كيد النساء

كيد النساء21

بقلم. (ايلاف احمد زرزق)
#كيدالنساء الحلقة٢١<br>
حليمة دخلت لقت عبدالقوي سلم عليها وردت ليو السلام ودخلت غيرت هدوما وجات قعدت معاهن وعبدالقوي عينو ما نزلت من حليمة كانت بس مبسوطة عشان اولادا اول مرة يوم الجمعة يصحو بدري من عبدالقوي عرس والاولاد كانو مبسوطين شديد وقالو لي ابوهن يمرقن يتفسحو وعبدالقوي وافق لكن حليمة قالت ليهم امشو اتو انا تعبانة ودايرة انوم <br>
محمد:ي امي عليك الله ارح معانا كدة ما بنكون مبسوطين ياخ <br>
حليمة:والله تعبانة ي محمد مش شايفني بمرق بدري كيف<br>
اسامة :ي امي يوم واحد ما بتعبك بكرة اشبعي نوم<br>
محمد:نحنا زاتو ما بنتأخر بنجي بدري<br>
عبدالقوي:المرقة من غيرك ماليها طعم لازم تكوني معانا<br>
حليمة :طيب عديلة خلاص نمرق لكن بعد نفطر هنا اول والغدا نتغدا برضو هنا<br>
محمد:اي الدايراو كلو حاضر لكن دايرين احلي كيكة وشاي لبن من ايديك نعوض بيو شاي الصباح<br>
حليمة: خلاص انقوم اجهز الحاجات للمرقة <br>
الاولاد مبسوطين للمرقة دي وما مصدقين انو ايام زمان حاترجع وعبدالقوي مبسوط اكتر بي شوفتو ليهم مبسوطين ولي انو شاف الابتسامة في وش حليمة مع انو متأكد انو الابتسامة دي لي اولادا بس برضو ارتاح وانبسط<br>
ناس الحنة جايطين ونعمات مرتاحة في سريرا قاشرة اخر قشرة وتاكل وتشرب جو داخلين اهل العروس قامت واستقبلتن ودخلتن البيت وسلمت علي وصال وامنة وسألتن من عبدالقوي وقالن ليها كويس دخلتن ورقدت تاني في السرير <br>
حاجة فاطمة مع الاء بتها بتتونس معاها وبتشكي من عبدالقوي والبعمل فيو <br>
الاء:ي امي خليو بي راحتو عشان ما يزهج ويفوتك وبعدين اولادو ما بقنع منهم نهاي<br>
حاجة فاطمة:عارفة ي بتي&nbsp; ما بقنع من اولادو وحليمة كمان ما بقنع منها انا ما عارفة المرا دي عاملة لي اخوك شنو اتلقي كاتباو ما بسمع كلامي قلت ليو امشي ليك لي شيخ يرقى ليك حلف ما يمش وقال لي دا كلام فارق<br>
الاء:ي امي شيخ شنو وكتب شنو حليمة ما بتاعة الكلام دا والناس كلها عارفة عبدالقوي بحبها شديد والله احلى حاجة الواحدة تكون بتتحب بي الطريقة الجنونية دي ي ريت احمد يحبني كدة واكتر من كدة كمان<br>
حاجة فاطمة:يحبك ما لو ما بحبك ناقصة ولا معيوبة لاقيك وين هو عشان ما يحبك وحليمة دي عليك الله بتتحب <br>
الاء:النصيحة ي امي حليمة سمحة ومرة مجيهة والله البشوفا ما بقول معرسة ووالدة لسة محافظة علي روحا<br>
حاجة فاطمة :اي اكلت لحم ولدي كلو خلتو ماشي كدي برا بال وهسي جابت ليو جلطة كمان في صغرو الله يحفظو<br>
اتي عارفة انا قلت ليو ارفع عليها قضية عشان ترجع قروشك قال لي انا ادخل مرتي وام اولادي المحاكم والله لو عندي تاني تشيل ما بدخلا المحكمة<br>
الاء:حليمة زاتا عملت كدة وهي مالية يدها من عبدالقوي ومتأكدة انو ما بقدر يعمل حاجة <br>
حاجة فاطمة:مرة خبيثة اعوذبالله منها اصلو مافي مرة بتجيها القوة تعمل كدة والعجب اهلا زول سألا مافي<br>
الاء:قصدك مرة زكية ي امي واتعاملت مع الموضوع بي زكاء اصلآ الحصل حصل فأحسن تطلع بي ربح بدل خسارة<br>
حاجة فاطمة:ونسابتو الما احترموهو بعد طلع من المستشفى زول جاهو هنا مافي الشكية لي الله <br>
الاء:انا امنة اختي قالت لي اتي استفزيتيهن ي امي بمن ابو حليمة اداها كف اتلقى بطنن طمت منكم يجوهو هنا<br>
حاجةفاطمة:والله اتي وامنة اختك ونستكن مسيخة وعاجباكن حليمة هسي بتقيفن معاي انا ولا معاها مافي غير وصال البتفهم فيكن اصلو ما بتريحني في الكلام اها اتخمدي انا قايمة اشوف لي حاجة بدل اواجع قلبي معاك<br>
