#حكم_إعدام18
بقلم ..... شيماء عثمان
فارس : ....... ياسمين .....
سلوى : مين ياسمين
فارس : البت الجبتوها من السعوديه انتي و مروان
سلوى : ابو وش محروق ... كنت عارفه الموضوع دا فيو هوا
فارس : احكي لي الحصل بالتفصيل
سلوى: و أضمن كيف حتساعدني بعدها
فارس : انتي مافي وضع يسمح بالمفاوضه
سلوى : طيب خلاص ........
انا اتعرفت على مروان عند مدام جيجي .... هو كان بجي طوالي هناك .... بشرب وبتعاطى .... ماعندو شغله بالبنات كتير ....هم زاتهم ما بطيقوه عشان اخلاقو الزفت و بقرفو من شكلو كمان ........ انا شغلتي الاساسيه بظبط الترابيز ( تربيزه القمار) لما اقعد بجي يتونس معاي .... في يوم جا قال لي عندو موضوع و عايزني اساعدو ... قال في واحد موظف حكومي اسمو حسين عبدالكريم عايز يوقعو و خت لي كميه من القروش .... انا رسلت ليه بت شاطره قدرت توقعو في شباكها و جابتو الشقه و صورناه فيديو كم مره من غير مايشعر..... مروان شال السي دي و بقى يهددو يفضحو وينشر الفيدوهات على الفيس واليوتيوب ..... الزول خاف على سمعتو خصوصا انو موظف في وزارة كبيره ومتزوج ... كان طلب مروان بالمقابل انو يعقد ليه على بت اخوه ياسمين طبعا ... عمها في البدايه رفض واتردد مروان نشر جزء من فيديو وشو ما ظاهر فيه حسين خاف من الفضيحه و وافق .... جبنا مأذون و فهمناه انو البت و ابوها في السعوديه ودا عمها عايزين نقعد بس بتاريخ قديم عشان مروان عايزها لشغلو و العلاوه الزوجيه وقلنا ليه لازم يتكتب ابوها الوكيل طبعا عشان ياسمين تقع في الفخ وتصدق اديناه مبلغ محترم الراجل ماصدق وكتب العقد .طلبنا من حسين صور لياسمين كنا عايزين نفبركهم مع صور مروان لكن جلينا الفكرة بس الصور نفعونا في اقناعها.. مروان عمل لي زياره للسعوديه ومشيت . وهناك اوهمناها بالعقد و جبناها هنا .... هو قال عايز يعقد عليها و يطلقها عشان افترت عليه و احتقرتو عشان شكلو بس الحصل هنا انا ما وافقت عليه و طردتو من بيتي ....
فارس كان بعاين ليها بأشمئزاز و قرفان منها ...... للدرجه دي البشر رخيصين في نظركم
.... المهم عايز عنوان الدايه الجبتيها عالجتها في اليوم داك
سلوى : شوف خالتي رقيه ما عندها ذنب وهي زعلانه مني ... ما تسبب ليها مشاكل
فارس : عايز اعرف منها كم حاجه بس مافي مشاكل .... و تانيا حسين عم ياسمين وين
سلوى : سمعت انو طلب نقل لبورتسودان بس ما متاكده
شال منها عنوان رقيه و جاي طالع
سلوى : بتطلعني متين
فارس عاين ليها من فوق لتحت .... اطلعك عشان تأذي ناس زياده على العموم انا راجل كلمتي واحده وقلت ليك بساعدك اخفف ليك المده ومابرجع عن كلمتي .
اليوم داك كان متضايق جدا من السمعو حتى انو ضرب لخالتو بلغها انو عندو شغل و طلب منها تخلي ريفال تبيت معاهم ...... كان قاعد في شارع النيل لحد ما الشمس طلعت زهجان و مابفكر الا في ياسمين و الحصل ليها ......
في اليوم التاني بعد ماخلص شغل بالمسا مشى بيت خالتو يشوف بنتو لقى محاسن هايجه مع مي و بتكورك بأعلى صوتها.....
محاسن : يعني تقولي لي ما عايزه محمد احنا بنلعب
مي : افتكر دي حياتي و انا مامجبوره اتزوج واحد ما عايزه
محاسن : ما كنتي موافقه منو الغير رايك
مي : امي انا واحده كبيره و مافي زول ممكن يأثر في قراراتي
لما جا فارس داخل ...... يا اخوانا ما كده في شنو يا خالتي ...
