حكم إعدام

حكم إعدام 19

#حكم_إعدام19
بقلم..... شيماء عثمان

فارس قعد مع حسين عم ياسمين و اتكلم معاه .... هو ماكان عارف الحاصل ليها شنو ..... و بدا يتحجج بحجج واهيه و انو خاف من الفضيحه وخاف على سمعتو ... فارس غضب وضرب التربيزه بيدو .... يعني غلطه ارتكبتها انت تتحملها بنت اخوك... بالبساطه دي تتخلى عن دمك وعرضك ...هانت عليك... انت رميتها في زنزانه منتظرة تنفيذ حكم الاعدام ...... حسين نزل راسو و ماعرف يقول حاجه ..... لكن فارس اصر عليه و رجع معاه الخرطوم .

و جا اليوم المحدد لخطوبه مي و أيمن.....

أيمن كان بستعد عشان يمشي يخطب مي رسميا من اهلها ..... نادر صاحبو كلم امو وابوه و شرح ليهم وضع ايمن و طلب منهم يمشو معاهم ....... مي كانت طايره من الفرحه مشت مع صحبتها الكوفير وجات لقت أمها قاعده في الهول صاره وشها ..
محاسن : نشوف زولك دا الماعندو أهل .... اتفقتي انتي و فارس مش ..... عايزين تحرجوني قدام أهل ابوك
مي : يا أمي والله ايمن كويس هو بس عندو ظروف انتي كده افردي وشك الحلو دا و مافي اي احرج مع اعمامي
محاسن : لما يسألوني اهل الولد وين أقول ليهم شنو
مي : فارس قال بحل الموضوع دا انتي ماتشيلي هم وبعدين هو دكتور في مستشفى مشهور و وضعو كويس دايرين شنو تاني
محاسن : اقعدي تابعي لي فارس وتنظيرو هسي محمد ما احسن ليك من دكتورك دا كان ترسلي لي اجي اولدك في قطر
مي ابتسمت.... امي قولي انتي عايزه تسافري بس .....ليك علي السنه الجايه اسفرك الحج مش احسن ..... بعدين قالو ولادة الغربه ما سمحه ... باستها في خدها...... ودخلت غرفتها تضحك في امها .
تلفونها ضرب ... الو
ايمن : سجانتي الحلوه
مي : بطل تقاله دم
ايمن : خلاص مرتي
مي : لسا مابقيت مرتك
ايمن : اها خطيبتي و دي ماتقدري تقولي فيها حاجه عندي أقرار من المحامي شخصيا
قعدت تضحك و من جوا قلبها عايزه تطير من الفرحه
ايمن : ياخ اليوم دا بطيء بطريقه فظيعه متين الساعه تجي 6 ....
وهو بتكلم معاها سمع صوت نادر بنده عليه ..... قال ليها حبيبتي برجع ليك ..
وطلع برا يشوفو ....... لقى أمو وامجد أخوه ......جرى على امو حضنها و قعد يبكي باس راسها و يدها و هي تبكي و حاضناه .... مقعول داير تخطب و انا مامعاك ..
ايمن : ما كنت عايز احرجك مع ابوي
ماجده : ابوك زول دكتاتوري طول عمرو عايز الكل يمشي تحت امرو ... وانا كنت بمشي عشانكم لكن خلاص انتو بقيتو رجال و ما عليكم خوف
ايمن : طيب هو عارف انكم جايين
ماجده : كلمتو وقلت ليه ماشه اخطب لأيمن وطلعت ... امجد جا حصلني
ايمن : عرفتو كيف
امجد : نادر كلمني
ايمن التفت لنادر بأستغراب
نادر : ما هانت علي دموعك امبارح بالليل ....فرحتك كانت ناقصه..... كلمت امجد كلم الخاله وهي جات ما خيبت ظني .
ماجده : انا عندي مين في الدنيا غيركم.... ابوك الله يسامحو قتل فرحتنا
نادر : هسي نفرح ياخالتي ..... امي زغردتي ..
و ام نادر ماصدقت فكت زغروتدين وراء بعض ..... امجد و نادر بقو يبشرو في أيمن .... أبشر يا عريس ....
اتجهزو شالو حاجاتهم و اتحركو على بيت ناس مي ...... هناك كان في أستقبالهم فارس و أعمامها ..... محاسن لما شافت ام أيمن و أم نادر ارتاحت و قبلت بالموضوع ... و الابتسامه ما فارقتها ...
الرجال في الصالون اتعارفو و ابو نادر قال ليهم خلاص نعقد طالما كلنا موجودين ... اعمام مي رحبو بالفكرة .... وأمجد مشى يجيب المأذون ...... فارس دخل كلمهم خلى النسوان يزغردتو ......
ايمن أخد ليه سرقه وضرب لمي ..... مرتي سجانه قلبي
مي : دا شنو يا ايمن انتو بتهظرو ما كنا متفقين عقد
ايمن : اسمعي يابت الكلام دا كلام رجال ما تدخلي
مي : بس
ايمن : بس شنو انتي ما عايزه نكون مع بعض العمر كلو
مي : اكيد عايزه
ايمن : طيب زعلانه ليه
مي : مابحب المفاجأت
ايمن : في مفاجأت حلوه ..... على العموم ألف مبروك علينا السجن المؤبد دا .
وصل المأذون و تمو العقد وسط فرحه الاهل و الزغاريت ......... دخل ايمن سلم على محاسن و امو ..... مي جات طالعه خجلانه و عيونها في الارض .... باسها في راسها و كانت عايزه تطير من الفرحه ....فارس جا بارك على خالتو و بارك ليها.
و انتهت الليله دي على فرح و سعادة وابتسامه في وجه الكل ....

