#حكم_إعدام1
بقلم...شيماء عثمان
_ إتحركو يابنات أنتو فاكرين روحكم في فندق .......
_ يابت أنتي وأياها بطلو مياصه وأتحركو سريع .....
_ خلاص ياخ ماتزهجينا نجري ولا نطلع فوق بعض ......
_ بطلي لماضه يا إنعام قبل ما أرجعك المنفرده تاني ...
_ خلاص سكتنا ....
_يلا ياعلويه كلهم دخلو طلعي مسجونات عنبر الاعدام للفسحه.....
في عنبر الإعدام....
_ بت يا ياسمين ما تمرقي معانا الليله من جابوك و أنتي ما بتطلعي من زنزانتك
_ أنتي ما زهجتي منها ياخالتو منال البت دي من جات وهي مابتطلع معانا
_ منال ...رانيا .....أتحركو يلا
_ جينا حضرة الصول
_ وين البت الجديدة
_ برضو أبت تطلع الليله
ياسمين كانت في زنزانتها قاعده في الركن ضامه رجلينها عليها وخاته يدها في راسها و عيونها على الارض سرحانه وشارده ... أيام وهي على الحال دا لا شراب لا نوم لا أكل بس قاعده و دمعتها على خدها ومافي على لسانها إلا( يارب أغفر لي) .
في مكتب الباحثه الاجتماعيه ......
مي كانت بتشتغل وتكتب في التقارير عن المسجونات جات المساعدة حقتها داخله ....
المساعدة : أستاذه مي عايزين الامضاء حقك على الملفات دي عشان نرسلها لمدير السجن
مي : الملفات دي خالصه
المساعدة : ايوا .... خلصتها وبتقاريرها ..
مي : طيب هاتي ..... وبدت توقع....... داشنو الملف دا ناقص
المساعدة : في شنو يا أستاذه
مي : الملف دا مافيه تقرير وأصلا أول مره اشوفو
المساعدة : بأسم منو
مي : بأسم ياسمين حسن عبدالكريم ...ومحكومه إعدام .... نادي لي المشرفه على العنبر
مشت المساعدة وندهت للمشرفه نور ...
نور : أستاذه مي انتي طلبتيني
مي : الملف رقم 210 أول مره أشوفو كيف يترسل لمدير السجن بدون تقرير
نور : دا ملف المحكومه إعدام ...أصلا القضيه خلصانه تتعبي روحك وتعملي تقرير ليه
مي : دا ما شغلك يا أستاذه
نور : ياخ دي واحده قتلت راجلها عشان تهرب مع عشيقها ...تعملي ليها شنو
مي : للمره التانيه اقول ليك ماشغلك ..... وأطلعو انتو الاتنين خلوني أدرس الملف.
بعد ساعه رجعو المحكومات من الفسحه............منال دقت الباب لياسمين ..
منال : هسي لو طلعتي معانا شميتي ليك حبه هوا مش كان احسن من حالتك دي ...مستعجله على حبسه القبر مالك
رانيا : مالك علينا ياخالتو خلينا ننسى شويه
منال : دا الشي المابتنسي وكان أحنا نسينا كوابيسنا بتصحينا
الصول علويه جات عليهم.... أجيب قهوة ونقعد كلنا نتونس هنا ....ما تتحركو
منال : أسفين ياحضره الصول ...خلاص دخلنا
الصول علويه : ياسمين ...يابت ...انا بتكلم معاك ...قومي تعالي
ياسمين رفعت راسها وقامت أتحركت على الباب وقفت ورا فتحه الباب الصغيره وبصوت واطي منكسر ..... نعم
الصول علويه : ليه ما أكلتي الصينيه زي ماهي
ياسمين : ما عايزه
الصول علويه : يابتي مابنفع كده لازم تاكلي شويه عشان
ياسمين قاطعتها .....عشان ما أموت ...عاينت ليها ونزلت راسها رجعت الركن تاني .
أنت تقرأ
حكم إعدام
Romance(شيئان لا تسلم عاقبتهما الظلم والشر) _ علي بن أبي طالب _ . و بين الظلم الظاهر والعدل الخفي خيط رفيع لا يراه إلا أهل القلوب .
