#كيدالنساء الحلقة ٨<br> بقلم( ايلاف احمد زروق)
عبد القوي جا ودخل بيتو لقى حليمة قاعدة مستنياو مجيهة وقاشرة والبيت دا متغير غيرت وضع الأثاث انبسط شديد ودخل سلم عليها وكلام الشوق وانو طول منها ومن الأولاد وهي بس كانت مبتسمة لكن جواها كانت مولعة قالت كدي اقعد انجيب ليك عصير اتلقي طولت ما شربت في بورتسودان العصير المشكل <br>
عبدالقوي:ي سلام طولت ما شربت من يدك لأنو عندك طعمو احلي سوت العصير وجابتو ليو وقال ليها تسلمي لي <br>
عبدالقوي بعد شرب العصير قاعد بتونس معاها وسألا اتي ي حليمة العربية برة ما شايفة ما تكون فيها حاجة <br>
حليمة:والله شكلا فيها مشكلة محمد اخوي كان داير يسوقنا بيها بيتنا ابت تمش اها قلت لي جمال يشوفا لينا مالا <br>
عبدالقوي:معقولة العربية دي لحدي اخر يوم كانت كويسة الا يكون عبدالله اخوي عمل بيها حاجة وما وراني<br>
حليمة:ما تظلم اخوك ي عبدالقوي لحدي ما جابا كانت مافيها حاجة ووقفا واداني المفتاح في يدي لكن يمكن الوقفة اثرت عليها <br>
عبدالقوي مستغرب في دفاع حليمة لي عبدالله أخوه وقال ليها يمكن والله وبعدين شنو الحلاوة دي بقيتي حلوة شديد<br>
حليمة:انا من يومي حلوة مافي حاجة جديدة ات الما بتشوف شكلك <br>
عبدالقوي:كيف ما بشوف انا من اول مرة شوفتك فيها انا حياتي انقلبت فوقاني تحتاني خليتي لي حياتي طعم تاني <br>
حليمة:ما اظن ي عبدالقوي ات بقيت ما زي زمان اتغيرت<br>
عبدالقوي:كيف اتغيرت فيني حاجة جديدة تقول اني اتغيرت<br>
حليمة:راجع نفسك ي عبدالقوي كدي انا قايمة اشوف الفطور <br>
عبدالقوي بقا يتكلم مع روحو المرة دي مالا وبترمي لي في الكلام من قبيل شكلا عارفة موضوع عرسي وبتجاري فيني ساي الله يستر من سكوتا دا انا كان من الاول اشاورا بدل اكون كدة خايف ومدسي منها ومن مواجهتا <br>
في بيت ناس حاجة فاطمة الاء اتحبست لي العرس من احمد والبيت جايط ونعمات بس ميتة في الشغلة تدخل وتمرق الفي والمافي تجيبو <br>
حاجة فاطمة:ي نعمات كدي تعالي هاك جيبي لي الاء دي رصيد من الدكان انا والله ما بقدر اقوم والبت تنبح فيني من قبيل<br>
نعمات:حاضر ي خالتي بمش وشالت القروش ومرقت تكلم برا من راسا هسي انا عروس دا عرس شنو ي ريتني قعدت مع امي احسن لي من الزل دا لا راجل لا اهلو مافي زول فيهن بحس عروس ليها اسبوع تطلع الدكان الزي هسي في شهر العسل ولا نايمات انا من الصباح من نضافة لي غسيل وبقت كمان مراسيل لأتفه الأشياء غايتو الله يصبرني بس<br>
جابت الرصيد وجات راجعة ادتو ليها(نعمات ما مسكينة لي الدرجة دي نعمات مكسورة من الحصل ليها وكلام الناس اثر فيها وامها كانت كل ما الوقت يمر وبتها جنبها كانت تبكي وتنوح ي ربي البعرسك منو تاني بقت خايفة علي امها ومافي يدها شي غير الصبر)<br>
الاء:شكرآ ي نعمات كدي تعالي اقعدي من الصباح ما قعدتي <br>
حاجة فاطمة:تقعد وين ي الاء والبسوي الشاي والحاجات الجابوهن البنات ديل البعبيهن منو بعد تنتهي شغلتا تقعد<br>
نعمات مرقت من الاحراج الاحرجتو ليها حاجة فاطمة قدام البنات وقعدت في المطبخ شغالة وتبكي<br>
عبدالقوي وحليمة فطرو زين وشربو الشاي وبتسوي في القهوة لؤي جا من الروضة وسلم على ابوهو وقعد معاهن <br>
عبدالقوي جاو اتصال من الاء اختو خاف تكون دي نعمات عاين لي حليمة لقاها مشغولة في المطبخ دخل غرفتو ورد عليها الاء كيفكن طيبين في حاجة <br>
