتا وكرهتا بس بقت مع اختها وجوة البيت...

منصور اصلا ماجاب سيرة ناريز..عشان ماتبقي ليهو القضيه قضيتين...وأتحبس خلاص وامرو انتهي..

محي جهز خلاص لعرسو..وسلوان محبوسه للطلح والفسخ للعرس...وكل يومين تطلع مع محي السوق تشتري عفش ومستلزمات الشيله..والبيت اكتمل وتم كل شي فيهو وحددو العرس بعد شهر..

ناريز بقت شايله هم زحمة العرس وانو الناس حتكشفا وحتعرف..امها نهائي مالاحظت تغيرات في ناريز ..ياراقدة في الراكوبه تتونس مع جاراتا البجوها...أو لافه عند الجيران..أو مشغوله بعرس محي...

نسرين خطبوها لعلاء القرر يجي يحضر عرس محي ويعقد علي نسرين ويسافر بعدها يسفروها ليهو...

ناريز شايله هم ووشها بقي اسود وكل يوم تبكي باليل لحد ماالدنيا تصبح...متحسرة انها حتولد طفل وتتخلي عنو..وانو ابوهو قاتل ومحبوس..وانو امها وابوها واخوانا مخدوعين فيها...مرات تقرر الانتحار وترتاح..بس بتقول انا مااعالج الغلط بالغلط..لازم اتوب واستغفر واكفر عن سيئاتي...

مرت الايام وناريز دخلت في الشهر التاسع وبقت مرهقه..وطوالي لابسه توب في كتافا مطبقاهو علي اتنين وبتغطي بيهو جسمها ..واصلا ماظاهر انها حامل الا من أرهاقا..ووشها المختوف...مابتطلع من غرفتا ولما تسألا امها مالك تقول الامتحانات قربت والقرايه والتعب...
اها تمر الايام وكل يشكي همه ووجعه...
عرس محي باقي ليهو خمستاشر يوم والاهل قربو يجو من البلد..ناريز خافت وماعارفه تتصرف كيف...

جاتا نانا ولقتم هي ونيروز متحيرين..

نانا:وي عليكم وشكم مالو مختوف كدة...انا يابنات بطلع من مشكله وبقع في مشكله وبخلي الامور لالله وماقعد أتعب كتير....

ناريز:شايفة الوضع انا خايفه والله...

نيروز:ماعارفين نتصرف كيف خلاص راسنا طشت..

نانا:خلاص ارح ياناريز اقعدي معاي في البيت...وقولي لامك مع زحمة العرس ماقادرة تقري..وامتحاناتك الجايه دي صعبه وكدة..ولازم جو هادي..واليلا اغنعيهم كلهم..قبل خالاتك والاهل والعمات يتلمو..

ناريز اغنعت اهلها انها تمشي لنانا والامتحانات ووو...وافقو ليها بعد جهد من نيروز وناريز...

ناريز لمت هدوما ومشت بيت نانا..وقعدت تبكي لانها في وضع احسن منو الموت...

نانا واقفه معاها ومهتميه بيها..

ناريز راقدة وتبكي وتتحسر علي امها وابوها ووضعها..جاها اتصال من رقم..ردت..

ناريز:الوو..

منصور:ناريز الو..

ناريز:ااااااااااااااخ...اااااااه.....ليه عملت كده ليه انت مفتري ومجرم كدة...

منصور:ببكي بحرقه..ياناريز ماتزيدي علي ..انا تعبان ومحكوم علي اعدام...عايز اشيل منك العفو امكن عفوك يمحي سيئة فيني..اهل مؤيد طلبو القصاص..وانا حاتعدم..اسمعيني ياناريز..انا حكيت لامي واخواتي الحاصل وقلت ليهم شيلو جناي من ناريز وسجلوهو باسمي وربوهو..وبدون اهلك يعرفو او اي زول يعرف....اتمني اني اقدر اعقد عليك واصلح الفات..ومنصور يبكي وناريز تبكي...

منصور:ناريز ماتهملي الجنين وتضيعيهو ..خليهو لامي واخواتي زكري مني..انا عايزك تعفيني وتدعي لي ..ايوة انا كنت مفتري وأذيتك وخدعتك وقسيت عليكي...بس سامحيني ياناريز..اهلي بجو يسلمو عليكي ويقفو معاكي ماتخافي...انا اديتم رقمك....

ناريز بكت بكت لامن ضاق بيها الكون وبدت تتوجع ..

وجع المخاض بقي يجيها كل شويه وتتألم داخله ومارقه..ومنصور كل شويه يتصل عليها..ويتكلم معاها ويبكي لحد ماناريز تقفل الخط لانها متضايقه ومتعذبه...

نانا اتصلت علي نيروز وكلمتا انو ناريز احتمال تولد...اتصرفي تعالي باي طريقه..

نيروز كلمت امها انها ماشه تجيب فستان...طلعت مشو لنانا..

منصور رسل ليهم اخوهو الكبير ووصفو ليهو باسرع وقت وصل ووقف جمب بيت نانا وراقبو الوضع وطلعت ناريز وركبت ونيروز ونانا...

مشو الكدرو للسيدة المسنه ودخلو ..والمرة فحصت بطن ناريز...

السيدة:الله يحلك يابتي بطنك فاصله من فوق خلاص حسي حتلدي بس ابقي قويه واصبري...

ناريز:اعفي لي ياخاله..انا وعدتك اديكي جناي..بس اهلو قالو عايزنو...

السيدة:المهم اتحلي بالسلامه كلو هين يابتي...

يتبع...