القدر ليست مجرد كلمة بل واقع تعيشه
كلنا مؤمنين به مهما اختلفت الأديان
هو حكمة الله في الدنيا للإنسان فقط عليك تقبله والتكيف معه
أحيانا تكون أحداثه خيرا وفي الأخرى شرا
تقبلنا إياه من إيماننا
" صدفة خير من إلف ميعاد "\
صدفة آو ميعاد فهو قدرنا ما يختلف عنه هو رد فعلنا
والتعامل معها ... قدر مكتوب
وعشق يُكتَب بدماء قلب يصرخ
"قلبي لك "
عادت إبان إلي المنزل بعد بعض الوقت قضته مع صديقتها لتخفف عنها
مصيبة .. كارثة .. أم لعنة
لعنة تهور في مواقف هي غير أهل بها ... مواقف يضعونها بها ويخبرونها تصرفي أنتي ...
من تلوم .... تهورها .. أم غبائها .. أم يأتي اللوم كله علي عائلتها ..
رأت أمها ملامحها المرهقة والقلقة .. اقتربت منها ..
مني بقلق : إبان ... مالك يا حبيبتي .؟؟؟
" آآآآآآه ... صرخ قلبها بها " ... قبل أن تحتضن والدتها
قلب أم دق بناقوس الخطر... صغيرتها في مشكلة ..؟
ظلت تربت علي ظهرها وهي تسألها : مالك يا حبيبتي ؟؟... مالك يا ضنايا .. إيه اللي فيكي ؟؟؟1
بكت إبان في حضنها تركتها حتى تهدأ
هدأت قليلا فرفعت أمها وجهها لترى عيون خضراء تحولت إلي الحمراء .
سألتها مني متوجسة : فيكي إيه يا حبيبتي ؟؟!
إبان بصوت مبحوح : أ...أنا تعبانه أوى يا ماما
دمعت عيني مني وهي ترى حالة ابنتها : قولي لي يا حبيبتي مالك .. إيه اللي عمل فيكي كده .؟؟؟
إبان وهي تمسح الجموع التي لا تتوقف : أنا .. فاكره موضوع العريس بتاع أخر مرة .؟؟!
مني : العريس اللي روحتي مع بتول عشان تقابليه ؟؟!
إبان مؤكدة : أيوة هو ... الراجل بتاع القسم ده رفع عليا قضية تعويض وبما إنه ليه مركزه كسبها في ظرف أسبوع ...
شهقة أم صرخة لا ندري صدرت من مني عقب سماعها لمصيبة ابنتها
وما كان أمامها إلا النحيب : أنا السبب في اللي حصل سامحيني يا بنتي .
أمسكت إبان بيدي والدتها : مفيش داعي للكلام ده يا ماما .. اللي حصل .حصل .. وأنا اللي غلطانة عشان معرفتش أتحكم في أعصابي .
مني : طب قضية إيه دى اللي اتحكم فيها من غير ما نعرف ..
إبان بقلة حيلة : ما هو علشان ليه مركزه في الدولة طبخ الطبخة وكلها .
مني بقهر : حسبي الله ونعم الوكيل .. طب هنعمل إيه دلوقتي ؟؟!
إبان : مقداميش غير إني أكلم بابا يشوف حل للمصيبة دى ...
مني : طب قوام اتصلي بيه كده ..
أخرجت هاتفها من الحقيبة وضغطت علي أرقام والدها ولكن لم يأتيها رد .
نظرات قلقة تبادلتها الاثنتين عقب النتيجة ..
مني بقلق : طب رني مرة تانية كده ...
قامت بإعادة الكرة وانتظرت الرد
إبان بلهفة : بابا .... عامل يا حبيبي ؟؟
أتاه الرد من الجهة الأخرى : أنا كويس يا حبيبتي .. قولي لي عاملين إيه كلكم ؟؟؟؟!
إبان : إحنا كويسين كلنا بس أنت وحشتنا جدا
= وأنتوا والله وحشتوني جدا .. قولي لي أخبار بتول إيه ؟؟
إبان مازحة : يعني بقالها 28 سنة معقلتش هتعقل بين يوم وليلة ؟؟!
ضحك مصطفي : ههههه .. معاكي حق ...
إبان بحذر : بابا .. هو حضرتك هتيجي امتي ؟؟!
مصطفي : مالك يا إبان أنتي كويسة .. كل حاجة تمام عندكم ؟؟
إبان : اها يا بابا .. الحمدلله .. بس أصل حضرتك اتأخرت المرة دى ؟
مصطفي بتوضيح : أنا عارف .. بس الشغل هنا كتير ومش هقدر أنزل إلا لما يقل شوية ...
إبان : ماشي يا حبيبي ربنا معاك خلي بالك من نفسك ..
مصطفي : وأنتوا كمان خلوا بالكم من نفسكم .. وقولي لبتول تعقل لحد ما أجي ..
إبان : ههههه حاضر ولو إني أشك ...
مصطفي وهو ينهي الحوار : ماشي يا حبيبي محتاجين حاجة ؟؟!
إبان : سلامتك يا حبيبي .. لا إله إلا الله ..
= سيدنا محمد رسول الله
أغلقت الهاتف والتفتت إلي والدتها المتعجبة
مني بتعجب : بس كده ؟؟!!!
تنهدت إبان : وأنتي عايزاني أعمل إيه يعني أشغله بمشكلتي وهو عنده شغل كتير ومش بعيد يسيبه ويجي ..
مني بلوم : ولو مش أبوكي اللي هيقف جنبك مين اللي هيقف ؟؟!
إبان بشرود : أمجد..........
أنت تقرأ
قلبي لك الجزء الاول للكاتبه أميرة صلاح
Romantizmجميع حقوق الملكية تخص الكاتبه أميرة صلاح الفيس بوك الخاص بالكاتبة : روايات بقلم أميرة صلاح