الاء:مافي حاجة كويسين دي امي دايراك<br>
حاجة فاطمة:الو عبدالقوي اسمعني عرس اختك حددو وانا بكرة عندي دق الريحة والدلكة دايرة لي بهيمة ودايرة خضار <br>
عبدالقوي:ان شاء الله ي امي بجيبن ليك عبدالله خليو يغشاني بكرة في الشغل بديو القروش <br>
حاجة فاطمة:وات جاينا متين ما تطول عليك الله من بت الناس<br>
عبدالقوي:يمة مالك ومال بت الناس انا قلت ليك بجي بي مزاجي وبعدين انا دابي دخلت بيتي شنو شغالة اتصالات وبت الناس شكت ليك مني<br>
حليمة جنب الباب سمعت المكالمة كلها شافتو لمن قام علي الغرفة جات جارية عشان تشوفو بتكلم مع منو وبعدها رجعت بي دربا علي المطبخ عبدالقوي طلع قعد برا حليمة جابت القهوة وجاتو ات ي عبدالقوي بتكلم مع منو كنت <br>
عبدالقوي: عرفتي كيف كنت بتكلم في التلفون علي العموم مع امي الاء حددو عرسا وبكرة عندها دق الريحة دايرة ليها ضبيحة وخضار <br>
حليمة: سامعةصوت الاتصال وشغتك قمت دخلت جوة الاوضة ومبروك ليها والله تستاهل الاء وامك ما قالت ليك كلم مرتك ولا كالعادة اي حاجة اعرفا من برا <br>
عبدالقوي:اتي ي حليمة يعني لو كلمتك بتمشي <br>
حليمة:بمش لي شنو ما امش ما ديل اهل اولادي لازم اظهر معاهن ولا كيف ي عبدالقوي <br>
عبدالقوي :ي ريت والله لكن ما بتقعدن سوا كلكم لازم تعملو مشكلة من مافي<br>
حليمة:الله يسامحك انا بتاعت مشاكل خلاص اشرب قهوتك دي بردت <br>
عبدالقوي:اتي ي حليمة الايام دي متغيرة وزي البقيتي معاي جافية كدة وحادة ما عارف بس فيك حاجة متغيرة<br>
حليمة:انا متغيرة بري والله ات البقيت تشوف حاجات مافي <br>
عبدالقوي:يعني مافي حاجة داساها مني ي حليمة <br>
حليمة:مافي حاجة الا تكون انت داسي حاجة وحاسي بي ذيك <br>
عبدالقوي:بتوتر انا حاكون داسي شنو يعني مافي حاجة<br>
حليمة:مواعيد الاولاد جات ماشة اجهز ليهن حاجة ياكلوها وعصير بجو تعبانين وزهجانين <br>
عبدالقوي:أيوة خلاص انا داخل جوة اخد لي نومة <br>
نعمات عبت البسكويت والكيك الجاية البنات لي الاء وقدمت العصير و الشاي والقهوة وزول معاها مافي لمن انتهت بقت شغالة في الغدا والناس بي هناك مبسوطين ويتونسو جات داخلة امنة اخت عبدالقوي ساكنة في الولايات بعيدة جات من سفر و معاها بتين كبار واولادا تلاتة وشايلين الشنط جو لي عرس الاء <br>
امنة:السلام عليكم امي ي الاء كيفكن ي ناس <br>
حاجة فاطمة:حبابة والله حبابة ادخلي ي بتي ادخلي بي وليداتك جوة ودخلت امنة وسلمت علي امها بحرارة وشوق ودخلو البنات سلمو علي حبوبتن وخالتن<br>
الاء :يعني الا امي تحلف عليك لي الجية عشان تجي<br>
امنة:كيفك الاء والله مشتاقين ليك شديد تقولي شنو اها غبنا من المدارس وجيناك قصرت معاك ي اختي <br>
حاجة فاطمة :ي اولاد تعالو سلمو <br>
ودخلو مدنقرين من الخجل سلمو عليهن <br>
حاجة فاطمة:والله كبرتو ي اولادي ربنا يحفظكن <br>
امنة :بخجلو ي امي البيت ملان ماشاءالله <br>
حاجة فاطمة:كدي ارحكن بي هناك عشان تاخدو راحتكن <br>
ومشو مع حبوبتن (امنة عندها عبدالقوي دا علي اخوها سمتو وصلاح علي جدو ابو ابوهو ومحمد الصغير والبنات اكبر من الاولاد عندها رونق و علا)<br>
حاجة فاطمة:ي نعمات ي نعمات تعالي نعمات بتسوي في الغدا جات جارية علي صوت حاجة فاطمة <br>
نعمات:اي ي خالتي.<br>
حاجة فاطمة: تعالي سلمي علي امنة بتي واولادا<br>