محاسن : كلو منك لعبت براسها خليتها ترفض العريس عايزها تقعد كده لما تعنس ... مليت راسها بأفكارك و فلسفتك بدال ما تشجعها تعرس و تتستر تشوف نصيبها
مي : امي فارس ما عندو ذنب و انا وافقت على محمد في لحظه غضب و هسي راجعت نفسي
فارس كان واقف ساكت بعاين في خالتو ..... خلاها لما خلصت كلامها كلو وطلعت الفي قلبها .... مسكها من يدها و قعدها في الكرسي ...
فارس : مش انتي عايزه بتك تتزوج وتعيش مبسوطه
عاينت ليه بطرف عينها .....اااي
فارس : خلاص جهزي نفسك يوم الجمعه خطوبتها
هي و مي بصوت واحد ....شنو
فارس : في واحد خطبها مني وانا سألت عنو و مافيه كلمه وهي موافقه عليه و طالما انتي عايزه تفرحي ببتك مافي مانع نفرح قلوبكم
محاسن : دا منو كمان ... وليه ما جاب اهلو خطبها من بيت ابوها طلب يدها منك في المحمكه يعني
فارس : هو كان جاي وكلمني امبارح بس انا كنت مشغول و انتي عارفه ... تانيا من هسي يكون عندك علم الزول دا عندو ظروف خاصه و اهلو مابقدرو يجو معاه
محاسن : نعم
فارس : يا خالتي انتي عايزه سعادة بتك و لا حاجه تانيه باركيها خلي المراكب تسير
لوت خشمها و قالت ليهم .... اعملو العايزنو بس بعدين ما تجو تشتكو لي .... و قامت دخلت غرفتها وقفلت الباب ...
مي : ليه كده تحرجني هسي ايمن قال ليك جاي يعمل خطوبه
فارس : يعني انا عايز ادبسك و السلام ... الزول دا لما جاني في المكتب طلبك رسمي و قال مستعد يتزوجك طوالي وبعدين انا ما كذبت هو فعلا امبارح ضرب لي عشان نحدد يوم يجي البيت ..... اخيرا حنتخلص منك ياخ كنت خايف ريفال تعرس و انتي لسا بايره
مي : ياخ كل ما اقول خلاص حبيتك تكرهني فيك ..... سغيل ...
و قعدو يضحكو مع بعض ..... شال ريفال وطلع .
في اليوم التاني في السجن........
مشى شاف ياسمين ......هي كالعاده ملامحها حزينه عينها في الارض وساكته .... سلم عليها و بشرها ان سلوى اتقبض عليها و بدا يحكي ليها عن المعلومات الاخدها منها ..
هي كانت مندهشه .... وبتعاين ليه .... مصدومه من الكلام البتسمعو ..
فارس : طبعا عقد الزواج دا مطعون في أمرو و غير مستوفي الشروط و يعتبر باطل
رفعت راسها و وجهها مليان علامات دهشه و أستفهام ....... يعني انا أعتبر وحده زانيه!!!
عاين ليها بنظره حزينه ..... انتي ضحيه ..... ضحيه مؤامره دنيئه دبرها واحد مختل عقليا ..... ضحيه أغتصاب مبطن ...... انتي ضحيه مجتمع فاسد منزوعه منه الاخلاق و الضمير ..
نزلت راسها غطت وشها بأيديها وقعدت تبكي ...... قام من كرسيه وقرب عليها شال ايديها من وشها ورفع ليها راسها بيدو ..... وفضل يعاين في عيونها المليانه دموع .... و قال ... دموعك الطاهرة دي كفيله أنها تغسل ذنوب الكون كلو .....
وطلع طوالي ماقدر يستحمل منظرها و هي بتتألم ...
هي رجعت عنبر السجن بحاله نفسيه سيئه جدا .... وقعدت تبكي اليوم كله .
فارس اتحرك من السجن ومشى المنطقه الكان ساكن فيها حسين عم ياسمين .... هو كان بفتش عليه من فترة و بمساعده اصدقاءه في الداخليه قدر يوصل للعنوان .... مشى وسأل عنو و عرف انو في بورتسودان .... واتحصل على العنوان هناك .
اتصل على خالتو كلمها انو مسافر لمده يوم وطلب منها تخلي بالها من ريفال .
وسافر طوالي ...... هناك مشى العنوان ..... قابل عم ياسمين .
لنا لقاء أخر.........
أنت تقرأ
حكم إعدام
Romance(شيئان لا تسلم عاقبتهما الظلم والشر) _ علي بن أبي طالب _ . و بين الظلم الظاهر والعدل الخفي خيط رفيع لا يراه إلا أهل القلوب .
