#حكم_إعدام2
بقلم.....شيماء عثمان
ياسمين من لما رجعت زنزانتها وهي بتبكي ...... منال كانت بتناديها من وراء الباب ... يابت ياسمين مالك ...أستاذه مي قالت ليك شنو الليله تبكي كده ..
ردت عليها رانيا من زنزانتها ...ياخالتو منال شنو المابخلينا نبكي عليك الله خليها تبكي ساي ..... قعدت ياسمين تبكي لحد ما غلبها النعاس ونامت ... قريب الفجر صحت مفزوعه على كابوس وبقت تصرخ بطريقه هستيريه وتقول لا يامروااااان .... ابعد عني .. يامروان لا .... منال و رانيا صحو على صوتها وبقو ينادوها لكن هي لسا بتصرخ .... جو السجانات فتحو باب الزنزانه ودخلو.... كانو بحاولو يثبتوها لكن هي كانت بتصرخ وتضرب الحيطه بيدينها .... لحد ما أغمي عليها ....شالوها أخدوها عياده السجن أدوها ابره مهدئه و ركبو ليها درب .... الدكتوره زعلت و هاجت في السجانات ... قالت ليهم البت دي فاقده كتير وعندها تايفويد ليها كم ما أكلت وكيف تخلوها لحد ما تصل الحاله دي ....
في الصباح ....مي أول ما جات سألت عنها ..... وعرفت أنها مرقده في العياده مشت شافتها لقتها نايمه .... وسالت الدكتوره من حالتها ....
لما رجعت لقت فارس منتظرها في المكتب ...
مي : مشيت شفت ياسمين قالو تعبت امبارح
فارس : مين ياسمين
مي : ياخ المحكومه الكنا بنتكلم عنها أمبارح
فارس : ايوا صح .... اديني ملفها .
ناولتو الملف و رفعت السماعه للمساعدة طلبت ليهم قهوة......ساعه وفارس بقرا في الملف .... يمسك الصفحه يقراها كلها وتاني يرجع يقراها من الاول .... بعد ماخلص صر وشو وقال لمي .... دا شنو الكلام الفاضي دا
مي : مالك في شنو
فارس : القضيه دي ناقصه وفيها ملابسات كتيره ... و مليانه ثغرات ، كيف القاضي يحكم من أول جلسه .... لازم يتعمل نقض للحكم وأستئناف بسرعه
مي : بس البت رافضه الكلام و أمبارح تعبت لما أدوها أبره مهدئه
فارس : اقنعيها بأي طريقه توكل محامي وتعمل أستئناف و إلا الحكم حينفذ
مي : خلاص بشوف اقدر اعمل شنو
فارس : انا ماشي هسي و اطلعيني على المستجدات
قعدت ياسمين اليوم داك كلو في العياده ..... مارجعوها الزنزانه إلا بالمسا .... جات السجانه ومعاها صينيه أكل قالت ليها ماعايزه أكل ..... السجانه قالت ليها ما على كيفك تاكلي غصبا عنك امبارح الدكتوره بهدلتنا بسبب حضرتك ...... أكلتها بالغصب وطلعت .
كوركت ليها منال ..... ياسمين يابت ..... ردت عليها ودي كانت اول مره تتكلم معاها ..
أيوا ياخالتو....... أنتي هسي كيف ....... الحمدلله ...... رانيا مدت راسها من الفتحه حقه الباب ومسكت القضبان ... أخيرا اتكلمت معانا...مالك يابت ...
ياسمين : كابوس ماداير ينتهي
رانيا : اصلا حياتنا كلها كوابيس
ياسمين : متين يجو ينفذو الحكم عشان نرتاح
منال : يابتي ختي الرحمن في قلبك .... هي موته وأتكتبت علينا لكن نتصبر
في اليوم التاني طلعت معاهم الفسحه بعد تحانيس كتيره ..... جات واحده من السجانات قالت ليها قومي أستاذه مي عايزاك ..... مشت معاها
دخلت مكتب مي لقتها مجهزه ليها عصير وعلبه شوكلاته ..... قالت ليها الليله عازماك ما بتكسفيني صح ....... ابتسمت ياسمين نص أبتسامه وهزت راسها
مي : أول حاجه نشرب العصير و نروق وأبدي احكي لي
سكتت ونزلت راسها .....
مي : يابت والله البتعملي فيو دا حرام ...ردي علي ياخ
نزلت راسها وقعدت تبكي ....
مي : أستغفر الله .... اعمل معاك شنو طيب انتي عارفه انو لازمك محامي ولازم تعملي أستئناف عشان ماتلقي روحك قاعده تبكي ويجو ينفذو الحكم
رفعت راسها و دموعها ماليه وشها ..... خليهم يجو ينفذوه
سكت مي وبقت تعاين ليها......رفعت صوتها ... ياحضرة الصول تعالي سوقي المسجونه خلصت منها .
أنت تقرأ
حكم إعدام
Romance(شيئان لا تسلم عاقبتهما الظلم والشر) _ علي بن أبي طالب _ . و بين الظلم الظاهر والعدل الخفي خيط رفيع لا يراه إلا أهل القلوب .
