بقلم (ايلاف احمد زروق)
#كيدالنساء الحلقة ٢٦<br>
حليمة:قلتي شنو ي فتحية <br>
فتحية:اولاد ابراهيم جايين اربيهم ليو فهمتي ولا افهمك <br>
حليمة:واتي موافقة <br>
فتحية:ولي شنو ما اوافق في زول برفض النعمة <br>
حليمة:نعمة شنو ي فتحية ديل اولاد ضرتك<br>
فتحية:وضرتي تحت التراب الله يرحما ويغفر ليها <br>
حليمة:والله ي فتحية ما قادرة افهمك <br>
فتحية:بعد تشوفيهم بتفهمي حلات الدنيا عليهم ولدين وبت <br>
حليمة:غايتو الله يعينك <br>
فتحية:قولي الله يهنيني بيهن اها ماشة علي بيتي عشان أجهزة يمكن يجيبن الليلة ولا باكر <br>
حليمة:اها امشي ي الفرحانة <br>
فتحية:فرحانتين كمان يلا <br>
حليمة فاتحة خشما من حركات فتحية وقالت دي جنت رسمي مشت البكا قلنا واجب كمان تربي اولاد ضرتا كدي امشي اشوف همي احسن من التتنحة في فتحية <br>
وصال طولت ما شافت اولادا ولا مشت بيتا جاتا امها <br>
حاجة فاطمة :ي وصال اتي استحليتي القعدة هنا واولادك ما جايبة ليهم خبر امشي شوفيهم اخبارن شنو ودايرين شنو<br>
وصال:ياخ مع حبوبتن ما بتديهم عوجة ي امي راسي مواجعني ما دايرة لي كلام كتير <br>
حاجة فاطمة:سجم خشمك بتجدعي اولادك كدة من غير ما تعرفي الحاصل عليهم شنو <br>
وصال:ي امي امرق افوت ليك البيت دا ولا تقفلي السيرة<br>
حاجة فاطمة:اي كلكم تشبهو مالكم البسألو كلو يطير فوقي وزهجانين كدة عبدالله خطب وما طايق يشوف خلقتي وعبدالقوي صاري وشو اليوم كلو واجيو يقول لي بعدين ي امي قبال ما افتح خشمي زاتو وهسي اتي ما رضيانة السؤال انا ان خليتك كدة كضبت عليك قومي شوفي اولادك وسوقيهم وارجعي بيتك لي راجلك <br>
وصال:راجلك راجلك ياخ انا كرهتو الراجل دا غصبتوني عليو وانا ما دايراهو ي امي كل منك اتي زنيتي لي في راسي عشان اوافق بيو وانا عايشة معاو عيشة تقرف<br>
حاجة فاطمة:انا غصبتك لي مصلحتك دي وان نسيتي العملتي زمان ازكرك دايرة توطي راسنا مش وود عمك راجل لو واحد غيرو والله عين ما يعاين فيك قومي من غير كلام اغشي ناس عمك سوقي اولادك وبيتك انا طاوعتك علي حاجات كتيرة لكن الخراب لا ي وصال قومي سريع والا والله الا تشوفي حاجة مني ما شوفتيها<br>
وصال:ماشة ي امي لكن تاني ما بتشوفي وشي دا تاني <br>
نعمات جات علي صوت الكواريك وقالت ليهن في شنو واحدة ردت ليها مافي كل واحدة تتكلم ونعمات ي الله دا شنو كل يوم نتصبح بي مشكلة وفاتتن في شكلتم ولبست مارقة بيتن لمن جات لابسة شافتا حاجة فاطمة وقالت ليها لابسة ماشة وين اتي كمان <br>
نعمات:ماشة بيتنا من العرس ما شفت امي تاني<br>
حاجة فاطمة:ادخلي جوة سريع امرقي هدومك وتعالي سوي الفطور دا بلا مرقة معاك <br>
نعمات:بس انا ..<br>
حاجة فاطمة:يلا سريع بلا بس معاك <br>
مشت نعمات غرفتا مرقت هدوما وقفلت الباب ونامت<br>
وصال مشت ناس عمها ولقت مرت عمها قاعدة اسمها صفية<br>
وصال:السلام خالتي كيفك ان شاء الله كويسة <br>
صفية:والله نحمدو ونشكرو وين اتي ي بت ليك زمن مختفية واولادك جادعاهم ومهملاهم ما عندك كبير يديك راسك<br>
وصال:ي خالتي والله ما ناقصة لي محاورات ولا فيني حيل ليها الاولاد وين <br>
