قلبي لك الجزء الاول للكاتبه أميرة صلاح

الفصل السادس عشر

بعض الناس مروا مرور الكرام في حياتنا 

وبعضهم توقفوا ليكملوا معنا مشوارنا
وبعضهم رحلوا وأخذوا قلوبنا معهم وتركوا لنا دعواتهم

منا سعيد ومنا شقي
منا غني ومنا فقير
لا تجتمع السعادة والغنى معا إلا ولو كان النقص في مكان أخر
فقط الكمال لله وحده سبحانه

عادت إبان إلي المنزل في تمام الساعة الحادية عشر
دقت جرس الباب فأسرعت مني لتفتح الباب
مني بلهفة : إبان .. يا حبيبتي اتأخرتي كده ليه ...؟؟
إبان بتعب : آه .. يا ماما .. رجليّ مش قادرة أقف ..
أسندتها والدتها إلي المقعد .. جلست عليه بإرهاق واضح تماما علي وجهها ..
مني : لا أنتي تقومي تاخدي شاور عقبال ما احضرلك العشا وتحكيلي كنتي فين لحد دلوقتي ,,..؟؟1
إبان : آه .. دانا جسمي كله مكسر .. منه لله ...
مني : طب قومي يا حبيبتي ... قومي
نهضت إبان بتعب لتأخذ حماما منعشاً ربما يعيد لها طاقتها ...
أنهت حمامها وخرجت من الغرفة لتجد والدتها تجلس علي الطاولة
مني باستغراب : كل ده في الحمام ؟؟؟
تنهدت إبان بتعب : صدقيني لو قولتلك محتاجة واحد كمان ...
مني بقلق : طب تحبي نروح لدكتور ..؟؟!!
إبان : لا طبعا مش للدرجادي يعني .... دول شوية إرهاق هيروحوا بالنوم....
مني :طب كلي وبعدين قومي ارتاحي والصبح نتكلم ...
إبان بضيق : لا مهو أنا لازم الساعة 8 أكون في الشركة ...
مني : ده شغل إيه اللي من الساعة 8 ده ..؟؟؟
إبان : ده شغل عيل مستفز و .....
صمتت حينما تذكرت خصوماته وتخيلته يجلس أمامها بنظراته المشاكسة ..
إبان : بلاش نجيب في سيرته ..
مني بعدم فهم : سيرة مين ؟؟!!
إبان بغيظ : سيرة الراجل اللي شغالة عنده .. وبعدين كتر خيره يعني وافق إني أقسط الفلوس وكمان أشتغل عنده ....
مني بتعجب : مهو أنا مستغربة من ده .. ازاى ليه فلوس ووافق إنه يشغلك ؟؟... مش داخلة دماغي الحكاية دى ...
إبان بتفكير : ولا أنا .... وهأموت وأعرف هو عمل كده ليه ....؟؟
مني : وأنتي شغالة إيه بقا ..؟؟
توترت إبان : احم ... شغالة الحمدلله ....
مني : أيوة يعني شغالة إيه ..؟؟
إبان بخفوت : مساعدة ....
مني : دى بتعمل إيه دى ...؟؟؟
إبان : بنظم مواعيده ...
مني بصراخ : يالهوي يا إبان هتشتغلي سكرتيرة علي أخر الزمن ...
إبان بتوضيح : لا مش سكرتيرة .. بقولك مساعدة ...
مني باستنكار : وإيه الفرق ..؟؟
إبان : إني مش هأقعد علي مكتب ....
مني : كمان ... وإيه اللي رماكي علي المر ده ..؟؟
إبان بحزن : اللي أمر منه ..
مني بلوم : مانا قولتلك .. نقول لأبوكي وهو يتصرف .....
إبان : طب تقدري تقوليلي هو بابا اتأخر ليه .. وكمان الفلوس اللي بعتها المرادي قليلة ليه ...؟
مني بقلق : مش عارفة .. بس قلبي مش مطمن ...
إبان : اهو شوفي أنتي بتقولي إيه وعايزاني أروح أقوله علي مشكلتي .. خليها لما يرجع إن شاء الله .......
مني : يارب ... قومي ارتاحي يالا ....
إبان : لما أخلص أكل ...
مني بسخرية : و بتتريقي علي بتول ...؟
إبان : أنا مكلتش حاجة من الصبح ... وبعدين بتقارني بتول بيا .. ده اللي هو ازاى يعني ..؟؟
مني : طب بتول وحامل .. وبعدين خفي عليها شوية كله بيطلع علي أمجد...
إبان : وأنا مالي بقا هو أنا اللي قولتله يتجوزها .. ده حب من أول نظرة إيه ده .... هو أنتي كنتي بتعملي إيه عندها صحيح ..؟؟"
مني : بتول ... رنا ينصلح حالها ... كلت طبق سلطة وكان فيه شبت وهي مش بتحبه رجعت وصرخت وتقول الواد حصله حاجة وفضلت تصرخ وأمجد معرفش يعمل حاجة اتصل بأمه و جات و إنها تقتنع إن الولد محصلوش حاجة برضو لا... وأمجد لما معرفش يسكتها اتصل بيا وبرضو مرتحتش غير لما روحنا للدكتورة وطمنتها ..وشافت البيبي بنفسها ...
إبان بصدمة : يالهوي كل ده عشان كلت شبت ...؟؟
مني : ومش كده وبس وحمها مش بيجي غير بعد نص الليل ..
إبان : ربنا معاه ...... صعبان عليا بجد والله ....
مني : الله يكون في عون الكل ... يالا قومي عشان تريحي شوية ...
أومأت برأسها وحملت الأطباق إلي المطبخ وبعدها اتجهت إلي غرفتها لتنعم بنعومة سريرها .....