نحبك قولهالي

الحلقة الثانية والأربعون

فرح صكرت الباب واتكت عليه بينما ريهام تشبحلها ومش فاهمة حاجة ، لما شبحت ل ريهام ادكرت هيا علاش جت وضحكت .

ريهام : تحصنا بالله . . شن فيك ؟

فرح : احم لا شي . . . انا سمعت انه . . .

كانت ح تقول اسم عيسى لكن جتها فكرة ف بالها خلتها تسكت و ضحكت تاني .

فرح : احم . . جاية بنقولك موضوع

ريهام : موضوع . . ؟

فرح : فيه خاطب . . و استنت ردة فعل ريهام

ريهام : حي حبيبتي مش م . . مهلا مهلا . . مش تبي خوي انتي ؟

فرح استغربت : اي وبه ؟

ريهام : شن وبه ! قوليله لا ي آنسة شن غيرلك رايك ؟

فرح : هههه نسيت نوضح حاجة ، الخاطب مش ليا

ريهام : امم بيخطب أميمة ؟

فرح : لا

ريهام : امالا منو انا مثلا هههه

لما شافت ريهام لصاحبتها وهي تهز ف راسها موافقة سكتت وناضت مصدومة .

ريهام : انتي تبصري . . !!

فرح : لا

ريهام : شن متوقعة مني نوافق . . راهو من توا مستحيل

فرح ناضت تلعب ف الدور : وعلاش ؟ ريهام شوفيلي وقوليلي علاش ؟

ريهام : لاني مانبيش كلهم كيف بعضهم انا مانبيش افهمي

فرح : تحبيه ولا ؟ مازلتي تحبيه ي غبية وهو مش معدل عليك ولا متذكرك ! قوليلي ايه ولا لا ؟

ريهام : اي ايه مازلت نحبه ومعش ح نحب بعده ماتكلمينيش .

فرح داسة ضحكتها : وهو ؟ يحبک ؟

ريهام شافتلها وسكتت ، فعلا ، هدا اللي كانت تفكر فيه هل مزال يحبها بعد ستة شهور ؟ وقبل ماتتخيل أي شي قالتلها فرح خبر خلاها دموعها يوقفو ع رموشها .

فرح : امالا نبشرك ي اختي حبيبتي ، انه توا خاااطب ، مش انتي ي ريهام ، بنت تانية !

حتى فرح كانت ح تبكي لانها قست ع صاحبتها بس كل اللي ادير فيه يستحق كل شي ، شافت ريهام قعمزت بالشوية وهي تشبح قدامها لكن شوية وسألتها :

من قالك ؟

فرح : مالك .

هزت ريهام راسها ومشت للحمام وصكرت الباب وراها ، مما خلا فرح تفهم انه وجودها ماليشي اي معنى وطلعت ، تذكرت خطتها اللي غيرتها ومشت تضحك ادور ف أحمد لكن التصفيرة وقفتها وخلتها تشوف لصاحبها .

أيمن : وين ماتعدليش علينا

فرح : مش فاضية

أيمن قام حواجبه : امم امالا لمنو فاضية ؟