نحبك قولهالي

الحلقة الأربعون

قلبت على رد ف بالها ومالقتش ، بحثت ع ناجية مالقتهاش ، لما شافتله لقاته يستنى فيها و مش قادر يصبر حبت تحرقله دمه .

فرح : مفيش سبب يخليني نتكلم معاك

أيمن : لا فيه يعني تعالي واسكتي

فرح : تحسابني فرخة تقولي اسكتي نسكت !

أيمن : ماجاب حد سيرة المفرخ لكن كانك شاكة انك فرخة معناتا فرخة

فرح : تحشم على وجهك ، انت تكلم ف بنت مش خوك احمد ولا عمر

أيمن : لا حول الله غير نقولك هالكلمتين واقلبي وجهك معش نبيك

فرح : حسِّن اسلوبك قبل

أيمن : فضلا وليس امرا ممكن دقيقتين من وقتك

فرح شبحتله شوية وبعدين طلعت ، أيمن شاف ل دار ريهام شوية وطلع .

فرح : ها ي استاذ شن فيه

أيمن : ي اسلوب انتي

فرح تحشمت و سكتت لكن مافاتش وقت الا و أيمن بدي يتكلم

أيمن : هو سؤال بس ، قوليلي اللي تعرفيه كله عن ريهام !؟

فرح : كله كله ؟

أيمن : هههه اي كله كله

وبدت فرح تقص عليه ف الحكاية من الاول للاخر ، بدت ب الكلية و لقطة المحاضرة وعن عيد ميلادها و ف البيان والبنت يلي وقفت عليها وكذلك السبب اللي سيباته ريهام عشانه وصولا الى تفاصيل صغيرة كانت هي ملاحظتها .

خدي أيمن وقت وهو يستوعب ويفهم ف اللي صار وقعد يفكر ، سبب سخيف كان من ريهام .

أيمن : يعني ريهام كانت ولازالت ت. . .

فرح كملت عنه : تحبه

لما شافلها وجت العين ف العين جاه شعور انها تقصد نفسها لكن فيسع ماغير رايه وحمحم وهو يكمل ف كلامه .

أيمن : ليا نقاش مع اختي . .

فرح : لا تناقشها لا تقربها قصدي مزال فيه اوضح من هكي ! كلم الولد وفكنا من التشحيط

أيمن وهو مصدوم : باهي اعصابك شن قلنا ؟.

فرح : لا شي ، لكن نا نقولك لو تختصر الوقت وتفهم عيسى خيرلك .

أيمن يشوفلها ويحاول يقرا تعابير وجهها : ل اي درجة تحبي ريهام !

فرح تبسمت : نحبها اكثر من نفسي ، تنهدت وكملت : لو طلبت روحي فداها .

نظره ماتحولش عن وجهها وهو يقرا فيه ، فعلا ! لو انها طلبت الروح ح تعطيهالها ، ابتسم لا ارادياً وهو يفكر ف طيبتها اللي لاحظها ف كدا موقف ، نسي نفسه و حفظ كل حاجة فيها .

أيمن : و نفسي تحبك اكثر من نفسها .

فرح : نعم ؟ ماسمعتكش