نحبك قولهالي

الحلقة الثامنة والثلاثون

ريهام : باهي وين ماشي ؟

عيسى : مادخلكش

ريهام : انت رافعني بدون رضاي ومنه ماتبيش تقولي هلبااا هكي

عيسى : حتى اناا هلبا عليا

ريهام : شن اللي هلبا عليك

عيسى شبحلها : نشوفك تبكي

ريهام سكتت و وجهها لا تعرفوه احمر ولا ازرق وتمنت ماتكلمتش اصلا ولا كرسي السيارة يتصكر عليها اي شي ينقذها من الموقف اللي حطت فيه روحها وهي تحت انظاره . .

عيسى : ماشيين ل مكان تحبيه

ريهام شبحتله ومافهمتش عليه ، هي عندها مليون مكان تحبه مش بس واحد و هو امتا عرف مكانها المفضل اللي ماتعرفاش هي بحد ذاتها

ماحبتش ترد عليه بالك يكمل كلامه لكن عيسى كان واخدها ل مكان مش متأكد انها تحبه لكن هو عارف انها جوها ح يتغير غادي رغم انه مكان عادي والكل يمشوله . .

ريهام : طريق البحر هادي !

عيسى ضحك : عارفها

ريهام : من قالك نحب البحر

عيسى : ومن مايحباش

ريهام شافتله ببرود : انا مانحباش

كان مش حاطة حزام الامان كانت ضربت ف مرش السيارة من قوة ال فرين . .

عيسى : والله ؟

ريهام : اههه لا لا نبصر . .

عيسى شبحلها و كمل طريقه : معش تبصري

رغم انها تكره البحر وتخاف منه لكن لما شافت ردة فعله ماحبتش تحرجه او تدلع عليه لانه طلعها بهدف يغيرلها جوها وهي مش ناوية تقعد معاه فترة طويلة وكل مرة يحطلها كلمة تخليها تتخزرط و تتعقد . .

لما وصلو كان المكان عادي مفيش شي مميز وعائلات شوي هنا وشباب غادي لكن الشط مش زحمة تبي تستفر شن اللي يغير النفسية لكن هو خدي يدها ووصل بيها ل جرف بروحه   وعالي شوي ، استغربت وهيا راكبة شن المميز ! لكن لما ضربتها النسمة القوية وفيها ريحة البحر فهمت ليش جابها هنا و لما شافت منظر البحر حست نفسها استرخت .

قعدت مقعمزة تصفي ف ذهنها والنسمة تضرب ف وجهها وبسمة خفيفة ع زاوية فمها ، هو بس يشبحلها وغارق يتأمل فيها، لما شافها مستريحة عرف انه ماغلطش وجابها للمكان الصح وهو ف الاول كان مش عارف وين يرفعها ، مع هدا كله هي ماقتلاش ليش كانت مضايقة .

بين مافرح كانت واتية وريهام ماجتهاش هي تعفلقت ومشت للحوش وتخبط ف الباب ع قوة جهدها ، يفتحلها عمر .

فرح : اختك وييين

عمر : وعليكم السلام ورحمة الله وبركاته

فرح شبحتله ع جنب وخشت : ي ريهااام

ناجية : العفو ي بنيتي خيرك