نحبك قولهالي

الحلقة الخامسة عشر

ريهام : اصبري . . اااه هديكا رحمة اللي مع فرح ههههه انا نحكي ع اختها ههههه تلخبطت بينهم
ناجية : تقصدي اختها هكي
ريهام : اي اعوذ بالله منهاا
ناجية : صوابع يدك مش زي بعض عادي مش ضروري تطلع زيها
ريهام : اي مقتلكش زيها
ناجية : صار باهي طلعت مش هيا وانتي درتيلنا الطار خوك تنرفز منك
ريهام : توا هو يبيها ولا عاجباته دوة الناس عليها
ناجية : واللهي وخيك ماقدرت نفهمه المهم يسأل عليها
ريهام : تو نكلمه بعدين
ناجية : كلمت اسامة حقا يسلم عليك هو و بشرى
ريهام : سلمه شن مزالو
ناجية : مزال ي بنت خيرك
ريهام : ههههه
ناجية : بنمشي ندير حاجة شبحتها ف فتافيت عجبتني
ريهام : حارة ولا حلوة
ناجية : لا لا وجبة حارة
ريهام : احسبيني

ماكملتش جملتها الا وكان احمد خش ومد راسه من الباب
احمد : هومي
ريهام ضحكت : عيونها هههه
احمد جي بحداها ويشبحلها : انا خليتك تمرضي ولا
ريهام : اللطف . . شن دخلك انت
احمد : انا معدلتش وماشفتكش
ريهام : هههه لا حمودة وين بتندري عليا مريضة ولا ميتة
احمد : وكان جيت شفتك كان احسن ع الاقل
ريهام : بتنفخهم انت . . باهي علاش ماجيتش شفت وخيتك
احمد : حسبته مواضيع بنات وهكي
ريهام : مصحك هههههه
احمد : المهم انتي هنا
ريهام : اي هنا
احمد : قولي شن جبتلك ترا . .
ريهام : اممم . . بكلاوة ؟
احمد : كيف عرفتي
ريهام : شن بيجيبلي حمودة غير البكلاوة ههههه
احمد : ايح
ريهام : المهم منبيش توا شبعانة حطها ف الثلاجة
احمد : من شنو شبعانه
ريهام : ايمن رفعني للكافتيريا فطرت وخدالي حاجات ف الطريق
احمد : كذااابه . . شن خدالك
ريهام : كريب ومعاه عصير طازج وبعدين جابلي كنافة ومعاها شكلاطة وقاعد فوق ف الكيسة فيه

احمد يشبحلها وساكت . .

ريهام : هههه خيرك
احمد : يماا
ريهام : شن تبي ف ماما ؟
احمد : يماا
ناجية : نعم ي وليدي
احمد : وبعدين قوليلي علاش نتخاصم انا وياها
ناجية : خير شن في
ريهام : مافيه شي
احمد : توا حكم ايمن كلت الي جابهولها كله وماقالتش احيه وين انا جبتلها قالت منبيش

ناجية قعدت تشبح لولدها باستخفاف وريهام تضحك

ناجية : سلمك لامك ي وليدي سلمك لامك
ريهام : هههههههههه
احمد : شن سلمني علاش . . شوفيها تضحك
ريهام : هههه بنضحك بالك مش عاجبك
احمد : مش عاجبني
ريهام : كتر ربي الحيوط
احمد : قالولك انا حمار زيك اي حيط يواتي نخبط راسي
ناجية : هههههه اصكت ي احمد امش لدارك

ريهام شبحت ل امها ب 'وقفي ضحك '
ريهام : منبيش ناكل من البكلاوة اقعد
احمد ومتكنطي : متاكليش
ناجية : هاتو جاي نطلعها ل ايمن وصحابه بعدين . . وانتم معمركم تتناقشو ع حاجة الا وتتعاركو فيها . .
ريهام : ي ملا حاالة وخلاص هههههه

فاتو ساعتين من الوقت واحمد قاعد متكنطي من ريهام ومايبيش يعدل عليها وهي تضحك وخلاص لانها عارفة طبعه ، حياة تخمم تتصل بيها ولا مرات ادير معاها مشكلة ففاتت الموضوع لين تواتي الايام اما فرح ضميرها يأنب فيها انه فيه حاجة غلط ويمكن امها تاخد وتحط من عندها ومعرفتش بأنه ريهام كانت مريضة