#كيدالنساء الحلقة ٧<br>
بقلم (ايلاف احمد زروق)
بعد ما حليمة قفلت من عبدالقوي بقت تفكر تعمل شنو ومر اليوم عادي وحليمة نومت اولادا بعد اتعشو واتعشت وقفلت بيتا ونامت <br>
بي هناك وصال وحاجة فاطمة مع نعمات جاهن عبدالقوي في شنو ي امي ووصال <br>
حاجة فاطمة: تعال ي عبد القوي شوف مرتك ما دايرة تاكل شوفا اتلقي عيانة ولا حاجة <br>
وصال:ي امي قالت ليك تعبانة ساي كدي ارح اتغدي اتي وخلي عبدالقوي اتفاهم معاها هو وصال ساقت امها عشان تفضي ليهن وطلعت مبسوطة لانها عارفة انو من يوم العرس عبدالقوي ما قرب من نعمات وهسي خلاص تمو العرس <br>
عبدالقوي:في شنو ي نعمات مالك مادايرة تاكلي <br>
نعمات:عامل فيها ما عارف يعني ات واحد اناني <br>
عبدالقوي:اتكلمي ذي الناس مش دا الدايراهو وقلتي اني ما راجل اها أثبت ليك رجولتي وتاني ما اسمع منك كلمة انا البتكلم وأمرك تعملي الدايرو انا بس وهسي قومي رتبي نفسك ورتبي الغرفة انا كلها باقي لي معاك يومين وراجع بيتي <br>
نعمات:ما بتجي تاني يعني معقولة انا عروس تفوتني كدة<br>
عبدالقوي:عروس انا عرستك تخدمي امي وتونسيها ما عرستك عشان نفسي خليك عارفة كويس وبجي بي مزاجي الوقت البكون دايرك فيو بجي <br>
نعمات بتعاين في عبدالقوي بي انكسار ودموعا نازلة وبتندب في حظها وفي الحال البقت عليها <br>
الصباح محمد اخو حليمة جاها في البيت عشان يوديها بيت ناس ابوها زي ما ورتو جهزت الاولاد وجهزت روحا وكوركت لي فتحية توصيها علي البيت وركبت مشت بيت ابوها ووصلت سلمت علي امها وابوها والاولاد سلمو علي جدهم وحبوبتن وقعدو يتونسو وبسألو من حالا وكيف عبدالقوي وهي بتقول الحمدلله بخير بس فاقداكم <br>
حاجة زينب :ي بتي طولتي مننا والله شوفتنا ليك زمن <br>
حليمة:اسوي شنو ي امي الاولاد المدارس وشغل ابوهم ما مخلين لي فرقة الاجازة دي بقضيها شغلة <br>
حاجة زينب:الله يعينك ي بتي ياها حال الدنيا والانشغال كتر <br>
حليمة:اتي ي امي الليلة ما عاملة ليك عصيدة مشتهياها لي زمن ما اكلتها من يدك <br>
حاجة زينب:اي خاتاها في النار الليلة الجمعة بنسويها معاها تقلية كدي النقوم عليها <br>
حليمة:كدي اقوم معاك ي امي <br>
حليمة قامت مع امها المطبخ وكان عندها شكاوي كتيرة غير الامانة الدايرة تختها عندها <br>
حاجة زينب:اها خير ي بتي قومتك وجيتك دي وراها شي وشي كبير البخليك تبقي صغيرة ولونك يقلب كدة شايلة هم شنو ي بتي اصلك ما عاجباني ويوم جمال الجاب لي دهبك وورق البيت ومفتاح عربية عبدالقوي وورقا معناها في حاجة حصلت لأنو البشتنة الفيك دي ما ساي<br>
حليمة:يمة عبدالقوي عرس فيني وبقت تبكي وهي راقدة في امها عرس ي امي واول مرة تحس انها ضعيفة كدة <br>
حاجة زينب:سجمي عبد القوي عرس كيف الكلام دا<br>
حليمة:عرس ي امي عديل كدة وانا جبت دهبي وحاجاتي عشان تدسيو لي عندك والله اخليهو يكره اليوم العرس فيو وهسي دا خاتم اشتريتو بي القروش الفاتا لي عشان هو مواعيد جيتو بعد بكرة <br>