صفية:مالك مافيك حيل بسوي في شنو السنة جت عند ناس أمك ولدي خلاص غسل وشو منك تب <br>
وصال:والله انا ولدك ما هاميني ان غسل وشو ان غيرو انا جيت اسوق اولادي <br>
صفية:اولادك مع ابوهم قال المدارس والتراحيل بتجي بي هناك ساقن ومشى بيهم انا قايلة جاب ليو مرة تهتم بيهن <br>
وصال:عمار عرس<br>
صفية:ما عرس مرا شغالة لكن بي حركاتك دي ياهو المعرس <br>
وصال:خلاص كويس ماشة ليهم البيت <br>
مرقت وصال تتنفس اتخلعت من قولة مرا ومشت علي بيتا لقت مرا شغالة في البيت والبيت فاضي <br>
وصال:اتي منو <br>
الشغالة:انا اسمهان شغالة هنا اتي منو<br>
وصال:انا صاحبة البيت بعد تخلصي شغلك امشي<br>
اسمهان:بس الاولاد لسة ما جو وما عملت الاكل وانا دوامي بنتهي ٨ مساء<br>
وصال:اظن ما بتسمعي خلصي وامشي من غير كلام كتير <br>
اسمهان:طيب حاضر <br>
وصال:انا داخلة انوم جوة ما دايرة اي ازعاج اصحا من النوم ألقاك مافي<br>
اسمهان اتصلت لي عمار وقالت ليو في مرا جات وقالت هي صاحبة البيت وقالت لي امشي <br>
عمار:ما تمشي انتظريني لمن اجي انا و اعملي اكل الاولاد الساعة٢ بجو <br>
اسمهان:خلاص كويس بستناك<br>
حليمةقاعدة في البيت لا شغلة ولا مشغلة زهجانة شديد ي نجوى تعالي دايراك في موضوع<br>
نجوى:اها موضوعك شنو<br>
حليمة:دايرة اعمل لي مشروع حلويات من البيت رايك شنو<br>
نجوى:والله كويس احسن ما تقعدي كدة<br>
حليمة:ياخ شغلة متعبة وما بقدر عليها<br>
نجوى:طيب شوفي غيرا<br>
حليمة:انا ما عارفة مالي زهجانة <br>
نجوى:والله الملل والزهج بجو من الوحدة ما شفتك جاتك صاحبة هنا ولا جارة غير فتحية <br>
حليمة:كدي اقوم امشي اشوف السوق اجيب لي حاجات واجي يمكن الزهج دا يروح مني <br>
لبست ومرقت حليمة السوق ما خلت حاجة ما جابتا وقعدت في المطبخ تطبخ وتسوي في حلويات ومخبوزات وتجليات وحاجات باردة<br>
نجوى:عندك ضيوف الليلة ولا شنو<br>
حليمة:لالا ما عندي بس الزهج بفكني لمن اطبخ بس <br>
نجوى:حاجات حلوة انتي طباخة والله واكلك سمح وطاعم <br>
حليمة:شكرآ ليك تسلمي <br>
عبدالقوي في الشغل برضو زهجان مستني الضهر بي فارق الصبر عشان يلاقي حليمة الليلة ماشي يقيل مع الاولاد كان كل مرة يمش ما بشوف حليمة الليلة قال لازم يلاقيها خلص شغلو واتصل بي عمو عبدو عشان يجيو وبي هناك الاولاد جو ومنتظرين ابوهم ليو امهم عاملة حاجات حلوة انبسطو وحليمة مشت انو الليلة مواعيد عبدالقوي قعدت كلهم والعربية ملانة اكل وحلويات وعصاير <br>
محمد:في شنو الليلة ي امي دا كلو ناكلو <br>
حليمة:مافي حاجة بس حبيت اعمل الحاجات دي طولت منها ما عجبكم<br>
اسامة:كيف ما عجبنا الليلة احلى اكل والله <br>
الباب فتح دخل عبدالقوي ودخل عليهم لقاهم ياكلو وحليمة قاعدة المرة دي عاينت ليو وجا سلم عليها وبسأل فيها وهي عشان اولادا ما قدرت تقوم ولا عندها عذر ليهم قعد عبدالقوي ولمن شاف الاكل قايل حليمة سوتو عشان جيتو انبسط شديد وبقا يشكر في الاكل وحليمة بس بتاكل ساكتة اكلو وقامو عشان وشربو العصير حليمة ماشة علي الغرفة عبدالقوي مسكا وقال ليها ماشة وين <br>
حليمة:تعبانة دايرة استريح <br>
