Matapos ma-aksidente ng simpleng mangingisda na si Manuel, nakumbinse siya sa sarili na siya ang second coming ni Jesus Christ. At siya'y naghanap ng mga disipulo para palaganapin ang banal na salita ng Diyos. Isang tragi-comedy, ito'y istorya ng mg...
Oops! Ang larawang ito ay hindi sumusunod sa aming mga alituntunin sa nilalaman. Upang magpatuloy sa pag-publish, subukan itong alisin o mag-upload ng bago.
Nagmamadaling tinatahak ni Father See ang bangketa sa bayan proper, naka-civilian clothes at dala ang malaking gym bag. Mataas ang sikat ng araw kaya't tagaktak ang kanyang pawis sa mukha, bukod sa mabigat ang tangan-tangan. Ang laman ng bag—mga gamit ng simbahan: Crucifix na gawa sa tanso't ginto at ilang bagay tulad ng candelabra at mga pinggan.
"Patawad," malungkot na sabi ng pari.
Dahil nalagas na'ng mga nagpupunta sa kanyang simbahan, ay napilitan ang pari na magsangla ng ilang bagay. Sapat naman ang ipinapadala ng simbahang Katoliko para sa pang-araw-araw ng kanyang parokya, nguni't may pangangailangan ang pari na lingid sa kaalaman ng iba: You see, nagpapatayo si Father See ng malaking bahay sa may bayan ng Callejon. At kung hindi siya makakalap ng pera'y maantala ang construction nito. Nakaorder na siya ng mamahaling mga tiles at nagpasadya ng pintuan sa sash factory. Kailangan niya ng pambayad para sa mga ito.
Binaba ng pari ang suot na cap para takpan ang mukha at binilisan ang paglalakad. Sa kabila lang ng kalye ang palengke at baka siya mamukaan. Ilan sa mga tindera ng isda roon ay ka-purok niya at dating uma-attend ng simbahan niya. Sa wakas at natanaw niya ang sanglaan at nirekta pa ang kanyang lakad.
Pagpasok ni Father See sa sanglaan ay may nauna sa kanya na dalawang matanda sa pila, kaya't kumuha siya ng number at naupo muna. Sabagay at masakit pang paa niya sa paglalakad.
"Naku, 'Tang, 'Nang, hindi ho basta-basta ito," sabi ng babaeng taga sanglaan sa dalawang kausap. "Kailangan naming makita 'yung lupa, o 'yung bangka n'yo."
"Eh kailangan na namin ng pera at baka malagutan na kami ng hininga," sabi ng matandang babae.
Napangiti ni Father See sa narinig. Susumaryosep, ani niya sa sarili.
"Kailangang magbigay kami ng pera sa simbahan para matiyak na pupunta kami ng langit," dugtong ng matandang lalaki.
Nang mabanggit ang simbahan ay napasandal ang pari at umiwas ng tingin.
"Na naman?" pagtataka ng babae, "pang-anim na kayo ngayong araw na nagsabi ng ganyan. Anong simbahan ba ito?"
"Sa Church of the Second Coming," matigas na sabi ng matandang lalaki.
Napatuwid ng upo si Father See. Tama ba narinig niya?
Umiling ang babaeng taga sanglaan at ibinalik ang mga papeles sa dalawang gurang.
"Pasensya na po, 'di ko matatanggap 'yan. Subukan n'yo dun sa rural bank sa kabila. Doon, malapit sa munisipyo."
"Rural bank?"
"Yes."
"Saan?" litong tanong ng matandang babae.
"Doon po!" malakas ang boses ng babae sa sanglaan pagka't alam niyang may kahinaan sila sa pandinig, at sinenyasan ang security guard na ituro sa mga ito ang bankong tinutukoy.
Lumabas ang dalawang matanda habang escort ng sikyo.
"Number 8!" sabi ng babaeng taga sanglaan.
Bahagyang natulala si father. Nag-iisip. Hindi niya narinig ang tawag.
"Father, kayo na po," sabi ng babae, namukaan niya ang pari bagama't naka-kuno-disguise ito.
Napatingin ang pari, hindi tiyak ang ikikilos.
"Father? May isasangla ba kayo?"
Biglang tumayo si Father See at nagmamadaling lumabas ng sanglaan dala ang kanyang gym bag sa pagtataka ng babae.
# Naglalakad ang dalawang matanda sa bangketa nang abutan sila ni Father See at pigilan.
"Mawalang-galang po, lolo, lola..."
Tumingin ang dalawang matanda sa pari, nagtataka. Nasisilaw sila sa tama ng araw kaya ang mga mata'y pumupungay.
"Narinig kong usapan n'yo kanina," sabi ng pari sa kanila. "Sabi nyo'y hinihingian kayo ng pera para makapasok ng langit?"
"O-oo. Sa singkwenta mil, sigurado daw na makakapunta kami sa langit," sabi ng matandang lalaki.
"Ha? Paano?"
"Si Manuel. Nakakausap niya mismo ang Diyos!" bulalas ng matandang babae.
"Sinabi nila ito? Plenary Indulgence?" lumaki ang mata ni Father See bagama't singkit.
"O-oo," tango ng matandang lalaki.
"Sigurado ba kayo?" napiyok pa ang pari.
"Oo nga!" inis na sabi ng matandang babae. "'Wag mo nga kaming abalahin at pupunta pa kami sa bangko at baka dito pa kami malagutan ng hininga."
Witn that, nagpatuloy sa paglalakad ang dalawang matanda. Although, hindi sila tiyak kung tama nga ang dinaraanan. Ang rural bank ay kahilera ng munisipyo at mukhang sa beerhouse ang bagsak nila.
Samantala, naiwan sa kalye si Father See. Nag-iisip.
