إغتصاب معلن

الجزء 31

مروة جاتني طايرة قالت لي وووب وووب ديل منو البرا ديل ؟

قلت ليها انتي الرجعك شنو مش مشيتي بيتكم ؟

اي مشيت و نسيت المحفظه في سريرك يا ابلة بعد ركبتا ما عرفت احاسب من وين لو ما ولد حلال كان جهجهني ، كتر خيرو والله وصلني لحد الشارع اصريت عليهو ينتظرني اجي اشيل قروش واحاسبو رفض ،،

سجمك طيب كلمتي محمد انك رجعتي تاني ؟ قالت لي ي بت والله محمد بقا م بيسالني من يعرفني معاكم ...

* خلاص يلا يدك معاي ي مروة

_يدي شنو انا يدي ولا بتجي جمبك عايزة اكشف للمز البرا داا

*ياخ اديكي كدا في وشك دااا ، رصي الكبابي دي في الصينيه الدهبيه

_هرشتيني والله يا سوسو دا جزاي بدل تشوفي عريس لي صحبتك

*ياخ هسس ، كم نفر البرا ديل ؟

_تقريباً 5او 6 بي خالك

*طيب امي طلعت ليهم ؟

ّ_اي

*يلا عايني انا حأديكي وانتي قدمي مش دا الانتي دايراهو لعل وعسى يعاين فيكي 😛

_كلبة انتي والله محبطة ياخ ، زحي كداا

*ههههه بهزر معاكي والله خلاص انا آسفه

، اسمعي سامرين دي صانه كدااا حمشي اشوفا والبس بالمرة ، اسي كدا كل حاجه جاهزة لو مترددة بنقدم سوا سوا تمام ..

_ سمح منتطراكي ..

مشيت جهزتاا ، و كلمت سامرين ، طبعا سامرين دي قاعده في البيت زي الما قاعده في عالم تاني ، هاديه شديد حياتا دي بين الكتب والابتوب مخها براهووو كداا ، ي بختهااا .. المهم لبسنا و طلعت علي المطبخ لقيت الصواني مافي ، عرفت مروة بتكون شالتهم ، قلت ل سامرين يلا نطلع قالت لي يلا ومشت قدامي ما عندها اي فرامل ،،

دخلنا ، سلمنا من بعيد الا خالو سلمنا عليهو ومشينا قعدنا ، عمو عبدالله قالي :

ازيك يا سلوان ، سلوان صح ؟

قلت ليهو ايوة يا عمو انا بخير حمدلله كيفك و كيف صحتك ،، قالي بخير حمدلله ...

اتكلمو كتير و الونسه م كانت زي م متخيلاها بالجد ضحك و هزار م حسيت انحنا قاعدين مع ناس من جيل مختلف ولا كانت في القيود ديك ، كنت مبسوطة بس لحد ما عم عبدالله قال كلام انا هنا ملامحي كلها اتغيرت ،

قالي انه انا و امكم اتفقنا انكم تجو تعيشو في بيتي مع اسرتي و هناك بيتي حيكون مريح ليكم ان شاءالله ...

انا زعلت شديد دا بيتنا من فتحنا عليهوو وكيف امي ممكن تقبل بحاجه زي كدا وحسب كلامو انه عنده اولاد ، والله اعلم بناتو حيتقبلونا ولالا ،، بس م حسستهم بكداا و انتظرتهم لمن مشوو .. حتي م سالتها قلت افضل اتكلم معاها في وقت تاني ..

رتبنا امورنا كلها و روقنا البيت ، طبعاً حددو بعد اسبوع بكونو عقدوو ..

