هٓووّسّ ألبٓنّوُت..!!

(25)

تمر الايام بحلوها ومرها ...

توسل ممتحنه وكان سليمان معلما السواقه..توسل سايقه عربية سليمان وكانت معاها فترة الامتحانات ..مقرشاها جمب الباب تلمع اكتر من الحي...وسيد دة يطلع كل ثانيه يعاين العربيه ويخش ..وينقنق ويطنطن...حسي البت الصفرا دي العاجبا شنو في الراجل العجيز دة...

توسل طلعت وكانت لابسه ومعاها اخوانا الصغار..لقت سيد مقهي في العربيه..وقفت وربعت يديها وعاينت لسيد😏..

توسل:خير ياسيد رايح ليك شي بجاي...

سيد:عدل طاقيتو وبلع ريقو وواتلفت ماشي علي الدكان...

توسل:شفت ياسيد حقي لاحقك لاحقك..بدعي عليك في كل ركعه وسجدة.حسي شوف دكانك دة فاضي كيف ..رفوفو عدمانه العافيه زي دولاب المطلقه...وكل الحله خلتك ومشت دكاكين الظلط..وبقي احسن ليها المسافه من وشك الفقر دة...فاحسن ليك تبعد وتشيلنا من راسك لانو انا حاضاعف عليك الدعا...ياخ خاف ربك عندك بنات...

سيد:هوي ياالمطلوقه انتي فوتي من هنا ..الله يشيل وسخكن الفي الحله دة..العربيه دي هي المطفرة ذبايني..بيتكم بقي واجهة شبهه لي دكاني...

توسل:تمام ياسيد الرحول ببقي حقك انت الليله من الحي دة...

توسل ركبت العربيه وطوالي اتجهت علي مكتب المحليه ووجهت شكوة بانو سيد دكانو وسخان ملان فيران وصراصير..وموادو مدتا منتهيه..وببيع باسعار باهظة ...

جات المحليه راجعت الدكان لقت الحشرات في التوابل والزيت والرز والدقيق..ولقت الفيران جاي وجاي النوع الجقر الكبير داك...طوالي صادرو منو منتجاتو وشمعو الدكان وكتبو عليهو كدة❎❌🚫ازااااله....

سيد واقف يربط في عفشو والحريم وشفع الحي ورجالو.. متلمين حوليهو..توسل جات.ومشت علي سيد...

توسل:شايفين كلكم ....شايفين...الحق ينتصر والباطل مهزوم...انا استعنت بربنا...وذي ماظلمتني ربنا انتقم منك..انت وحريم الحي ديل ماخليتو فينا راحة نفس ولا حال..بشعتو بينا وانتهكتو اعراضنا...ربنا سخر لينا انسان يسندنا ويسند ابوي..وانتو عملتوهو انسان سيئ بجينا لاسباب....الرزق من ربنا وربنا سخر لابوي سلمان..سلمان شغل ابوي وشال من عاتقو كتير...وانتوووووو كلكم فهمكم وسخان وماف زول بقول كلمة حق...وحسي اسمعو كلكم...حسبي الله في اي واحد فيكم كان زي سيد او سمع لسيد او زاد في كلام سيد تلقوهو في نحوركم حسبي الله ..دعوتي دي من هنا للسما تدمدم عليكم ياظالمين...

الحريم ديل اطاقشو وجرو جري كل وحدة بتفتش بابا بوين...سيد دة بكا بطول حسو...

توسل بكت بدموعا ودخلت وسدت الباب..

دايما نهاية الظالم مؤسفه..وكل زول بعمل الشر مابحاسب افعالو بلقي الاقوي منو....

سلمي اتوظفت محاسبه في صيدليه وماشاءالله الراتب عااالي ومبسوووطه...
شبه نست فتحي كدة وبقت مصدر اعجاب لكل المترددين في الصيدليه بتتعامل بصدق وبشاشه كدة مع الناس البتجي للعلاج ...يعني الماعندو بتقول ليهو لو عندك تعال بكرة جيبا وبتكتب في ورقه والمابرجع بتسدها من راتبا...والناس المسنه وعمرها كبير بتعاملو كانو طفل..بحنيه كدة تتونس معاهو وتتفائل ليهو الشفا وتحاسبو بفهم وحدة وحدة تحسب معاهو....ياسلاااام...

