نحبك قولهالي

الحلقة التاسعة والثلاثون

- نفضل لو تحطو اغنية هادية وانتو تقرو عشان الحلقة كلها مشاعر - 🌸

كدا من المرات نحسو ب فراغ كبير ف نفوسنا و مانبوش السبب و يبدا مضايقنا و مخرب ع نفسيتنا و شايل علينا ثقل كبير مهما نحاولو و نجربو نتخلصو منه مانقدروش ، وحنا ف النهاية نعرفو السبب عشان انه الفراغ هدا ب ذاته شخص . . شخص كان مالي حياتنا هو ف كف و العالم ف كف واول م خلاك حسيت انه العالم والناس اللي فيه مايسوو ولا شي . .

من بعد فسخ الخطوبة بين عيسى و ريهام الكل مشي ف طريقه و معش دورو بعض رغم انه كل واحد فيهم شاغل تفكيره الطرف الاخر ، عيسى مانعه كبرياءه اللي جرحاته ريهام بكل برادة و سيباته بدون تبرير رغم انه بررت بكل وضوح انها ماتحباش ، ريهام متحشمة و خايفة من ردة فعله لو تكلمه ويرفضها لانها فاهمة كويس شن اللي داراته ، والاتنين فاهمين ع انه لو واحد منهم يحب التاني مش ح يتأخر يكلمه .

بعد ٥ شهور كانت ايام عيسى مملة و عارف ف نفسه انها استاحشها و كان يلقى يرجعلها و يفوت الفرقة اللي خلت حياته مرة عليه لكن هي قتله انها ماتحباش . . لذلك خدي اول طيارة ل تركيا و حاليا يقرا البرا  ع باله يمكن هم القراية والطموح ينسيه فيها.

ريهام كانت كذلك همها هم القراية و مش مدورة ولا حركة او نشاط اجتماعي ، غير فرح اللي تمشي وتجي عليها و فرح عارفة انها غارقة عقل و قلب ف عيسى .

فرح : هههه اسمعي انا طالعة توا تجي امي توريني

ريهام : ههه اي خفي روحك

فرح : باي

نزلت فرح و هي مضايقة مش عارفة شن ادير و يوقفها صوت أيمن .

أيمن : ي فرح

فرح : نعم

أيمن : شن جوها ؟ .  . و أشر ب عيونه ع دار ريهام

فرح : عادي ككل يوم لا هي فرحانة ولا زعلانة

أيمن : اممم باهي

و جاي ب يمشي ناداته فرح تاني وهو تلفتلها يستنى فيها تحكي .

فرح تعقدت : عيسى . . ا . .

أيمن : خيره ؟

فرح : كلمه بالله عليك هو مش فاهم انه ريهام تح . .

قاطعها أيمن : لا مانكلماش ! هي رفضاته وتم اما نقوله ارجعلها نذله علاش !

فرح عصبت : مفيش مذلة ف الحب ! علاش ماتبيش تفهم لو بنحسبو لكل حاجة واسمها باقي حتى الناس معش يحبو !

أيمن يشوفلها : علاش انتي شن تعرفي ع الحب ؟

فرح انصدمت و رجعت تشوفله : اللي ماتعرفاش انت !

وفاتت من بحداه و هي قريب تبكي وطلعت صكرت الباب بقوة ، مع صوت الباب أيمن غمض عيونه : شن تقصد ب " اللي ماتعرفاش انت " شن الحاجة اللي تعرفها فرح وهو م يعرفهاش ؟! .