المتملك القاسي

هناء

الحب أحلى شي بالحياة من تختارين الشخص الصح وراح يكون أسوء وكابوس من يكون الشخص إلي حبيتيه هو خطأ بس اني حبيته من كل كلبي ومابيوم قصرت وياه وكولشي يطلب انفذ بدون مااناقش لأن احبه واعشقه واموت اذا مايتصل ويهملني واعرف هو شكد مقصر وياي سواء بمشاعرة او حتى جسده لأن دائمآ يكون وياي مجرد جسد بس كلبه احسه مووياي بس ليش بس اريد أعرف ليش واني أموت على التراب اليمشي عليه ....
جنت مرغوبة ولازلت حتى من كبلت وياه الناس تخطبني اشكال وألوان من دكاترة لمهندسين والجامعة الكل يرغب بيه ومثل مايكولون عندي شعبيه والولد كاتلين انفسهم علمود سلام مني أو نظرة بس عمري ماباوعت أو اهتميت لأحد بعد ماشفت بشار أو كما القبه بشير كدام الناس وبيناتنا حبيبي ....
جنت إجتماعية والبنات كولها تحبني وتريد تصادقني بس جانت علاقتي قوية وي ثلاث بنات بس ( رند ، وايمان 'بنين )
رند ابنية مثقفة وشخصيتها غير من اكعد اسولف وياها أحس براحة وتنطيني ثقة وتحسسني بالأمان لذلك جانت اسراري كولها عدها مثل البير العميق شما احجيلها يبقى سر وماتسولف لأي أبنية فجانت الابنية الي احب امشي وياها ونروح سوة بنفس الخط ونرجع سوة ...
ايمان صديقتي من الإعدادية وهي خوش ابنية بس هي تحب الولد يعني تحب الحلوين وتحب تكون صديقات وجمالها عادي بس من دخلنا للجامعة وتشوف الناس كل ساعة مصارحيني تضوج وتريد تكبل بس لأن شكلها عادي محد يحب يتقربلها لذلك احسها تحبني وتغار مني بنفس الوقت بس مااكدر اغيرها وصارت علاقتها وي رند قوية كولش لذلك ماكدرت ابتعد عنها بس أسراري مااسولف بيها بس يم رند....

بنين ابنية مزوجة قبل لا تدخل للجامعة وزوجها يحبها بس نسونجي ويحب يسوي علاقات وماعدها اطفال لأن تدرس وماتريد مسؤولية وتعرف رجلها موكد هل المسؤولية لذلك مئجلة موضوع الحمل بس هي نعتبرها مثل أمنا دوم تنصحنا وتساعدنا ...

باوعت على بشار ردت ابرر السوته رند بس ماانطاني مجال وطلع من السيارة وسدها بقوة وعرفت هو معصب من موقف رند بس شسوي رند راسها يابس وبشار بعد أسوء منها وماتدري اذا يعصب عليه يضل أيام ميحجي وياي ومايقبل يسمعني شكول عليج رند طيحتي حظي ...
دمعت عيني من الموقف ماريده يعوفني ياربي شسوي هسة
خلت رند ايدها على متني(كتفي) وهي تحس بيه شكد ضايجة من ورة الصار( حبيبتي هناء ميصير السويتيه يعني معقولة بشار الأسد مايكدر يعرف مكان بيتكم وليا منطقة ساكنين ....لاتضوجين وصير قوية لأن اذا خليتي شخصيتج ضعيفة راح يستغل هذآ الشي )
انقهرت من حجيها وادري بيها تخاف عليه وكلامها صحيح بس أحبه ياربي شسوي شلون أفهمها اني احبه وماحبيت بعمري شخص هل كد هو سلب عقلي بشخصيته القوية وأسلوبه بالتعامل وي الناس بمكانته الاجتماعية وجماله هو وسيم وبنات الجامعة كولها تريد قربه ....

______😚

تفاعلوا لأن اذا التفاعل قليل امسحها 😍