الاء:ي امي هسي مالي انا قلت ليك الحقيقة وانا لا واقفة معاك ولا واقفة مع حليمة وقصة الاء مع حليمة حاجة قديمة ووصال لي هسي شايلة منها عشان كدة بتجاريك وما بتريدا<br>
حاجة فاطمة:انا قايمة اشوف عبدالله بي هناك لا بدخل اصبح لا بمسي الشكية لي الله انا اتقول ما امكم كلكم كدة شايلين مني<br>
الاء:لالا ي امي العفو كيفن شايلين منك كدي امشي وتعالي <br>
مشت حاجة فاطمة لي عبدالله قاعد في الصالو وكان ماسك التلفون بتكلم مع امنية واخر ونسة وضحك مبسوط شديد جات داخلة امو سمعتو بتكلم معاها ويقول ليها اتي امنيتي في الحياة دي بس ربنا يجمعنا ان شاءالله قريب<br>
حاجة فاطمة:يجمع زنوبك ات وياها وانا اقول الولد دا غاطس وين تراهك مع العذبة دي <br>
عبدالله:برجع ليك ي امنية بعدين وقفل منها الخط وقبل لي امو في شنو ي حاجة مالك هايجة وزعلانة كدة<br>
حاجة فاطمة:انا مش قلت ليك موضوع البت دي تنساو وما تجيب سيرتا متواصل معاها لسة شفت لو انطبقت السما والواطة البت ما بجمعك بيها لا خير لا شر وهسي لا بتدخل تسلم لا بتصبح مالك ي جنى نحنا اعدائك وما عارفين ولا شنو<br>
عبدالله:لا ي امي وموضوع امنية ما بنساهو انا دايرا في الحلال اتي لي شنو ما دايرة تفهميني ياخ عذبة بي اولادا انا دايرا كدة بس ماشة تعرسيها اتي ولا انا<br>
حاجة فاطمة: مافي ليك ات راجل اي بت تتمناو مالك بتعرس ليك فضلة راجل شفت السما قريبة الا اموت انا عشان تعرسا مستحيل اخليك ما تعشم ساي مافي ليك<br>
عبدالله:عديلة ي امي وانا عرس ما بعرس غيرا <br>
حاجة فاطمة:خلاص اقعد كدة ولا تعرس <br>
عبدالله:ياخ فايت ليك البيت دازاتو عشان تستريحي ي امي وما جاي تاني نهاي <br>
حاجة فاطمة:تعال هنا ي ولد انا بتكلم معاك وعبدالله مرق منها زهجان<br>
حليمة حضرت الكيكة وسوت الفطور فطرو كلهم ولبسو وجهزو نفسن وعبدالقوي دق لي عبدو السواق يجي يوديهن بي العربية ومشو المنتزه فرشو الفرشة وقعدو والاولتد انطلقو في المنتزه حليمة وعبدالقوي قاعدين في الفرشة<br>
بس اي واحد فيهن داير يتكلم وما قادر <br>
علدالقوي:اخبار الشغل شنو والمشكلة ان شاءالله انحلت<br>
حليمة:اي انحلت واتخيل انو كان في زول قاصد انو ياكلك وكان بدعي انو البضاعة مجودتا ما عالية<br>
عبدالقوي:معقولة دا منو دا انا ناسي كلهم قدام ما عندي زول جديد<br>
حليمة:ياسر المخليو مسؤول من كل حاجة في غيابك البوزع البضاعة اكلك في السعر مطابق اربعة مرات من سعر الدفتر<br>
علبدالقوي:ياسر ياخ لا مستحيل يعمل كدةوعرفتي كيف اتي <br>
حليمة شرحت ليو العملتو كلو لحدي ما اعترف براو وورتو انو شالت منو العربية والقروش العندو لسة ما تمت وانها ممضياهو علي شيكات لو ما سدد بتدخلو السجن عبظالقوي كان مخلوع من حليمة وكيف قدرت في سوم واحد تحل مشكلة كبيرة ذي دي <br>
عبدالقوي:يعني قدرتي تفهمي الشغل سرعة<br>
حليمة:يعني شوية شوية اتعودت بس شوية متعب مع شغلة البيت والاولاد<br>
عبدالقوي:اوعا بس تكون في اشكالية وحركات الرجال دي يعني انتي مرة ووسط السوق اممم<br>
حليمة:مافي حاجة اخاف منها وما انا البتعاكس واسكت ما في زول لحدي الان اتجرأ يعمل حاجة معاي<br>
عبدالقوي:كويس <br>
حليمة:يدك بقت كيف ماا تحسنت بالعلاج الطبيعي <br>
عبدالقوي :احسن الحمدلله بشكرك انو اتكفلتي بي حق العلاج<br>
حليمة:كلو من خيرك ودي قروشك ما من قروشي انا <br>
عبدالقوي: قروشي وقروشك مش في النهاية حاجة واحدة<br>
