حكم إعدام

حكم إعدام 11

#حكم_إعدام11
بقلم ..... شيماء عثمان

ياسمين........لما فقت لقيت خالتو نفيسه جنبي وبتبكي .......
عاينت لي بحزن .... وقالت ... واجعاني يابتي وما قادره اساعدك .... سامحيني ... مسكت يدها وقلت ليها ولايهمك ....... العرفتو ان مروان مشى بيت ناس هاني و اتضارب معاه لما اهلو أتدخلو و جابو الشرطه ....... طبعا منعني اطلع البلكونه خالص .
بعد الحصل دا بأسبوعين خالتو نفسيه أتضايقت هي اصلا عندها الازمه مشيت جبت ليها البخاخ طلع شبه مخلص بخت بخه واحده بس لسه تعبانه ... البت الحبشيه كانت مؤجزه قالت لي أمشي الصيدليه الفي الزلط جيبي لي واحد خفت وقلت ليها لكن مروان ... قالت لي انا تعبانه شديد...... المهم لبست عبايتي وطلعت سريع ... لما فتحت باب الشارع لقيت هاني واقف جنب عمود النور القدام بيتهم ..... اول ما شافني ابتسم واتحرك بأتجاهي ... ارتبكت وبقيت امشي بسرعه .... هو سرع خطاه وحصلني جراني من يدي قال لي دقيقه عايز اتكلم معاك .... قلت ليه ماتعمل لي مشاكل و امشي ..... قال مابخليك الا اعرف اسمك منو التفت عليه ... ياسمين يلا ابعد قبل مروان يجي ... صر وجهو قال لي دراكولا دا ببقى ليك شنو .....سكت ودخلت الصيدليه ... هو كان واقف برا أشتريت الدوا وطلعت ..... لقيتو لسا مستني قال لي ما رديتي انت قريبه حجه نفيسه
مشيت وهو لسا ماشي وراي قلت ليه يا ابن الناس امشي انا ما ناقصاك والله .... وبقيت امشي بسرعه لحد ما قربت على البيت جراني من يدي و قال ماممكن ياخ اتكلمي معاي مروان ببقى ليك شنو جريت يدي منو بقوة وقلت ليه ياخ مروان زوجي ابعد عن طريقي نطط عيونو وبقى يعاين لي ..... في اللحظه دي مروان جا وقف السيارة و طلع يكورك .. جريت دخلت البيت هو كان بتشاكل مع هاني مشيت لخالتو نفيسه قلت ليها الحقيني مروان حيقتلني ......قالت لي اطلعي غرفتك سريع ..... وانا طالعه السلم جا داخل جرا طلع وراي مسكني من شعري و رماني من فوق السلم وبقى يضرب فيني برجلو في وجهي وبطني وظهري ...خالتو نفيسه كانت بتحاول تمنعو رمت نفسها علي و قالت ليه اضربنا سوا ..... هو طلع من البيت هايج ...... وخالتو كانت بتحاول تقومني فجأة حسيت بألم شديد في بطني وبقيت اصرخ من الوجع خالتو بقت تقول لي دا شنو انتي بتنزفي يا بت ..... وبقت تكورك .... ضربت لمروان لكن مارد .....و انا المغص كان بقطعني ماعرفت تعمل لي شنو ضربت لجارتنا راجلها دكتور جو وأصرو ياخدوني المستشفى هناك أتضح اني كنت حامل و انا ماعارفه و اليوم داك أجهضت .... الدكتورة كانت مصره تعمل أورنيك8 لكن الدكتور جارنا أترجاها عشان خاطر خالتو نفسيه مسكتو من رجلو وقالت ليه مروان وحيدي مادايره أخسرو ......
قعدت في المستشفى اسبوع ...... وطلعت وانا راجعه البيت وداخله شايفه هاني جنب باب بيتهم بعاين لي ........ بعد يومين جات البت الحبشيه جابت لي كيس فيه علبه قالت لي بت الجيران قالت دي حاجاتك ..... استغربت وشلت الكيس لما فتحت العلبه كان فيها تلفون .....بعد شويه التلفون ضرب ...... رديت قال لي انا هاني و ارجوك خلي التلفون دا معاك عشان نقدر نتواصل مع بعض...... شلت التلفون وطلعت غرفتي خبيتو
و دي كانت غلطه عمري ........