قلبي لك الجزء الاول للكاتبه أميرة صلاح

الفصل التاسع عشر

حقيقة مُسَلم بها 

" إذا أحب الله عبداً ابتلاه "
ذنوب تنقشع بعد كل شكة دبوس
اختبارات وابتلاءات تختبر صبرنا
وفي المقابل جزاء من الرزاق الحكيم

قلوب خاضعة ومستسلمة
طالما به الله
فنحن واثقون بأنه الخير والخير فقط

عاد إياس إلي المنزل بعد يومين من رحيل يوسف ...
وجد المنزل هادئاً وكأن الحال يبقي ..
سمع ضجيجا يأتي من غرفة الجلوس اتجه إليها ليجد والداه ومعهما سايا .
انتبهت سايا لوجوده فصرخت وهي تجري : خالو ..
حملها إياس : حبيبة خالو .. أنتي لسه قاعدة ..؟؟؟!
سايا : لا إحنا قاعدين كتير هنا ... عشان سفر ماما وبابا ..
إياس : اها ... طب تمام .. انزلي بقا ..
فريدة : سايا ..روحي اجهزي يالا ...
سايا وهي تخرج : حاضر ...
اقترب إياس من فريدة : إيه ده مفيش حمدلله علي السلامة ..؟؟
فريدة : كنت فين ... بعد ما يوسف مشي ..؟؟
إياس : احم .. كنت مسافر السخنة ......
فريدة : وأنت من امتي بتسافر من غير ما أعرف ...
إياس : كنت مسافر عشان أشم نفسي قبل ما أدبس في المشروع الجديد ..
فريدة : بمناسبة الشغل .. إبان الشافعي بتعمل إيه عندك ....؟؟
سعل إياس بشدة فأمسك بكوب ماء ليرتشف منه القليل ..
إياس بتوتر : احم .. إبان .. إبان مين ...؟؟
فريدة بغضب : إياس أنت عارف كويس أنا بتكلم عن مين ... إبان البنت بتاعت المحضر والقسم ..
إياس : اها . افتكرت ..
فريدة : طب كويس هي بتعمل إيه عندك في الشركة ...؟؟
حاول إياس في التفكير لإيجاد كذبة مناسبة ليخبرها بها ..
إياس : احم .. في الشركة .. يعني أكيد بتشتغل ...
فريدة : إياس ..أنت فاهم أنا قصدي إيه ومع ذلك هأقول مباشرة ..... إيه اللي يخلي إبان من دون البنات كلها تشتغل عندك لا وكمان أنت توافق ..
إياس : آه .. مهو أصل هي كانت بتشتغل عندنا من غير ما تعرف شركة مين أو أنا صاحبها .. فـ... فعشان كده هي ... يعني ...كانت بتشتغل ..
فريدة : طب وهي بتشتغل دلوقتي المساعدة بتاعتك ازاى ..؟
إياس : هو حضرتك تقربيلها ...؟
فريدة بغضب : إياس أنا أكتر واحدة عارفاك وممكن تعرف إنك لما تتعصب بتتصرف ازاى ....؟
إياس : ماما كل الحكاية إنها كانت محتاجة الشغل فأنا شغلتها عادي يعني ... وحضرتك طلبتي مني قبل كده إني أقفل الموضوع أنتي بتفتحيه دلوقتي ليه ..؟؟
فريدة : بالرغم إني مش مصدقاك إلا إنه مش قدامي حل تاني ...
إياس : أنتي علطول ظلماني يا ماما ...
فريدة : أكتر حاجة بتقلقني لما بتعمل فيها برئ ...!!
سيف : خلاص يا فريدة الموضوع اتفقل وهو قالك اهو إنها كانت محتاجة الشغل ده ...
فريدة : حرام ..لما تكون البنت متخرجة من هندسة وفي الأخر تشتغل مساعدة لحضرته .. يعني كمان مش في الشركة ..
إياس : مانا ملقتش ليها شغل عندنا في الشركة فصعبت عليا الصراحة .
سيف : خلاص خليها تشتغل مكان علياء .. هي هتستقيل .. وخليها تستلم شغلها الجديد أول الشهر ..
إياس : أنا عايزة أعرف أنتو شاغلين نفسكم بيها كده ليه ...؟؟
فريدة : عشان أنت في الموضوع .. يا ابن المنصور ..
إياس : هي وصلت لابن المنصور .. والله يا ناس أنتوا ظالمني جدا...
فريدة : أشوفها وأتأكد من كلامك ده ......
إياس : هو أنتي للدرجادي مش واثقة فيا ...
فريدة : لا خالص يا حبيبي واثقة جداً .. بس كل الحكاية عايزة أعرف منها عاملة إيه في الشغل ..؟
إياس بضيق : واشمعنا دى اللي مهتمة بيها كده ...؟؟
فريدة : عادي كنت عايزة أشكرها علي اللي عملته مع سايا ... وبفكر أجوزها لمراد ....
صدمة احتلته فشلته عن الحركة وكذلك سعل سيف من المفاجأة .
قربت له كوب الماء ليرتشف منه القليل
سيف : أنتي بتقولي إيه يا فريدة ..؟؟
فريدة : اللي سمعتوه طالما الأستاذ إياس مش عايز يتجوز يبقي أجوز مراد وهو خلص كلية ....
إياس : أنتي بتهزري صح ..؟؟
فريدة : لا خالص بتكلم جد الجد كمان ...
إياس : دى .. دى .. دى مفيهاش حاجة تدل علي إنها بنت ....
فريدة بتعجب : وأنت مالك أنت ... أنا متأكدة إنها هتعجب مراد ...
اقترب إياس من والده ليهمس قائلا : تكونش البت دى عاملة عمل لفريدة مخليها بتحبها من غير ما تعرفها كده ...
سيف : هي مش بتشتغل معاك أتصرف أنت ..
إياس : أنا بفكر أقتلها .......
سيف : طب اسكت بدل ما تبات بره ....
فريدة : خلصتوا مناقشة ... وأكملت بتحذير : إياك يا إياس البنت يحصلها حاجة .. فاهم ..؟؟
إياس : فاهم ...
فريدة : وهـ أقابلها امتي بقا ...؟؟
إياس : في الوقت اللي أنتي عايزاه .....
فريدة : تمام .. سيب رقمها وأنا أبقي أشوف امتي الوقت ده ....؟؟
إياس : هي حصلت لكده .. أنا ماشي عن إذنكم ...!!!!
خرج إياس من المنزل . ..
سيف : أنتي كنتي بتتكلمي جد .....؟
فريدة : وليه لا مش فاهمة البنت حلوة وكويسة ...
سيف : وأنتي تعرفيها عشان تقولي كده ....؟؟
فريدة : خليت حد يسأل عليها .. وطلعت كويسة إيه المشكلة أنا مش فاهمة
سيف : يعني أنتي مش عارفة إيه المشكلة .....
فريدة : مهو كفاية يوسف واللي حصل مش هأخسر حد من العيال تاني ..
سيف وهو ينهض : طيب .. اعملي اللي عايزاه ..
فريدة : أنت خارج ..؟؟
سيف : لا هأقعد في المكتب لما يجي مراد ابعتهولي ......