حاجة زينب:وناوية علي شنو بيتك اوعا تفوتي ليو <br>
حليمة:افوت شنو البيت مسجل بي اسمي ما بقدر يشيلو مني <br>
حاجة زينب:هو بقدر يقول داير حاجة بعد العملو دا<br>
ي امي ابوي ما دايراهو يعرف عشان عندي معاو موضوع <br>
حاجة زينب:ان شاءالله ما بكلمو عارفاو ابوك بقول ليك ارجعي بيتك وامسكي أولادك ويعدل بينكم <br>
بعد اتونسو تب جهزو الفطور فطرو وشربو الشاي وامها مشت تسوي القهوة جات لي ابوها تفاتحو بي الموضوع<br>
حليمة :ابوي ات الدكاكين حقت عبدالقوي ما اتسجلت لسة وعبدالقوي خجلان ما يسألك وقال لي شوفيو الموت من الحياة ما معروف وقال يتسجلن بي اسمي انا<br>
الضحوي:والله ي بتي انشغلنا وجمال كل ما اقول ليو سجلن يتلخم و ينسى لكن بعد يجي عبدالقوي بنسجلن ان شاء الله <br>
حليمة:لالا ي ابوي عبدالقوي دايرني اسجلن بي اسمي انا ومالازم نستنى احسن نعملن من هسي <br>
الضحوي: اتي مالك مستعجلة كدة ي بت قلت ليك بعد يجي راجلك وبنتفاهم مع بعض خايفة اكل حق راجلك ولا شنو<br>
حليمة:العفو ي ابوي عارفاك والاحنا فيو دا من خيرك وكرمك<br>
حليمة سكتت وم عارفة تقول شنو ابوها كلمتو واحدة قامت قالت ليو والله ي ابوي عبدالقوي كلامو مسيخ وانا ما حملت كلامو عليك ات وجمال عشان كدة قلت انكلمك وقال لي لو الدكاكين علي الاقل لو مكتوبة بي اسمي انا ما كان قال حاجة وانا بس ما دايراو يفهم انك داير تاكلو في حقو<br>
الضحوي: عبد القوي قال كدة معقولة انا اكلو اصلو دا ما كلام كدي انتصل بي جمال اخوك الموضوع دا لازم ينتهي <br>
حليمة ابتسمت ابتسامة خبث كدة وعرفت انو مخططا ماشي زي ما دايرة حليمة قضت يوما مع اهلا ورجعت بيتا مبسوطة ودخلت اتصلت لي جمال اخوها عشان تتفق معاو انو بكرة تجيو بدري عشان يقضو الشغل سريع <br>
حليمة:كيفك ي اخوي ان شاءالله تمام <br>
جمال:حليمة كيفك اتي تمام وشكلك مبسوطة <br>
حليمة:كيف ما انبسط وابوي خلاص وافق يكتب لي الدكاكين بي اسمي واتصل ليك عشان نقضي البيعة <br>
جمال:اي كلمني ومستغرب اقنعتي كيف دا والله ي حليمة منك مخافة والله ان شاءالله بس ربك يهونا<br>
حليمة:بكرة بجيك عشان نقضي سريع عشان يوم الاحد المحروس جاي لازم يلقاني قضيت وكل حاجة <جمال:والله ي حليمة انا الموضوع دا قلبي ميابيو وعبد القوي ما بسكت لينا كدة كلو ولا حقو اتي براك عارفة<br>
حليمة:ي جمال عبد القوي ما بعمل حاجة وبعدين ما تخاف مهما كان انا مرتو واحنا الورق حقنا نضيف لو خايف من المحاكم ولو علي انا عبد القوي ما بضر ام اولادو<br>
جمال:انا عارف احنا ماشين عديل وما خايف عليك من عبد القوي انا خايف علي عبد القوي زاتو الخبر عليو حار وممكن يروح فيها ي حليمة احسبيها كويس<br>
حليمة:وما يروح فيها انا اعمل ليو شنو يعني انا عبد القوي ما هاميني ولا فارق معايا في حاجة ان مات ان طرشق انا حقي ما بخليو ي جمال اها نتلاقى باكر ودعتك الله <br>
جمال:خلاص عديلة مع السلامة <br>