عبدالقوي:خليك معانا شوية عليك الله <br>
حليمة:ات متقصد انك تنرفزني كل مرة مش قلت ليك تجي ماعندك معاي حاجة خليك مع اولادك وبس <br>
عبدالقوي:ما متقصد لكن اسوي شنو اشتقت ليك والله اشتقت لي كوراكك اشتقت لي حليمة الزمان لي قعدنا سوا وضحكك وونستك كلو فاقدو انا من غيرك ولا حاجة <br>
حليمة:عبدالقوي ات اخترت حياتك وات الفقدتني ما انا وات الخسرتني لي شنو ما داير افهم انا مستحملة دا كلو عشان الاولاد بتحمل وجودك وكلامك حتي سيرتك كلو عشان اولادي بس انا تطراني اتخطاهم وتشوف حاجة تانية خليني في حالي وامشي قضي وقتك مع اولادك احسن ومشت منو دخلت غرفتا وقفلت الباب وشبعت بكا (مرات بنكون دايرين شي لكن في حاجة جوانا بتمنعنا وبنحاول نتخطاها بس ما بنقدر ودي حال حليمة ما قادرة علي بعد عبدالقوي بس لمن اتزكر عملتو ترجع تاني)<br>
عبدالقوي قضى وقتو مع اولادو ومشي علي البيت علي دخلتو لقا امو من شافتو بقت تشكي ليو من نعمات وانها طابلة روحا في الغرفة من الصباح ولا سوت ليها حاجة وبتتكلم معاها ما بتسمع كلاما<br>
عبدالقوي:مش دي اتي الاخترتيها لي اتصرفي معاها براك وفات منها<br>
حاجة فاطمة:بري ي يمة مالن اولادي بقو جت ما طايقين لي كلمة الله يعيني عليهم <br>
عبدالقوي بدق لي نعمات الباب ي نعمات افتحي انا عبدالقوي<br>
نعمات نطت من السرير ومشت فتحت ليو كانت لابسة قميص عريان وضيق وقالت ليو جيت مالك اتأخرت كدة<br>
عبدالقوي قبل منها كدة وقال ليها البسي ليك حاجة بدل اللابساو دا <br>
نعمات:انا مسخنة ومالك مقبل كدة انا مرتك <br>
عبدالقوي:مسخة كيف المكيف فاتح والغرفة باردة شديد <br>
نعمات:الحمل مسخن بي أدخل <br>
عبدالقوي:بعد تلبسي ليك حاجة بدخل <br>
نعمات :طيب ماشة البس ات مستحيل تبقيني ليك مرا <br>
لبست وعبدالقوي شال هدوم ومشي استحمى وجا نام<br>
عبدالله جا داخل لقا امو قاعدة وبقا يتكلم معاها وقال ليها انو خطب امنية ودايرك تمشي تحققي الخطوبة دي <br>
حاجة فاطمة:وآلله ان بقت اخر مرا انا ما بمش ليها <br>
عبدالله:دا اخر كلامك ي امي وانا ما بعرس غيرا<br>
حاجة فاطمة:ات بس المقوي راسك علي اخوانك مافي واحد رفه راسو فوقي عبدالقوي رفعنا ليو حليمة بس في النهاية كسرتو ليو وات برضو بتمشي بي كلامي والبت دي ما يعرسا<br>
عبدالله:اتي بس دايرة تجهجهينا ياخ انا البت رايدا ي امي بس خليني اعمل حاجة بي رضاي طلعتيني من المدرسة عشان امسك الورشة ما عارضتك واي حاجة دايراها بسويها ليك لكن دي حياة لي بعدين ما ممكن بي مزاجك اتي وهدا اخوي خربتي بيتو وخليتيو من جاي لي جاي انا ما بعمل كدة غير امنية ما بعرس<br>
حاجة فاطمة:وطول ما انا حية ما بتعرسا ي عبدالله <br>
عبدالله:بعرسا ي امي رضيتي ولا ما رضيتي ومرق منها غضبان مشي علي الورشة حاجة فاطمة لبست اولا ومرقت علي بيت ناس امنية ودخلت لقت امها قاعدة ومن بعيد من غير سلام ي خلود لمي بتك العذبة من ولدي انا ما عندي ليك ولد بديك ليو....
م تنسو التصويت😍🔥❤
يتبع....
أنت تقرأ
كيد النساء
Mystery / Thrillerللكاتبة إيلاف زروق/تتحدث عن خيانه الرجل للمرأه حينهاتبدأ مكايدها له
