المتملك القاسي

١٢

انتهت ذيج الليالي
واحنا وياها انتهينه 💔!

...............

مرت الأيام وخوفي كل يوم يزداد أضعاف ...مرة اكول هذا حلم لأن من يوم ما اتصل عليه لحد هل يوم ماتصل مرة لخ...
بس مرات اخاف من هذا الهدوء أحس ورة شي...
اليوم يوم ألخميس ومابقى شي للدوام ...يوم الاحد نبدي سنة جديدة...
بعد الصار اني وياه خجلانه من هناء .....ادري ممسويةشي غلط وكولشي صار خارج إرادتي بس رغم هذا بشار حبيبها لهناء....وأكثر....و
بدون مااحس عقلي استرجع احداث هذاك اليوم وياه وكلبي يضرب مثل الطبل...
وجهي صار أحمر.....يعني يابشار حتى هناء هم هيج سويت وياها....لمستها مثل مالمساتني وهمستلها مثل ماهمستلي....شي بالموضوع ضوجني...يعني وي كل وحدة هيج سوة وياها نفس الحركات و الكلمات والإصرار...ماكفنك البنات اجيت إلي اني المافكرت يوم من الأيام بيك لأن اعرف أمثالك ماينظرون إلي ...خفت أفكر أو تمر على بالي طوال هل الأيام وكل ماعقلي يجيب صورتك أحاول اطردها لا كلبي يتعلق بيك....هو شخص خطر كل إنسان يعلقه بيه سواء بقصد أو بدون قصد...
اجتي رسالة على الواتساب من رقمه.....طبعا ماحافظته بس حفظه نهاية رقمه ....
فتحتها وكلبي يدوي واذا بيه كاتب " باجر أهلي عدكم الساعة ٤ونص العصر ...موافقتج أسمعها بنفس لحظة الخطوبة والتلفون راح يكون مفتوح حتى إسمه صوتج وأنتي تكولين أي موافقة..."

دمي نشف...عدت قرأ الرسالة عشر مرات وكل مرة أحاول أستوعب الجاي يكولة....يخطبوني واقبل بيه...
خليت أيدي على خدي يجوي صاير نار ماعرف خجل لو رهبة....
معقولة اني ازوج بشار بس شلون راح تكون الحياة وياه....اوووف ياربي شاسوي بهاي المصيبة....
اليوم بطولة بالي مو وياي وكل ساعة يجي فكر والسيناريو كل لحظة شكل....مرة رومانسي...مرة كارثي...مرة بجي.....مرة أبتسم...
كعدت الصبح نظفت البيت ورتبت الإستقبال وسويت كيك بنكهة البرتقال وصعدت لغرفتي سبحت وبدلت فستان يصير على الجسم وشعري عفته على طوله ولبست إكسسوارات بسيطة كولش ورشيت عطر وكعدت على جربايتي وجسمي يرجف ماجاي اكدر اسيطر عليه....كلبي من وراه راح يوكف...
فتحت الانستغرام وبديت أشغل نفسي....لكيت هناء ناشرة صورة ...خزنتها وفتحتها وقربت على صورة جانت ملتقطينها من بعيد ....ركزت على ملامح الوياها ....نفس الجسم وتسريحة الشعر واللحية وخاتم فضي بايده ...معروف بالجامعة بخاتم الأسد...هذا خاتمه...
وهنا وكع التلفون من أيدي...هي وبشار وايدها بايده وتضحك اله بس هو عاكد حواجبة كالعادة وكاتبة على الصورة اني وحب حياتي ....
دخلت على التعليقات وفوك ٤٠٠ تعليق بالسعادة وهي تستاهله ...واكو بيها تهنئها وتتمنى زواجهم...حتى ولد الجامعة واصدقائه ماقصرو بالتعليق....هو يستاهل هيج جمال ومحد بالجامعة تنافسج بالحلا...
دموعي نزلت.....ليش ابجي يعني اسوي نفسي ماتوقعت هل شي....جديدة عليه هيج صور أو على حبيباته بكل مكان....بس اني العوجة الأفكرممكن واحد مثله صدك يحبني....شافني ماكتلت نفسي عليه كال هاي اكسر راسها بهيج سالفة واضحك عليها بكلمتين...أو يريد يطلع سالفة العيطة الصارت بالسيارة عليه وشلون كسرت خشمه....
شمرت الموبايل يمي وبديت افتح بالتراجي ودموعي تصب على شنو ما عرف....احسه باحتقار لنفسي....أحس بطعم مر بحلكي....كره لو حب ما عرف شاحس بيه إتجاه بس أعرف اكو إحساس جاي يمشي بدمي إله.....هو وين واني وين....شمال وجنوب....بأفكار وعادات ومستوى مادي غيررر...
نزعتهن وذبيتهن بالكاع واني انهي كلامي...فتحت القلادة
دخلت امي عليه.....وهي تضحك اجتي يمي وكمشت وجهي بأيديها وعيونها بيها دموع...
" شوكت كبرت صغيرونتي وجاين يخطبونها....."
رديت بحركة كلب مكتومة "يخطبوني؟..."
"أي ماما وناس معروفين بالعراق كوله....رنود مجاي أصدق...ربج هيج كاتبلج نصيب راقي...." ياراقي يايوم هذا لعوبجي وجاي هنا يكسرني....يريد يرفعني لسابع سمة ويذبني..
"واذا معروفين ....يمكن الولد موزين.." رديت بعصبية..
" ماما رنود حبيبتي ولج الولد ابنهم الوحيد وقبل لا أصعد خابرت ابوج وحجيت وياه وبس كتله عنهم ضل يمدح بيهم وكال خوش نصيب... اذا هي مستعدة خلي تقبل لان ناس محترمة ..."
" يوم ماريد ازوج بعدني مامستعدة...ارفضي لأن كلبي مامرتاح لهل الموضوع كولة...من أتخرج عود يالة أفكر بالزواج"
" ماما النصيب الزين مايدك الباب كل يوم افهمي هل شي وامبين الولد شايفج بمكان وعاجبته لان امه كلتلها تنطينة مهلة علمود الابنية تفكر بس ماقبلت كالت ابني مستعجل وقابل بكل شروطكم و يريد يسمع الرد من نرجع ..."
اوكي مايقبل بغير حجي مووو .....جاي يخطب لو ينطي شروط...لو جاي ياخذ بضاعة مستعملة....
نزلت بسرعة واحس عقلي هو يتحكم بيه والغضب يقودني....دخلت للصالة لااحم ولاسلام كبل حجيت بصوت عالي اريده يسمع ويحترك كلبه نفس مامحترك كلبي...." ماموافقة.....ماموافقة.....ماموافقة....سمع إجابتي لو اعيدها بعد...."
امي مصدومة من تصرفي وطريقة كلامي وامه وجهه صار أحمر من حجي وياها.....طبعا شلون يرفضون ....ماتوقعت بيوم من الايام اصلا أبنها يزوج أو يكولها اني أريد استقر وازوج وتالي ماتالي من يختار يرفض بهيج اسلوب .....والله نهيتي حياتج بايدج ...