حليمة:يمكن<br>
عبدالقوي حبا قغير الموضوع بعد شاف حليمة ملامحا اتغيرت كدة وقال ليها الاولاد مبسوطين شديد الليلة اول مرة احس انو انا غالي عليهم كنت دايمآ حاسي انهم مايلين ليك اكتر مني<br>
حليمة:كانو بسألو منك كتير والبعد برضو ليو دورو <br>
عبدالقوي:فعلآ البعد ليو دورو والحاجة الغالية علينا دايمآ بنعرف قيمتا بعد نفقدا وتبعد مننا وبنحاول نرجعا<br>
حليمة:بس بعد فوات الاوان احسن الزول ينسى الموضوع<br>
انا ماشة اشرب لي موية ودايرة اتمشى شوية اخد راحتك ودي المخدة لو داير تنوم <br>
عبدالقوي:ما تخليك معاي شوية عليك الله <br>
حليمة:ما بقدر والله مخنوقة ودايرة اتنفس شوية <br>
عبدالقوي:اتفضلي واتضايق من طريقة كلام حليمة وعرف انو زودا شوية معاها <br>
ومشت حليمة وهي مخنوقة وما قادرة تعبر ليو عن شوقا وعن انو هي خلاص بقت ما قادرة علي بعدو بس لازم تكون قوية في نظرو وبقت تقول عبدالقوي ما ياهو الزمان دا واحد غيرو انسي ي حليمة وخليك في حياتك الجديدة <br>
في بيت ناس نعمات الناس جو من الصلاة وعبو الغدا والناس اتغدت وبدو يجهزو لي قعدة الحنة والحفلة<br>
حاجة فاطمة:ي الاء قومي عبي لينا الغدا دا خلينا نتغدا <br>
الاء:حاضر يامي بقوم هسي بعد انهي المكالمة دي ايوة ي احمد مبروك الف مبروك الحنة <br>
احمد :الله يبارك فيك باقي اسبوع بس ي الاء ونكون سوا <br>
الاء:ربنا يتمو علي خير ان شاءالله<br>
احمد :اللهم امين اها يلا الشباب ديل زهجوني وامشي سوي الغدا دا واتغدي مع السلامة <br>
الاء:مع السلامة<br>
حاجة فاطمة: ي بت انا بتكلم معاك بتطاؤشي في الحديث مالك <br>
الاء:كنت بتكلم مع احمد ي امي<br>
حاجة فاطمة:كلها اسبوع ما فيكن صبر نهاي<br>
الاء:كدي انقوم اسوي الغدا قبل تستلميني ي امي والله ما ناقصة لي وجع راس<br>
حاجة فاطمة :البجيب وجع الراس منو غيرك هسي<br>
حليمة جات ولقت عبدالقوي نام ولؤي نايم في يدو بتعاين فيهم وتضحك واتمنت انو تكون عرس عبدالقوي والعملو كلو حلم وتصحا منو وجو محمد واسامة وعمر قالو جيعانين <br>
حليمة:طيب خلاص نمشي البيت نتغدا هناك <br>
محمد:ي امي خلينا نتغدا في اي مطعم قريب ي امي ياخ ما دايرين طبيخ <br>
حليمة:بس نحنا اتفقنا علي شنو<br>
محمد:عليك الله يا امي خلينا نتغدا ونمش البيت<br>
عبدالقوي صحا علي كلامن وقال ليهن ارح نمش المطعم نتغدا ونطلع البيت ودقا لي عبدو وجا وساقن مطعم اكلو وشربو ومرقو علي البيت وكان احلى يوم بالنسبة للأولاد ولي امهم وابوهم بس بكابرو وهم كل واحد مبسوط اكتر من التاني وصلو البيت والاولاد تعبانين واي واحد طلع سريرو ونام وعبدالقوي وحليمة برضو كانو تعبانين حليمة دخلت غرفتا غيرت ونامت وعبدالقوي دخل المطبخ شرب ليو موية ودخل غرفتو لقى حليمة نايمة رقد جنبها ونام <br>
حننو العريس احمد وسو الحفلة وبعد انتهت وصال وامنة وبناتا مارقين كوركت ليهن ام نعمات يستنو نعمات تمش معاهن<br>
نعمات: ي امي دايرة ابيت هنا الليلة<br>
اسيا:ما تدي راجلك فرصة امشي بيتي معاو وبعدين ماشة ترقدي مافيك لي مساعدة وختة الراس دي احسن تكون جنب راجلك يلا امشي معاهن<br>
نعمات: طيب ي امي اجيب حاجاتي واجي ومشت معاهن وصلو البيت وسلمو وبقو يوصفو في الحنة والحفلة والناس <br>
حليمة صحت من النوم لقت عبدالقوي جنبها قامت براحة طلعت المطبخ شربت موية واستحمت وصلت المغرب والعشاء سوا مشت فقدت الاولاد لقتن نايمين ....... <br>
<br>
م تنسو التصوييييت 😍😍😍😍💓
يتبع.....