نعمات سلمت عليهن وامنة شاغلتا وسلمت عليها وباركت ليها العرس وحاجة فاطمة قالت ليها سوي العصير واستعجلي الغدا دا سريع اتلقي جيعانين <br>
امنة:ما جيعانين ي امي خليو الغدا هسي فطرنا في الطريق متأخرين نشرب العصير بس وقهوة بتقوم تسويها رونق <br>
حاجة فاطمة:اجي كيفن الكلام دا بتسويها نعمات القهوة البت جات من سفر تعبانة تدخل المطبخ<br>
نعمات:مافي تعب والله اصلآ القهوة جاهزة <br>
امنة :تسلمي يديك العافية <br>
ونعمات مشت تسوي العصير والقهوة<br>
امنة:يمة اتي جادة البت عروس ليها اسبوع تدخليها المطبخ <br>
حاجة فاطمة:و مالو يعني وبعدين دايراني اشتغل انا ولا شنو<br>
امنة :لا العفو ي يمة لكن صاحبات الاء جوة لو قلتي ليهن قومن ما بقومن وبعدين ياهو حوجتن في المناسبات الصاحبات ووصال وين المفروض كل يوم تجي البيت ما قريبة ليك لكن تخلي العروس تدخل المطبخ شينة في حقك ي امي وعرستك لي عبدالقوي بي القوة ي امي ما صاح منك واتي عارفة دا حايكون نتيجتو شنو حليمة ما بتعديها ليو بي الساهل المسكين <br>
حاجة فاطمة:هي ي امنة بتين جيتي وتدي فيني في دروس ي بتي انا ادرى بي مصلحة ولدي وانا البت دي عرستها لي اخوك عشان تونسي وتخدمني ماعشان ترقد لي في السرير وحليمة ماشة تسوي شنو والله بس طلقة واحدة تجيب راسا في الواطة دي في النهاية مرة ان قوت وان ضعفت الراجل بكسرا بي كلمة منو بس وحليمة مقدور عليها <br>
امنة:ان شاء الله ي امي حليمة ما تسوي حاجة <br>
نعمات جابت العصير والقهوة وامنة واولادا شربو العصير ونعمات مشت علي شغلتا <br>
امنة:رونق وعلا بعد ارتحتو وغيرتو امشو ساعدو نعمات في الغدا ي بناتي <br>
حاجة فاطمة:يمشو وين ي امنة بناتك جو من سفر تعبانين<br>
رونق:مافي تعب والله واحسن ننشغل عشان ما نزهج <br>
علا:اصلآ حانقعد في تلفوناتنا احسن نقوم <br>
حاجة فاطمة سكتت والبنات مشو وساعدو نعمات <br>
نعمات:لالا ياخ جيتو من سفر تعبانين اختو راحتكن براي بسوي الغدا<br>
رونق :والله مرتاحين ما تعبانين خلينا نساعدك الشغل كتير عليك براك <br>
نعمات انبسطت من بنات امنة وقالت خلاص الحمدلله الله جاب لي زول حنين في البيت في الاول كانت خايفة امنة تطلع زي امها لكن طلعت زولة طيبة وفعلا امنة غير وصال ما بتحب المشاكل وبتريد عبدالقوي اخوها شديد <br>
اليوم عدى وحليمة سوت الغدا واتغدو وطلعت ليهم تحلية وشربو الشاي هي وعبدالقوي واتونسو وقامت اخدت ليها بوخة خفيفة واتدلكت ولبست احلي حاجة عندها واتفقدت الاولاد نامو وجات وفي راسا مية سؤال لي عبدالقوي في الاول قالت تواجهو وتاني قالت اخليو شوية وفي بالا دايرة تسحبو وترجعو ليها وقضو ليلتن مع بعض مع انو حليمة كان في قلبا لكن حسبتا في راسا انو احسن يكون خايف من انها تعرف والصباح اصبح وعبدالقوي مشى شغلو ولاقا جمال وسلم عليو وسألو من اخبار و واخبار الاولاد والاهل <br>
جمال:اووو ابو التسب كيفك والله ليك وحشة شنو طولت في السفرية دي كدة اسبوع كبدلو مسافر<br>
عبدالقوي:تقول شنو الشغل داير كدة داير اسألك اها العربية كيف ان شاءالله اتصلت ياخ والله المواصلات الليلة اتعبتني تعب شديد ياخ حليمة قالت لي عندك العربية داير تصلحا<br>
جمال:مخلوع من كلام اختو وما عرف يقول شنو......<br>
م تنسو التصوييييت😍😍😍😍💓
يتبع.....
أنت تقرأ
كيد النساء
Misteri / Thrillerللكاتبة إيلاف زروق/تتحدث عن خيانه الرجل للمرأه حينهاتبدأ مكايدها له