ياخ في ناس كدة في الصيدليه زي المضروب بشبشب في وشو بديك نهرة ومابتعامل معاك بادب..سبحان الله تنفر من نظراتو وتمرض ذيادة من تعاملو...

في حجه كبيرة كدة كل مرة تجي تشيل علاجات لبتها ..اعجبت بسلمي دي شديد...وبقت صحبتا شديد وتتونس معاها لحد ماتطلع ..مرة المرة قالت ليها بتي كل مرة بحكي ليها عنك..وقالت لي يمة بس جيبي لي صوره منها فارجوكي اخد صورة معاكي عشان تشوفك..بتي مابتقدر تطلع وانتي زمنك مابسمح..سلمي وافقت واتصورت معاها...

المرة مشت رسلت الصورة لولدا الفي الامارات وورتو انها دي البت البتحكي ليهو عنها..رد ليها ..ليكي الحق يمه تمعطيني بيها كل مكالمة..انا جاي وطوالي بعرسا بس احجزيها سرعه..شوفيها يمه قالداك كيف وكانك امها..الولد دة فرح فرح شديد بسلمي وبرائتا...والمرة شويه شويه مهدت لسلمي وطلبت منها العفو انها رسلت الصورة لولدا الاسمو سامر..بس كان لخير...سامر جا وعقد علي سلمي وسافر يجهز ورقا...الله اكبررر..

نانا ياناااانا...اها نجي لنانا...

حودة دة جنا جنون من بعاد نانا...مابترد عليهو وحظرتو في اي موقع تواصل...بقي مامركز لنسمة واطفالو وزهجان ويفتش المشاكل من ماف ...

نسمة عرفت انو نانا معذبه حودة ببعادا ومراقبه الواتس في تلفونا وتلفون حودة..لقت حودة دة بترجاها رجا ترد عليهو...

حودة مااتحمل وركب الركشه ومشي دقا باب نانا..وسبحان الله صفيه دي شافتم بس كمرات ناشنول جغرفي البتكون حتي في ضنب السمك ديك...شافت حودة بدق الباب ونانا طلعت ليهو ..وقفت صفيه بعيد وختت التوب ورا اضانا ووقفت وقفة طابور انتباه...

نانا:الجابك شنو ياحودة انا زهجت منك ومن اي زول زيك...خليني في حالي...

حودة:ارح معاي حسي بعقد عليكي في المحكمه..

نانا:هي هي ..وضربتو باصابعا كدة في كتفو..انت قايلني صخله ولا نعجه..وانا ماالبشلب راجل من مرة واعرسو كدة..ان كنت بطلع معاك ..عشان انا كنت ماواعيه وحسي وعيت..وانا وعدت نسمة ابعد منك...

حودة:نسمه????نسمة قالت ليك شنو..

نانا:مابعرف يلا عن اذنك وطاااخ قفلت الباب...

حودة دة ركب الركشه والنار طالعه من اضانو..

صفيه بلاهي حصلت بيتا قبل الركشه كيف وبتين الله اعلم..وقفت وجبك جبك لصقت اضانا في حيطة ناس حودة...

حودة دخل البيت وشال نسمة من شعرا واشتغل فيها خبيط والشفع يبكو وحودة شغال ضرب...ونسمة تردح زي انزار الخطر...وتشتم ونسب في حودة وفي اهلو...حودة ده لما شاف الشفع متجرسين طلع خلاهم...

نسمة لملمت شعرا المنكش ومسكت شفعا وقالت ليهم خلاص ماف شي كنا بنلعب لعبة المصارعه ...الشفع عاينو لامهم وسكتو...

نسمة قالت قسما يانانا الا اطفشك بكرة من الحله دي ومايلقو خبرك...

يتبع