المتملك القاسي

٣

#رند..
إذا هجرتَ فمـن لـي ومـن يجمّل كـلّي
ومـن لروحي وراحي يا أكثـري وأقـلّي
أَحَبَّـكَ البعض مـنـّي فقد ذهبت بكـــلّي
يا كـلّ كـلّي فكـنْ لي إنْ لم تكن لي فمن لي
يا كـل كـلّي و أهـلي عنـد انقطاعي وذلّي
ما لي سوى الروح خذها والـروح جهد المقلّ...

...
.......
................

الساعة ١٢ ب الليل... كاعدة أشوف مسلسل تركي كالعادة على جربايتي ومتغطيه بالبطانية ومندمجة بالأحداث وشلون البطل راح يحرر البطلة من الخاطفين وكلبي وياهم بكل خطوة وحاطة علبه النوتيلا وأكل بيها ...لحد يححي وياي ويكولي تسمن اني يادوب متحملة اهلي من ينصحوني كل مرة قبل مااشتريها واشتريها غصب عنهم ...طبع زفت ماعرف اباوع مسلسل تركي بدون علبة النوتيلا....ومااشوف غير رقم غريب يتصل عليه ...
عرفت انوا شخص مستهتر ديتصل ويجرب حضه وي الارقام فبدون ماافكر مرتين حذفت الإتصال ورجعت أتابع المسلسل...
وصلتني رسالة على الخط " اني هناء جاوبيني بسرعة.."
واتصلت وراه الرسالة بثواني...
كعدت وعدلت روحي وفتحت الاتصال وخليته على أذني وجاوبت بعصبة على أساس مسوية نفسي ضايجة منها .." لج وينج اتصل عليج على رقمج ومجاي اوصلج....فهميني ليش رقمج يطلع خارج نطاق الخدمة." احجي وهي بس تبجي وصوت أنفاسها يوصلني وكلبي وكع بين أيدي من حجت بصوت مبحوح " رندد..."....
وكفت على طولي وحجيت بخوف وكلبي يدك بسرعة رهيبة "ليش دتبجين؟ ماتحجين لاتخوفيني زايد...ابوج أو امج بيهم شي ...صاير وياج شي "
ما سمعت بس كلمة وحدة طلعت من سماعة التلفون " بشار "
هنا من سمعت إسمه ما تحملت كمت اصيح بصوت عالي "شبيه هل حقير سوالج شي....ماتحجين شبيج ساكته "..
ردت وهي تحجي بهسترية جنها وحدة عدها انفصام وتغيرت أحوالها بدت تصيح باسمه وتردد "إنتي السبب من موقفج لهذا اليوم تركني...تركني وأنتي السبب وأنتي راح تكوني السبب بموتي اذا مااعتذرتي منه..."
صوت نشاز يصفر باذني.....شنو أنا السبب؟..انا شدخلني؟،.
صوت صياح وأعياط سمعته رديت بخوف "شنووو اني السبب؟شدخلني بيكم ماتحجين لأ تخبليني....هناء ...هناءءء " التلفون انغلق والصمت عم المكان بالغرفة لو تنذب ابرة ينسمع صوتها ....
شمرت التلفون على الجرباية ورفعت شعري بأيدي أحس روحي صرت ناررر.... هل الحيوان شمسويحتى خله هناء الابنية الراكزة العاقلة هيج تسوي وتسودن....
بدون مااحس على نفسي كمشت تلفوني من الجرباية وفتحته رحت على صفحتي على الفيس وشلت الحضروبدون ماافكر مرتين اتصلت عليه....
دك وكلبي يدك وي الاتصال بسرعة وحركة.. ..أتمنى اشوفه يمي هسة واضربه راجدي بلكت يصح على نفسه فارس زمانة هل الثور المتخلف...
سمعت صوته وهو يرد بكلمة " الوو" بس امبين عليه آثار النوم ...
شلون آلة عين ينام وهناء المسكينة جاي تبجي وتفرفح على شخص مايستاهل نايم ومايدري عنها وعن حالتها...اوف منج يا هناء كم مرة حذرتج من هيج شكول مابيها حظ ....
رديت عليه بعياط" أنت شنو من بشر ...ماعندك إحساس... والمسكينة هناء راح تموت من البواجي بسببك...ياثور ربي ياخذك .."
...............................
#بشار