#حكم_إعدام23
بقلم... شيماء عثمان
ياسمين مغمضه عيونها و من الرهبه بترتعش ..... ضامه كفوفها مع بعض ... صوت نبضات قلبها أتجاوز القفص الحديدي أو ممكن يكون إتخطى جدران القاعه .... بتتنفس بصعوبه ما أعتقد أن أوكسجين الغلاف الجوي كلو يقدر يساعدها في وضعها الحرج ..
فارس قاعد في الكرسي ... متوتر بهز رجلو و بضرب التربيزه بالقلم ..... عيونو شويه على القاضي و شويه على ياسمين نظراتو ملخبطه .... مشاعرو كلها مبعثرة ...
و الدنيا بقت ضيقه .... و محور العالم أصبح في حدود كم متر مربع مسور بجدران جباره هم جدران قاعه المحمكه ...... و أتوقفت الكرة الأرضيه عن الدوران ..... بدخول القاضي ...
محكمه.....🔨
وطلب من ياسمين الوقوف ...
القاضي : بعد المداوله و الاطلاع .... حكمت المحكمه حضوريا على المتهمه ياسمين حسن عبدالكريم بالبراءة من التهم الموجهه إليها و الافراج عنها من سرايا النيابه ... رفعت الجلسه .🔨
و أتعالت الاصوات مع أخر كلمه قالها القاضي بالتهليل والتكبير ....... الله أكبر الله أكبر..
ياسمين وقعت من طولها ماقدرت تقيف الحيل العندها إنتهى ... مسكتها السجانه الجنبها و قعدتها ..... فارس أتخلع و جا جاري عليها و وبصرخ بأسمها ...يااااسمين قومي أطلعي من هنا.... عمرو ما كان مكانك و لا دا مسكنك ...
كانت لسا قاعده و منزله راسها و بترجف و بتردد ( لا أله إلا أنت سبحانك أني كنت من الظالمين ).....رفعت راسها و نظراتها مشتته عاينت لفارس أبتسم ...قال ليها وعدتك ياسمينه زيك حرام تذبل وراء القضبان ودعدتك و ربنا أكرمني و وفيت بالوعد.... أبتسمت و عيونها متلئلئه بالدموع ما معروفه أصلا هي دموع شنو قالت ليه ... أعذرني عشان ما وثقت في كلامك للأخر و كان عندي شويه شك ..... مد يدو من بين القضبان مسك يدها... أطلعي للدنيا أمليها بشذى عطرك الفواح ...... عيونها في عيونو قالت ليه.... انا لو أديتك الكون كلو مايكفي ربع أتعابك ..... بنظرة دافئه قال ليها أتعابي حريتك أتعابي لما أشوفك من غير دموع أتعابي وصلت خلاص بأبتسامتك ياااا الله عندك أروع أبتسامه في الكون قاسي السجن الخطف النور من وجهك وطفى بريق عيونك الأخاذ ....... أبتسمت بخجل و نزلت راسها ...... وسحبت يدها..
جات مي وشافت في عيون فارس لمعه أختفت من سنين ........ قالت ليهم ... أقاطع الفرحه دي و أبارك لياسمين و لا أعتبر ماعندي زوق .... وغمزت لفارس ...... عاين ليها و أبتسم رفع حاجبو و دار وشو الناحيه التانيه .
مي سلمت على ياسمين الكانت لسا دموعها نازله ..... يابتي مشتهيه أشوفك مره بدون دموع ........ جا هاني و منزل راسو .... قولي عني جبان أو ما أهل للثقه أي حاجه بقبلها أنا فعلا جبان وأنتي علمتيني درس في الصمود عمري ما أنساه ........ إبتسمت وقالت ليه .... ما بكن ليك إلا الاحترام و التقدير ...شكرا على كل العملتو معاي حتفضل طول العمر أخ عزيز و مكانتك عندي غاليه .
رفعت راسها شافت عمها من بعيد لما جات عيونهم في بعض نزل عينو طوالي . و طبعا مسكوه عشان يحققو معاه في قضيه العقد المزور ...... أما سلوى فأخدوها رجعوها تاني السجن .... هي شايفاها من بعيد عايزه تنزل عينها لمحت نفيسه أم مروان ..... قاعده منزله راسها و بتبكي .... إلتفتت على فارس قالت ليه نادي لي خالتو نفيسه ..... مشى جابها سندها كانت حالتها صعبه ما قادره تمشي وقفت قدام ياسمين ... قالت ليها أعفي لي يابتي كل الحصل ليك بسبب ولدي ... أعفي لينا على كل دمعه و وجعه إحنا السبب فيها ..... ابتسمت ليها ... ياخالتو من عرفتك و انتي حضن دافي بالنسبه لي عمري ما أنسى حنانك و حنيتك أطمني قلبي من ناحيتك بياض بس أعذريني ما بقدر أسامح مروان طول ما أنا عايشه و أنتظر اليوم البنتلاقى فيه قدام رب العباد و يقتص لي منو في أهلي و في نفسي ..... مدت يدها مسكت يد حجه نفسيه و ضغطت عليها و ابتسمت ليها .
مشت لإن السجانه كانت منتظرها عشان تطلعها من المحكمه ......
أنت تقرأ
حكم إعدام
Romantizm(شيئان لا تسلم عاقبتهما الظلم والشر) _ علي بن أبي طالب _ . و بين الظلم الظاهر والعدل الخفي خيط رفيع لا يراه إلا أهل القلوب .