جمال قفل من حليمة وبقا يقول البت دي ما نصيحةغايتو ي عبد القوي الجاياك من اختي ربنا يقويك ليها جنت رسمي <br>
حليمة قفلت منو وشافت اولادا واتكرفست نامت قالت باكر راجيني يوم طويل <br>
عبدالقوي قاعد في البيت لا بطلع ولا عندو نية بس مستني متين الاحد يجي ويرجع لي حليمة لأنو مشتاق ليها ولي اولادو وما متعود يبعد منهم كتير كدة<br>
نعمات من الصباح شغالة نضافة وغسيل وطبيخ وترهق في روحا شديد وبتتعب وحاجة فاطمة مبسوطة بس دي المرة الدايراها وما حاسة بي نعمات وعلاقتا مع عبدالقوي ولا هاميها بس دايرة زول يخدما وما فارق معاها علاقتة مع عبدالقوي لأنو عارفة عبدالقوي بحب حليمة ونعمات نفسياتا تعبانة لكن مضطرة تستحمل مافي مفر <br>
الصباح حليمة مشت لي جمال اخوهاوقضت الاجراءات والدكاكين اتسجلت بي اسما والورق بعد يطلع قالت لي جمال خليو عندك أمانة ومشت الكوفير اتظبتت عشان عبدالقوي بكرة بجي حنة وشعر وشيل وش وهي اصلآ جميلة وزادت جمال ورجعت البيت لقت فتحية اكلتن وشربتن فتحية الجارة الطيبة الكل اسرارا عندها <br>
فتحية:لالا عاد عروس جديدة شنو الحلاوة دي البركة الاتميزتي عشان يجي يلقاك كاملة و مكملة <br>
حليمة:اريتو يأثر فيو دا كلو عشان ما يحس اني عرفت <br>
فتحية:شكلك مبسوطة عشان عبدالقوي ولا في شي تاني<br>
حليمة:في حاجات كتيرة باسطاني طولنا ما قعدنا مع بعض كدي انعمل لينا قهوة عشان نتكلم بي مزاج <br>
فتحية: مزاجك الليلة تمام ان شاء الله دايمآ <br>
حليمة سوت القهوة و جات قعدت قالت لي فتحية انا الايام الفاتت دي كلها كنت بأمن في مستقبلي ومستقبل اولادي <br>
فتحية:كيف بتأمني في مستقبلك اوعي ي حليمة تكوني عملتي ليك حاجة طايشة بعرفك لمن تزعلي ما بتتفاهمي <br>
حليمة:لالا والله بس البيت والعربية والدكاكين كلهن سجلتهن بي اسمي حتى حساب البنك اتصرف منو كتير لأنو جاتني رسالة بي صرف تقيل من عبدالقوي وخفت يكملن في مرتو الجديدة فسحبت المبلغ وخليت حاجة بسيطةودخلتو في حسابي<br>
فتحية:الله يهديك ي حليمة بتجنني الراجل ولا مات بي صدمة عبدالقوي القرش ما بستخسرو فيك لكن تستغفليو حارة عليو غايتو اتي النصيحة ما بتقبليها لكن بقولا<br>
حليمة :ي فتحية اتي عارفة مكانتك عندي اتي اختي الماولدتا امي والموضوع دا عارفنو اتنين غيرك جمال اخوي وامي وانا عارفة بسوي في شنو شربن قهوتن وفتحية مشت بيتا واليوم مشي عادي وحليمة بتجهز في بيتا اتصل عبدالقوي وقال ليها انا بكرة من الصباح معاك قالت ليو حبابك البيت ينور بيك واتفقدت اولادا لقتن نامو ومشت نامت الصباح لبست اولادا وسوت ليهن الشاي شربو مرقوا علي مدارسن نضفت بيتا وبخرتو واستحمت وبقت جاهزة ومنتظرة متين عبد القوي يجي عبد القوي جا ودخل بيتو لمن عاين للحوش العربية مافي استغرب ودخل بيتو لقى حليمة قاعدة مستنياو.........<br>
>
<br>
م تنسو التصويت😍😍😍😍💓
يتبع.....
أنت تقرأ
كيد النساء
Mystery / Thrillerللكاتبة إيلاف زروق/تتحدث عن خيانه الرجل للمرأه حينهاتبدأ مكايدها له