لحد الساعه 11 كدا و 12 جات منتظرة حسام ما كلمني ولا اتصل علي ، زعلت شديد بس حسيت بفراغ ، بالجد فقدتو ، نمت وانا زعلانه و ما متأكدة اذا قالي حرجع ليكي بعدين ولالا ... نمت

صحيت جهزته و لبسته رغم اني عارفه امي ممكن ترفض اطلع ، لحد ما مروة صحت انا كنت جاهزة ، قلت ليها قومي اجهزي ، قالت لي انتي ماشه ؟

قلت ليها ايوة محتاجة اطلع من البيت و عايزة طريقه الاقي بيها وليد بصراحه يا مروة راسي جايط شديد م عارفه اسوي شنوو ،، قالت لي بسم الله لحد امبارح بليل كنتي مبسوطه و بتضحكي ، قلت ليها شوفي برغم ان كلام عم عبدالله دا ضايقني انه نمشي نسكن في بيتو دا صعب ممكن يفتح لينا باب مشاكل انحنا في غنى عنها لكن حاسه انه فرصه كويسه لي ابعد من الحله دي و من الناس ديل و ما مجبرة اتزوج وليد ، و اعتقد ان دا كان قصد امي وقت قالت لي حنمشي من الحله دي .. قالت لي هو حل لكن كلام سعاد و اصراره داا ما عادي و يا سلوان ايلاف دي يدها مليانه و ناويه علي شر ، لكن انا الليله عندي فهم في راسي و حعرف بطريقتي النشر الخبر دا في حلتكم دي منوو ، قلت ليها مافي داعي ماخو اتنشر و خلاص ،، بتكلم كداا ، حسام دخل لي باتصال ،والله لمن قمت ناطه من الفرحه زي المضيعة حاجة ولقيتا ، قلت لمروة امشي الحمام قومي قومي ياخ بسرعه ، قالت لي قولي لي يا مروة امشي اطلعي براا عديل لكن م تصرفيني كدا هههه ،، قلت ليها حيفصل طيب ممكن تطلعي ،، قالت لي ايامك لو حسام دا بخليكي تضحكي كداا بجيبو اربطو ليك هنااا هههه ،،

رديت عليهو ..

*صباح الخير

_صباح النور يا الما بتسألي من الناس

*انا ولا انت !

_لا انتي يا استاذة كان ما اتصلتا انتي ما بتتصلي ..

*كدي حسام ، صوتك دا ما ياهوو في شنو

_والله م حكذب عليكي واقوليكي عشان ياداب صاحي لاني اصلا م نمته

*خير في شنو انت كويس ؟

_ممكن نفطر مع بعض ولا ما ممكن ، اترجاكي يعني يا سلوان ؟

*اوكي قدامي عشر دقايق واكون في المطعم بتاع المرة الفاتت

_كذااابه بتهظري صح ، طوالي كدااا م مصدق والله شوفي انا مستعد اجيكي بي ترينقي دا يلاااا انا قايم .

* ههههه طيب يلا ...

طوالي شلتا شنطتي و قمتا ، و بدعي ان امي م تحميني الطلعه ، طلعت لقيت مروة و سامرين بشربو في الشاي ، اشرت لي مروة ان امي وين ؟

قالت لي بصوت عالي دييييك ليها في المطبخ ، ياخ غاظتني غيطه ، سامرين قالت لي مالك بتتلبدي كدا زي الحراميه امي طلعت المحل من بدري و من هناك حتمشي علي السوق علي الساعه 3 قالت نلاقيها ،،

جيت خبطت مروة في راسهاا قلت ليها صبرك ، قلت لسامرين انا عندي مشوار م بتاخر ان شاءالله ، مروة خليكي معاها لمن ارجع طيب ،، قالت لي خلاص انا سكنت هنا يا حليلك يا امي .... قلت ليها ي ريت نشيلك جوه عيونا ، قالت لي ماشاءالله علي اساس من اسي شايلني جوة غيونكم وقبل شويه لابعاني ، قلت ليها كذابه ضربتك ، هوي انا طالعه يلا سلااااام ....

ركبت من الشارع ، امجاد براي ، و وصفت ليهو المحل ...

يتبع ......