إغتصاب معلن

الجزء 03

الليله ووووووب ، الليلة ووووووووب

يا امي وووووووب يا امي يا امي نقبل وين وتقول يا منو يا امي وووووب ...

_مالك يا بت بتندبي و تلطمي كدا زي الميت ليك زول في شنو مالك اصلك من جيتي داخله البيت دا وشك قالب و مصفر و ما عاجباني كلو كلووو ...

*ابوي يا امي ، ابووووووووووووي يا وجع قلبي عليك يا غالي والله يا امي ماقادرة اتحرك خايفه

_ابووك ! ابوك مالو يا بت اتكلمي !

*اتخيلي يا امي اتصل علي واحد غريب من تلفون ابوي ، وقال لي انو ابوي عمل حادث يا امييييييي

_ووووب علي سجمي سجمي سجمي

*قومي البسي توبك

_ووواي واااي واااي ...

فعلاً طلعنا ما عارفين علي وين ، بس اللهم طلعنا واخدنا لينا امجاد ، اتصلت علي تلفون ابوي لعل وعسى الزول داك يرد يفهمنا حاجة انا من الخلعه قبيل قفلت و ما سألتو عن اي حاجة .. جرسين تلاته حتى رد علي راجل عجوز من خلال صوتو ما الراجل الكلمني اول مرة داك ،،. اتكلمت معاهو و اداني العنوان ،، كلمت بتاع الامجاد بالمكان ، وامي دي طول السكة تولول و تلطم و تكورك لمن وصلنا مكان الحادث ، دنيا وعالمين الناس ملمومة ، نزلنا من العربيه انا رجليني دي دايرة اليجرها لي ، نزلت و بقيت واقفه في مكاني و امي دي جرت دخلت في نص الناس ،، و فجاه فكت الصرخه ، في اللحظة دي بقيت ما قادرة اتحرك بالجد ، انتو عارفين احساس ابوك روحك مافي مافي وصف ممكن اقولو ليكم احساس انتو عارفنو كويس يعني شنو ابو ، حتي لو لاقدر الله كان انسان قاسي او بضربك او بشاكلك او بنق فيك ، ف النهايه بيفضل ابوك مستحيل تشوفو متأذي و ما تتأثر ، و انا حمدلله ابوي نعم الاب و نعم الرجولة يعني ما دايرة اقول ليكم بحبو اكتر من امي ، بس انا لقيت الحنية بزياده فيهوو ،، و علي فكرة انا ما جبت ليكم سيرة عن اخ ولا اخت لي ، انا عندي سامرين اختي الاصغر مني عمرها 24 سنة ( حتعرفوها قدام ) و سامر 30 سنة مغترب سعوديه برضو بيشتغل مع خطيبي ،، المهم دا كلو حتعرفو ..

المهم بقيت شايفة الناس قدامي مهزوزة زي الفي زول ماسك راسي و بيهزو لي ، و ديك عربية الاسعاف واقفه قدامي ، و كوارك امي معجزني اكتر ،، لقيت نفسي ماشه علي الناس و شايفه مرة كدا في عمر امي معاها راجل عجوز ماسكين امي بيقولو ليها يت حجة قولي لا إله الا الله ، استغفري ربك

انا هنا م حسيت بنفسي الا وانا جاريه و بدافر في الناس ، لممن فجاة لقيت روحي واقفه و تحت رجولي ابوي ممد علي الارض و مغطينو بي قطعه بيضا و الدم حولينو في كل مكان ، والله ما كوركتا ولا بكيت ، بس بركتا في الارض و صوت امي والناس فجاه حسيتو بقا م مسموع ،

مديت يدي علي الغطا دايرة افتح وشو ، واحد من المسعغين قالي خلاص وشو اتقفل ، قلت ليهو يعني شنو ؟