عن ألمي اتحدث

صدفة

ريتاج راحت تجري عند اسيل و اسيل بادلتها العناق

اسيل : كيراكي
ريتاج : الحمد لله
اسيل :توحشتك
ريتاج : وانا بزااااف
شيرين : احم احم

اسيل فطنت على روحها سلمت على جماعة و قعدت و العائلة الكريمة ڨاااااع مدهوووشة ريتاج ماشي مأمنة صحبتها لأنتيم باغي تولي مرت خوها و خااصة معاذ ماكانش يتوقع اسيل لي كانت توجوغ قدامه

محمد : ههه امالا تعرفو بعضكم ؟
ريتاج : اييه هادي هي صحبتي لي دايما نحكيلكم عليها
محمد : الله يبارك
انيسة : خموس عليها زين و عقل و رزانة
اسيل ( في قلبها واش من رزااانة ) : شكرا
شيرين : ربي يدومها محبة
ريتاج بفرحة : ااامين
شيرين : تفضلو تفضلو مدو يديكم

°°°عند معاذ°°°

كان حاط راسه مجمع معاهم و كاره حياااته و يقول في راسه ( نوو نوو مالازمش نتزوج هاك نوو ) طلع راسه شاف وحدة وجهها مألوف حطت سنيوة كي طلعت راسها و شافت في ريتاج و ضحكت تفكرها أسيل بدا يقول في راسه ( كوااااا اسييييل .. شاجابهاا هنا ؟؟ و كيفاش نتزوجها هياا ؟؟ ) حتى يسمع محمد يقول

محمد : المهم جيناكم بالحسب و النسب طالبين يد بنتكم و اختكم اسيل لولدنا معاذ على سنة الله و رسوله
لؤي : و احنا موافقين يا محمد نعم النسب

في هاداك لوقت محمد وصل وين ماكان باغي و انيسة تميز في اسيل بإعجاب و ريتاج ماشي عاطيا فرحتها لواحد ميتة بالسعادة اما معاذ فكان اتعس انسان على وجه الارض المشاعر مخلطة حزن على لبنت لي قاسها فلبلاد و على لبنت لي باغي يعيش معاها لي ماكان ما دخلها فأي حاجة و والديه لي راهم يتصرفو بلا شوره في حياته ... عقد حواجبه و الشرارة خرجت من عينيه في هاداك لوقت طلعت اسيل راسها و طاحت عينها مع عينه و كأن سيف دخل في قلبها خافت من النظرة تاعه و حست انه ماراهش باغي هاد الزواج حطت راسها و بدات تقول ( هدا ماله دااير هاك ؟؟ شحال متكببرر.. موحال نقد نعيش مع واحد هاك انا )

شيرين : ااااسسيييل
اسيل : واه
شيرين : عقلك وين راه ؟؟
اسيل : ااا .. اه .. ماراهش
شيرين : هههههه ماراهش
اسيل ( انشقي يا ارض و ابلعيني ) : هههه نوو زعما راني نسمع فيك
انيسة : ايه مالا الشروط رانا متفاهمين و العرس لعام لجاي نشاء الله فصيف
شيرين : اييه نشاء الله فلبلاد
انيسة : نشاء الله
محمد : على بركة الله
لؤي : كلشي بلباركة و لعاقبة لعمارت الدار
محمد : اامين

شربو القهوة في رحبا و فوتو جلسة شابة .... راحو الخطابة و بقات اسيل مع شيرين

شيرين : امالا تعرفيهم ؟
اسيل : واه صحبتي انتيم هاديك
شيرين : ايه مليح هاكا .. و عجبك العريس ؟؟
اسيل : لا
شيرين : منيتك ؟؟؟ شباب
اسيل : ماجاتش قضية زين .. بصح حسيته ماراهش باغي هاد الزواج
شيرين : بعدااا ولا عندك الاحساس
اسيل : وي شيرين والله ديجا راني عاقلة كان يبغي وحدة فلجامعة شابة بزاف
شيرين : قولي لأسيل تعطيك نيميغو تاعه ولا حاجة و هدري معاه
اسيل : جااااميييي نطيح نيفي مهبولة نتي
شيرين : شوفي دبري راسك انا منسيف عليك واااللووو .. بغيتي نكملو هاد الزواج صاحا ما بغيتيش هادي حياتك ونتي حرة مهما يكون رايي و رايك يبقا هو الاول
اسيل ( عنقت شيرين و سلمت عليها في راسها ) : يا شيرين والله ما تنجمي تحسي بيا .. مي هدا باغي نعيش معاه ڨااع حياتي
شيرين : جيستومون عليها مانيش باغية نسيف عليك