المتملك القاسي

١٥

{لا سامحهم الله ولا عفا عنهم اولئك الذين مروا وضروا وتركوا فينا ندوباً شوهت كل شيء جميل داخلنا ..
عند كل شهيق و زفير من قلبي دعوة ك هذه 💜}

..........................

رند...سما حاولت تسكتني وتخليني اهدء بس ماجاي اكدر....تعبني وهو بعدة ماصاير ملكي...تعبت من كل هل الأسلوب وهو بعدة ما مالكني لعد شلون بيه اذا حبيته وصار هو الهوى مالتي....اعرف بنفسي محد راح يتاذي من كل هل العلاقة غيري وراح أدفع ثمن كل وحدة كسرها وخلاها هسة دمعتها على عيونها....

ماعرف اذا صدك حجيه وانوا هو ماجبر أحد عليه وعندي حساس كولش قوي انوا هو من هذا النوع ولايفرض نفسه ع أحد...

بس ما عرف ليش خايفة...يمكن اخاف أحبه واتعلق بيه ويجي يوم يكول كل هذا البيناتنا مجرد نزوة وبعد ماريدج.....لأن كلام هناء صحيح اني مو اله ...يعني بشار مثل مايكولون عريس شبه مثالي ...من شخصية قوية ومن جمال وجاه ومن عائلة معروفة بكول العراق...يعني جميلة الجميلات هي بوجوده لاشي مو اني....
أدري الإنسان لازم ثقته بالنفس تصير عالية بس اني صريحة وهذا واقع هو يستحق كل هل ضجة عليه واني شايفة بعيني شلون الجامعة تنكلب من يجي لحد مايطلع...واعرف أساتذة الجامعة هم يردون قربه لأن راح يرتاحون بحياتهم اذا حصلوا دعم بشار وراح تسهل عليهم هواية شغلات ومكانتهم ترتقع ماديا ومعنويا...

اني موغبية ولاجاهلة بيه واعرف هواية قصص عليه ماعرف اذا صدك لو جذب بس اعرف شغلة وحدة بشار شخص موسهل وكاعد اتصرف وياه بهيج أسلوب محلو حتى اطلعه ع حقيقة واخليه يمل مني ويتركني بحال سبيلي مدام بعدنا على البر...
بس بعد آخر عركة بيناتنا وشلون جان يحجي بغيرة وتملك خله كلبي يدك بسرعة ويريد يطلع من مكانه خلاني هذا أبجي زايد وزايد لأن أحس نفسي وكعت بيه شوية شوية ويخوفي ابدي اغار عليه واني من أغار أموت نار وقهر....ماتحمل نظرات الناس بحب وإعجاب ...
اخته اسمها سما امبينه حبابة من دخلت لحد هسة بس كاعدة يمي وتمسح على شعري وتهدي بيه... اشهك واناغي واني احجي إلها
"مايحس بيه...ياخذني بنصاص الليالي بحجة هو يحبني وشلون رفضته... ومافكر بالعالم شراح تحجي عليه وعلى اهلي وسمعتي بين الناس...اهم شي الأخ يكون راضي....واريد أعرف هو الحب يكون هيج لو بس يريد يتملكني ويكسرني لأن جاوبته...ساعة السودة الصعدت وي هناء وحجيت لو خالته يصعد ويحجي هي وياها اني شعليه بيهم..لو نازله من السيارة وعايفتلهم الجو مو احسن من هيج وضعيه زفت..."

سما..اول مرة بعمري يطلب بشار مني شغله وتمنيت أمنية عمري اشوف منو السودنت أخوي وشنو شكلها وشخصيتها والفضول موتني خاصة بعد ما اجتي امي منهم صايرة أعصاب وخايفة من ردت فعله ...العائلة كولها تعرفه ....وابوي منبهنا والعشيرة تعرف محد يناقش بشار .. كولشي يريده يتنفذ بدون لا أو ليش...بدون سؤال وجواب باللحظة..
اول ما اجه لامي وكللها أريد ترحين تخطبيلي والله اني واختي وامي شوية جان انضربنا سكتة دماغية....بشار يتزوج!؟..يا عالم يا ناس بشار يزوج!!..
امي ماصدكت رأسا هلهلت والفرحة ماسعتها انهارت تبجي لأن العائلة الكريمة تظن أو جانت تظن انوا آخر وأحد راح يتزوج هو بشير..يعني بإختصار الناس كولها تفكر تستقر وتسوي عائلة ماعداه هو.....يعني جان رافض الفكرة جملة وتفصيل...
اني شفتها للخذت كلبه لبشار واني اشوف شلون دردم وهو صاير أعصاب مايتحاجة ضحكت من كلبي على هل مسودنين....يشابهون بالحدة...
الابنية عادية يعني صراحة مقارنة وي البنات الجنت اشوف صورهن وياه ماكو اي تشابه أو حتى مقارنة...صحيح هي الابنية حلوة بس تبقى عادية..
بقيت امسح على شعرها وهي تحجي واني كوة لازمة ضحكتي....شلون تعيط وتبجي مثل الطفلة والله ياخوية ماتوقعت هيج وكعتك راح تكون بس احسن هي هاي التفيدك...هي هاي دواك...
من جابت طاري ابنية سئلتها " منو هاي الراد يروح وياها.."
رفعت راسها باوعتلي وراها رجعت لنفس الوضعية وهي تجاوبني " صديقتي ....تخيلي جان على علاقة وي صديقتي وبين فترة متجاوز الشهر يكولي أريد ازوجج...بذمتج تثقين بعقليه هيج رجال..."
" سمحيلي حبيبتي بس هذا الرجال داتحجين عليه يصير اخوي وأثق بكولشي يتصرفه لأن ولايوم اذى إنسان...صدك اني أتفق وياج من ناحية أخوي مزاجي واعصاب وبراسه يسويه بس مو معناها هو لعوبجي...لا حبيبتي هو أصلا مايتقبل أين كان وانت اول وحدة يفكر بيج بجدية...
ضحكت باستهزاء " ولازم أفرح لأن يفكر بيه بجدية ....عذريني على الراح احجيه بس اليسوي الحرام والمنكر كولشي يكدر يسوي ....تخيلي مسوي وي صديقتي علاقة محرمة وغير شرعية لعد وين تردين توصل اللعوبجيه اذا هيج مو لعوبجي ...
" اكولج انتي متفتهمين بهيج سوالف لان لو عندج ذرة افتهام جان عرفتي شغلة وحدة محديجبر شخص على شي وخاصة بشير ...صحيح انتي نكدر نعتبرج شي مميز لأن أخوي لو تطلع ملكة جمال العالم مراح يجبرها عليه...."
"ماعرف والله حايرة ....صعب طبعه وماعرف اتصرف وياه لااراديا اصير نار من أشوف تصرفاته...يعني ماعنده أسلوب بس يهدد وعقله يابس ...أحس نفسي من عالم وهو من عالم ثاني.."