المتملك القاسي

٢

ومن ذاك الموقف لحد الآن هناء ماحجت وياي وحتى من اتصل عليها على رقمها يطلع خارج نطاق الخدمة ....
اني هم غلست لأن مسويت شي غلط جانت تكدر تروح وياه بدون مادخلني بالموضوع واتعرض لهذا الموقف اليفشل ....ماعرف شلون جنت هيج قوية ورديته رغم طبعي الخجول ....

مرت الايام واني من النوع بالعطلة اكطع عن صديقاتي بس اكعد وي عائلتي وشغل البيت وضيوف الي تجي على بيتنا...

كعدت من الصبح لأن متعودة على الكعدة على وكت رتبت غرفتي ونزلت جوه للمطبخ....ساعدت امي بالطبخ وتنظيف البيت وصعدت لغرفتي سبحت وتمددت على الجرباية ظهري يوجعني من الوكفة ....
لاتستغربون ابدا ....أني مامتعودة على شغل البيت بس بالعطلة استلمه فمن أقل شغل أتعب ومزاجية بشكل بسرعة أفرح وبسرعة ابجي...يعني موقوية مثل بعض البنات ... وخجولةواخاف من أقل شي...
فتحت تلفوني وكعدت اكلب على الانستا بين صور الفاشن وتسريحات الشعر والمكياج....صحيح اني اتابع هواية هيج شغلات بس إمكانية اشتري هيج ملابس وإكسسوارات بأسعار غالية كولش أمر مستحيل..لأن أهلي على راتب أبوي وامي يادوب يكفي مصاريف أخوي علي اليدرس بمصر ويمكن محد يعرف انوا مصر طبقتين بس لو هاي كلاس يعني غالي كولش لو فقير يعني ماعدهم متوسط بسبب زيادة عدد السكان المحليين فقط جزء بسيط يكون مستور حالتهم هاي اذا كل العائلة تشتغل ...لذلك اني مالبس مثل ماتلبس صديقاتي مثل هناء وغيرها هواية....بس اني قنوعة والحمد لله وعمري ما حسست أهلي انوا أحتاج شيء...التكدر عليه امي تجيبه ألي ....
وأني اتصفح اجاني اشعار من الفيس طلب صداقة فتحته واشوفه هذا الثور الهائج مو نفسه حبيب هناء؟.
لا والحلوة مودي طلب إلي هل الحقير من كدما احبه ؟.. عينة صلفه لهل الثور ...
فتحت صفحته تعرفون الفضول يكتل كتل...
باوعت على الإسم "بشار ال....." هلا هلا اكولن من وين اله هل الفلوس والبذخ طلع الأخ من هاي العائلة الغنية إبن عن جد يعني مو مال يوم ويومين...
نزلت لجوة وأشوف صوره بأماكن اول مرة أشوفها يعني دول أوربية بس عرفت إسطنبول لأن شايفتها بالمسلسلات التركية....أختكم تحب التركي ....ومااحس غير دائرة ورسالة من الدائرة مكتوب
_ اقبلي الطلب وراها عود بحثي بروفايل...
ذبيت التلفون من ايدي بصدمة وضليت ارجف هاي شمدريه أني جاي أبحث بملفه الشخصي....يمه هذا جني بسم الله الرحمن الرحيم..ياسين ..
كمشت موبايلي وايدي ترجف من الخوف وفتحت الدائرة لكيته مودي وحدة ثانية ..ضغطت عليها للدائرة وانفتحت
_اقبلي الطلب وراهاعود بحثي بروفايلي وشوفي صوري بس هسة أريد افتهم منج شغله؟
_جبانة ردي
ركضت مسحت الرسايل ودخلت سويت بلوك اله وطلعت غلقت الفيس واني عندي إحساس غريب اول مرة أحس بالخوف من إنسان...احسه وحش هل الإنسان مو مثل باقي الولد...احسه جبير بتصرفاته وكلامه ....
لحظة شنو قصة باريد افتهم شغلة هو شنو بيني وبينه علمود يفتهم مني هو أني أعرفك حتى تريد تعرف هاي الشغلة ....الثور يريد يسوي شي....ماعرف ليش كلبي مامرتاحلة........

___________
"كتلج صوتج مااريد اسمعه...افتهمتي واذا حاولت تتصلين بيه من غير رقم مرة لخ والله ثم والله اطلع الإنسان المتخلف الي يحاول مايطلع وتصير بوجهج بدل ماتصير بوجه صديقتج المسودنة..." حجة بكل هدوء وهو يرزل هناء بعد ما رفض يرد على اتصالاتها وكل يوم تتصل عليه من غير رقم بس تحاول توصله بس هوه كلبه حجر مايحس بس شتسوي هي تحبه ....تعشقه ماتكدر تعيش بدونه......أثر بيها تحس كلبها انوشم إسمه عليه.....بشار .....
فقدت من البجي والعيون مورمة وتحجي بصوت مبحوح " حبيبي بشوري بس اسمعني أن......"
ما سمعت غير صوت التلفون وهو يعلن إنهاء المكالمة...
هنا ماستحملت هناء بدت تصيح وتبجي ...شلون الإنسان بين يوم وليلة ينكلب حالةويصير شخص يكره الحياة بعد ماجان يعشقها ....شلون الإنسان هيج ضعيف ويفكر بالانتحار وهو الي جان يكره الإنسان اليفكر مجرد تفكير بالانتحار ويعتبره شخص بعيد عن الله....وماعندة إيمان...شلون يتغير حالنا بهل سرعة....شلون نحب بلحظة لدرجة نفقد عقلنا ....أني أحس الدنيا سودة بوجهي وكرهت كلشي بحياتي....كرهت عائلتي ويومي واشيائي و الاهم كرهت الي جانت السبب "رند الحقيرة والله اذا ماصلحتي الي كسرتيه راح ادمرج واكسرج...اني اعلمج...
مسحت هناء دموعها بقوة وكمشت تلفونها ودكت رقم وخلته على أذنها منتظرة تسمع صوتها ...