إغتصاب معلن

الجزء 32

م عارفة ليه لمن يكون الموضوع فيهو حسام انا بتصرف تصرفات ما بفهمااا ، عكس شخصيتي ، عادي اعمل حاجات و ما احسب ليها حساب ، طول الطريق انا متوترة ..ّ

اتصل علي انا كنت لسه ما وصلتا ، رديت قلت ليهو ، وصلتا انت ؟ قالي ايوة و م لقيتك واسي رجعتا البيت ،، قلت ليهو ههههه كان راكب صاروخ ما عارفه و بعدين انت حترجع علي الصيدليه ما علي البيت ، قالي والله حرجع علي البيت لاني جاي بي ترينق البيت ، قلت ليهو احلف ، قالي والله و ما تضحكي فيني ، في سري قلت ليهو والله كان لبست شوال حتكون حلاتك .. قلت ليهو اضحك ليه عادي الناس بتمشي بيها ارقى الاماكن، المهم اقفل انا قربتا ، قالي لا خليكي معاي لمن توصلي ، قلت ليهوو تمام ، طيب ، و ساكتين في المسافه الصغيرة دي ..

لمن وصلتااا ، اتفاجأتا بيهو واقف منتظرني علي الشارع ، حاسب بتاع الامجاد ، نزلت سلمت عليهوو ،، و دخلنا المطعم ، ياخ سبحان الله لمن نتكلم في التلفون ، بنتساخف مع بعض و بنكون ماخدين راحتنا عكس لمن نتلاقى ،، المهم قعدنا في نفس الطاوله الفاتت ، قالي ها نطلب طوالي ؟ قلت ليهو عادي ، قالي ناكل اول عشان نتونس واحنا شبعانين كدا ههههه ، قلت ليهو سمح اها وما تسالني اكل شنو عليك الله عشان انا م عندي قشه مرة ،،، قالي والله كنت حسألك تاكلي شنو بس سبقتيني مفتحه لكن ، عاينت ليهو شديد كداا و هو بيعاين في المنيو ، قلت ليهو انا شفت شخصيتك الجادة ديك والصارمة يعني م قادرة استوعب تخلي شغلك و تجي تضيع زمنك معاي ،، قالي الحياة بتخلص والشغل م بيخلص و بعدين دي صيدليتي بمشي واجي فيها وقت م عايز وصُهيب م مقصر فيها ،، طلب لينا و فضل ساكت يعايني فيني .. قالت ليهو : * مالك ؟

_ولا شي بعاين بس ما اعاين !

*عاين بس صراحه انا في حاجات محتاجه افهما منك شخصياً ، يعني مثلاً صوتك و انك م نايم ، حاصل شنوو ؟

_م حاصل شي يا سلوان بس اختلاف مع اخوي ومع الوالد في موضوع كدا و حتي عمتي الربتني واقفين كلهم ضدي ، يمكن عشان متعود يسمعو كلامي ف اي قرار واني الزول العاقل داك ، بس و ارق ساي يعني ..

*عموما كداا مرات مجبرين نتتازل يعني زي ما قالو ، ان لو اتنين قالوليك اضانك مافي ، اهبشااا .. و انت حاول تعاين للموضوع من منظورهم هماا يمكن رؤيتك تختلف يمكن تقدر تشوف الجانب المضيئ ..

_ م مزعوج للدرجة دي بس فعلا كلامك صح

*طيب م نفسك تسألني سؤال كدا !

_امممممم لا

*متأكد ؟

_برضو لا ، بس م كل الاسئله يجوز اسألك ليها يمكن تكون شخصيه او انتي م حابة تحكي فا انا ما بقدر اجبرك صراحه او تجاوبي وانتي مرغمة .

*م عارفه بس انا متأكدة اننا بنتكلم عن نفس الحاجه يا حسام الفي بالك في بالي ، بس عشان التعامل بينا يبقي مريح ..