#حكم_إعدام3
بقلم.... شيماء عثمان
فارس انت مجنون ..... خليها ماحتتكلم إلا كده....
رجعوها الزنزانه وهي بتبكي ومنهاره على الاخر .... لحد الصباح حتى راقت شويه .
في اليوم التاني مي نادتها ..... دي الاوراق فارس جهزها ليك أمضي عليها عشان توكليه .. هو عايز يبدا في الاجراءات و زيارتو هنا تكون قانونيه ..... شالت القلم و مضت وهي ساكته...
مي : طالما وقفنا على أول الطريق أحكي لي ...... شكلك لسا ما خلصتي دراسه
رفعت راسها اخدت نفس عميق..... انا مولوده في السعوديه ومتربه فيها كنا بنجي هنا في الاجازات انا الكبيره و ياسر و يمنى أخواني الصغار بابا كان شغال مدير شركه في الرياض اما ماما كانت ربه منزل كنت بدرس هناك طب اسنان وصلت لحد السنه التانيه و قطعت الدراسه ......سكتت شويه .... أستاذه مي ممكن أمشي ...
مي : خلاص مافي مشكله لكن أوعديني بكره نكمل كلامنا
ياسمين : ان شالله
رجعت وماشين على عنبر الاعدام لقت رانيا طالعه الفسحه .... قالت ليها يلا معاي طلعو الاتنين مع بعض .... كانو قاعدين في حوش السجن في الكراسي العباره عن مصاطب أسمنت .... كل واحده ساكته و بتعاين في أتجاه مختلف ...... جات منال و قعدت في نصهم .... نزلت راسها وبقت تبكي بحرقه ..... مسكتهاياسمين وضمتها عليها وبتمسح ليها دموعها .....
رانيا : روقي ياخالتو انتي القويه فينا لو انتي ضعفتي احنا نعمل شنو
بعد مسافه وبعد ما طلعت الفي قلبها كلو ..... اخدت تنهيده طويله وأستغفرت ..
قالت ليهم الليله جابو لي أمي .... شكلهم جابوها تودعني ....خلاص أظن ساعاتي بقت معدوده
رانيا : عليك الله ياخالتو ماتقولي كده احنا برانا مرعوبين
منال : جا عم محمد كمان .... ماقدر يسلم علي عاين لي وطلع
رانيا : مين عم محمد
منال : ابو الزفت داك الله يحرقو في جهنم
ياسمين : مين دا
منال : راجلي
رانيا : حرقتو هو ومرتو الله يحرق الرجال وسيرتهم
ياسمين : ليه كده يا خالتو
منال : يابتي ... انا عرسوني صغيره وسفروني السعوديه طرد كنا في تبوك ... ماولدت بدري قعدت كم سنه اتعالج لحد ماحملت و ربنا رزقني و ولدت محمد ... لما تم سنه ابوه قال لي احسن تمشو السودان وبجيكم في الاجازات ... رجعنا وقلنا نعمل لينا بيت ... صرفت الدهب العندي كلو اشترينا الارض ... كان برسل وانا ابني واقفه مع العمال زي الراجل اشرف عليهم في الشمس الحاره ديل لحد الليل... الوقت داك الحته كانت مقطوعه بجي راجعه البيت المغرب يدي في قلبي ... لحد مابنيت البيت طوبه طوبه .. لما شطبتو استقريت فيه انا و ولدي و الراجل قاعد في السعوديه ... عدد المرات الجا الشاف فيها ولدو تتعد بالاصابع ...انا زهجت من قعده البيت بقيت شغاله خبايز و الشغل ماشي عال العال ....محمد ولدي كبر وبقى عمرو 13 سنه ...وكل مره اقول لابوه تعال شوف ولدك و لا رسل لينا نجيك ماشغال بينا خالص حتى مرات يقفل تلفونو بالايام ... لكن يوم ضرب قال جاي نهائي فرحت وجهزت البيت ومشيت الكوفير وديك يا الحنه والدخان .... ولدي داير يطير من الفرحه ...عمرو ما كان عندو ابو زي الاولاد ولا عرف يعني شنو حنان الاب ...المهم جا وياريتو ماجا ... سايق معاه مره و طفلين ... قال لي دي مرتي و ديل أولادي .... بقيت أكورك زي المجنونه .... قال لي عايزاني اقعد الوقت دا كلو بدون مره قلت ليه وانا ماكنت صابره و قاعده رد علي و انتي مالك كمان ناقصك شنو كل شهر بتستلمي قروشك وساكنه في بيت عمرك ماتحلمي تسكني فيه ...هو كان فاكر احتياجاتي قروش بس ماعارف الليالي كانت بتمر علي طويله وانا براي محتاجه شويه حنان واهتمام انا مابشر برضو وعندي مشاعر .... هجت فيه قلت ليه البيت دا بنيتو بعرقي عاين لي عين حقاره قال لي بقروشي ... وهسي جيت مع مرتي و اولادي نقعد فيه .... في البدايه رفضت لكن تاني سكت وقعدنا سوا ....شال عفشي انا و ولدي قعدنا في غرفه صغيرة في الحوش كنت عاملاها للخدم ... مرتو قالت مادايراني في وشها و استلمو البيت على حسابهم..... بقيناكل يوم مشاكل مرتو تكذب ليه و هو يصدق ...وصلت الامور لحد ماضربني وطلقني رجعت بيت ابوي تاني .... ولدي ما استحمل الحصل تعب شديد ماخليت دكتور ما اخدتو ليه في النهايه قالو عندو سرطان في المخ و محتاج عمليه ... مشيت لابوه قال لي كذابه .... دي لعبه من الاعيبك ..شلت الورق عشان يتأكد طردني وبقيت من مستشفى لمستشفي والعلاج غالي ماقدرت اوفر ليه كل العلاجات .... الولد تعب وحالتو اتدهورت ومات في يدي ....ابوه يوم العزا جا زي الضيف و مشى ...... انا من موته محمد ماشفت يوم حلو ....فراق ولدي حاااار ... كنت بمشي كل يوم جنب البيت اشوفهم داخلين طالعين يتضاحكو في بيتي البنيتو بسنين عمري الضاعت وانا منتظراه ...ماسك اولادو يشيلهم و يبوسهم و انا جناي الماعندي غيرو بقى تحت التراب .....المغصه قتلتني ....و دخلت البيت بالليل وهم نايمين ... اصلا المفتاح عندي ...شلت الاولاد نايمين طلعتهم في الغرفه البرا قلبي ما طاوعني أأذيهم ... غرقت البيت بنزين وحرقتو هو ومرتو ..... لما شفت النار ولعت فيه حتى ارتحت .. حرقتو زي ماحرق حشاي و ضيع شبابي زي ماحرق قلبي في ولدي ..... وسلمت نفسي ..و أصلي ما ندمانه وكان الزمن رجع بي برضو بحرقو تاني ..
ياسمين حضنتها وقالت ليها كل ظالم وليه يوم .....ربك كريم ...
رجعو زنزانتهم وكل واحده شايله همها وشايله هم التانيه .
ولنا لقاء أخر .......
أنت تقرأ
حكم إعدام
Romance(شيئان لا تسلم عاقبتهما الظلم والشر) _ علي بن أبي طالب _ . و بين الظلم الظاهر والعدل الخفي خيط رفيع لا يراه إلا أهل القلوب .