على عكس ليالي السجن البارده و الحزينه ..... الكل هناك بقضي ليلتو مع الدموع .. الندم .... و الذكريات ... و مرات آهات حسرة وظلم .....وجع أشتياق .... أم مشتاقه لضناها ..... بنت مشتاقه لحضن أمها .... و أخت مشتاقه لأخوانها .... كل المخدات هناك بتصبح غرقانه دموع ..... والنوم جافا العيون من زمن ..... خوف من بكرة وخوف من المستقبل ...... خوف على الجاي وخوف من الفات ....... أسوار عاليه مخبيه وراها أوجاع و مأساي ...... وأصوات بكاء مخنوقه ....... مايسمعها إلا الجواها.

في اليوم التاني في السجن ......

ياسمين هدأت شويه من الخبر الصدمها و هزاها اكتر ..... بعد ما مي اتكلمت معاها و وقفو جنبها زميلاتها في العنبر .
كانت قاعده في سريرها سرحانه يدها على خدها وبتفكر ...... أتفتح باب العنبر وجات الصول مريم داخله ..... نادتها ياسمين تعالي .... قامت و مشت عليها .......
الصول مريم : الرساله دي عشانك من رانيا قالت يوصلوها ليك ..... امبارح أعدموها .
ياسمين صرخت بأعلى صوتها لااااااااا رانياااا لااااااا ماتقولي واااااي يا رانيا. .... وقعت على الارض وقعدت تبكي جو فاطمه و رحاب رفعوها وهي لسا بتبكي بصوت عالي و بحرقه خلت العنبر كلو يبكي معاها ......
ساعات وهي قاعده في السرير منزله راسها وبتبكي ...... جات فاطمه قالت ليها... يابتي أستغفري و ادعي ليها دا كلو ما بنفع هي هسي بين أيدين ربها محتاجه دعواتك اكتر من الدموع ........ سكتت شويه قامت اتوضت صلت ركعتين و قعدت تقرأ قرآن على روحها ..... لما خلصت... رجعت سريرها تاني .... شالت الرساله .... فتحتها و قعدت تقرأ ..

📝 ياسمين ..... اكتر بت بريئه شفتها في حياتي النهيتها بيدي لو انتي هسي بتقري في رسالتي معناها انو حصل أمر ربنا و الحكم أتنفذ فيني من لما مشيتي وكلماتك محفوره في راسي ، اعطتني قوة ما كانت عندي زمان ، حسيت انو ربنا بحبني لما عرفني بيك في أخر أيامي عشان اتقوى بيك و أتماسك لأخر نفس و أن شالله يغفر لي على كل العملتو في حياتي ويتقبل توبتي ، بطلب منك طلب بتمنى تقدري تنفذيه عايزاك تمشي لاهلي و تخليهم يسامحوني عشان أكون مرتاحه في قبري وانا واثقه انك حتقدري عندك سحر في كلماتك عجيب .
ياريت لو عرفتك من زمان ماكانت نهايتي تكون كده . بتمنى تطلعي من هنا لانو دا ما مكانك ولايمكن قلب نقي زي قلبك يكون مذنب زينا. حاربي عشان تطلعي من هنا حاربي عشان تعيشي و أياك تيأسي . اطلعي و عيشي الحياة صح كملي تعليمك أتزوجي وحبي جيبي أطفال ربيهم وعلميهم كويس . أبعديهم عن رفاق السوء عن حلم الحريه الزائف الكنا بنحلم بيه . علميهم أن في أخطاء قاتله و في غلطات بتأدي للهاويه . خليهم يشوفو الوجه المظلم قبل الوجه المضيء ... فهميهم أن ما كل البلمع دهب و ياما في أشواك مغلفه بحرير ... قولي ليهم كم واحد ضيع نفسو بسبب نفخه دخان و كأس مسموم أو جرعه زايده . لحظه إنتشاء عابرة تكلفك عمر بحالو . خليهم يعرفو أن الصديق الصح هو البطلعك للنور مش البسحبك للظلام خليك معاهم خطوة بخطوة . و ماتسمعي كلامهم لو طلبو منك الإبتعاد وإنهم خلاص كبرو و مامحتاجين نصيحه . إحنا إنتهينا عشان بعدنا عن ربنا عشان إتكبرنا على نصيحه أهلنا عشان جرينا وراء السراب . أرجوك كفايه الضاع مننا كفايه أجيال تايهه و مشرده . حرام ننجس المجتمع أكتر من كده . ما تخليهم يضيعو زينا و ينتهي مصيرهم في زنزانه موحشه مقفوله بأبواب حديد باردة وقاتله ....

ما تنسيني و ادعي لي بالرحمه دائما .
الامضاء...✒
رفيقه مرحله معتمه في حياتك ...رانيا

ياسمين خلصت الرساله ودموعها أختلطت مع الحبر..... غمضت عينها و الالم بعتصرها من جوا ... أوعدك رانيا لو ربنا طلعني من هنا أمشي لاهلك و اعمل بوصيتك و اريحك في تربتك .

لنا لقاء أخر.......