#كيد النساءالحلقة ١٤<br>
اولادي خط احمر ي حاجة فاطمة وان كنت سكتة ليك وما اتكلمت عشان الولد ما يفهم انو في مشاحنات بيناتنا <br>
وصال:حليمة انتي اتعديتي حدودك كيف بتكلمي امي كدة وبتكوركي فيها والله والله..<br>
حليمة:من غير ما تحلفي امك هي البدت معاي شفتي انا لي نفسي ممكن اسكت لكن تدخلي اولادي في دوامة المشاكل دي حاجة انا ما دايراها لو ابوهن ما بسكت عليو خلي كمان لي اعدائي <br>
حاجة فاطمة :ي وصال ي بتي دا ما جديد عليها من الله خلقا ما عندها احترام لي الاكبر منها دايراها تحترمني هسي <br>
حليمة :والله اتي القللتي من قيمتك قدامي ما انا<br>
حاجة فاطمة:ات ي عبدالقوي ما سامع مرتك بتقول في شنو <br>
عبدالقوي:خلاص ياخ كفاية حليمة كلاما صاح ي امي ما تدخلي الاولاد في مشاكلنا انا ما داير اولادي يتعقدو <br>
حاجة فاطمة:اي عاد كيف ما صاح ما دي حبيبة القلب <br>
عبدالقوي:يمة حليمة امرقو برا كلكم ما داير لي زول معاي هنا يعني شوفتوني ما مت دايرين تكتلوني بعد انشليت <br>
حاجة فاطمة :تبرا ي ولدي ان شاءالله انا خلاص هدي مارقين اخد راحتك تب <br>
حليمة :بعد الشر عليك ان شاءالله تحضر اولادك انا اصلا ماشة الشغل جيت اشوفك اصبحت كيف بس<br>
مارقين كدة كلهم عبدالقوي كورك لي حليمة ي حليمة خليك دايرك في موضوع كلهم وقفو وقالت ليو خير ان شاءالله عاين فيهم وقاليهم قلت حليمة بعدا مرقو وبقو هو وحليمة<br>
عبدالقوي:حليمة تعالي جاي (مشت عليو وقفت بعيد شوية)<br>
حليمة:اها جيت قول داير شنو<br>
عبدالقوي:ومالك بتتكلمي برا نفس كدة كأنو غاصبك علي حاجة (هنا حليمة انتفست كدة بي ضيق وقالت ليو في شنو ي عبدالقوي ات داير مني شنو مش قلت ما لازماك <br>
عبدالقوي:داير اوصيك علي محمد خلي بالك منو محمد كبر وبقى واعي وما دايرك تكريهو فيني سامعو قبيل قال ليك عندي ليك اسئلة بعد نتلاقى في البيت عليك الله ما تكريهو فيني ي حليمة وامي غلطت معاك امسحيها لي في وشي عارف انك ما بترضي في اولادنا نهاي وخاصة محمد تتزكري لمن جيتيني وقلتي لي محمد كسر الكبابي لمن كان زعلان وانا لمن جيت دقيتو اتي جيتي وقفتي لي وقلتي لي كيف تدقو مع انك لمن جيتي شكيتي منو كنتي متضايقة وخلينا مشكلة محمد واتشكلنا نحنا <br>
حليمة :وبعدين ي عبدالقوي موقفني هنا عشان زكريات ليها اكتر من ٧ سنة بس دا الموضوع وامك غلطت فيني وانا ما حاسبتها لكن تغلط فيني قدام ولدي دي ما بسكت عليها ومن ناحية اكره فيك اولادك دي انا ما بعملا لأنهم متعلقين فيك شديد ما بقدر انزع ريدتن ليك بي القوة لكن تقصيرك وبعدك هو الممكن يكرهن فيك <br>
عبدالقوي:عارفك زعلانة لسة من كلام امس لكن غصبن عني كنت زعلان شوية ي حليمة والله انا مستحيل ابعد منكن كدة<br>
حليمة:بعد ترجع عبدالقوي الزمان انا تاني يمكن افكر انك ترجع لينا ولا لا اها يلا انا اتأخرت ماشة الشغل من مرضت مافي زول شاف الشغل <br>
عبدالقوي:واتي بتقدري عليو خلي جمال ولا محمد يباشرو فيو اتي ما تمشي <br>
حليمة:مافي زول فاضي انا ما عندي حاجة قاعدة في البيت لا شغلة لا مشغلة احسن اتحرك شوية وبعدين المال السايب بعلم السرقة وانا ما دايرة قروش اولادي تروح كدة<br>
عبدالقوي:كلامك كلو بقا عنصري بتفصليني عنكم حتي في الكلام ي حليمة<br>
حليمة:والله ات البقيت حساس زيادة علي اللزوم وبعدين ات بقى عندك بيت تاني وزوجة تانية خلاص امش كون حياتك واولادك في وشك متين ما تجي تعال اتأخرت انا اها يلا ومرقت منو وخلتو يتكلم مع روحو (اتي ي حليمة لي قوية كدة لحدي هسي ما فاهم حاجة دايراني ولا قنعتي مني ولا بس بتكاوي في روحك ااااخ الله يصبرني عليك بس )<br>
وصال:بتسوو في شنو دا كلو ي حليمة جوة <br>
حليمة:مرا وراجلا بكونو بسوو في شنو يعني وبعدين انتي مالك ومال البنسويو خليك في همك احسن<br>
وصال:همي اتي ي حليمة همي افصلك عن حياتنا دي بس<br>
امنة:ي وصال بطلي حديثك المسيخ دا واقفلي خشمك دا<br>
حليمة:خليها ي امنة اصلآ الحقد والحسد مالي قلبا الوسخان دا والغيرة العايشة تنكد بيها في روحا دي خليها تمرق منها<br>
حاجة فاطمة:والله ان في زول غيران فهو اتي بعد ما عبدالقوي قال ليك ماشي لي مرتي وبيتي التاني اتي النار طلقت فيك وجيتي تتمحرقي ليو عشان يحن ليك<br>
حليمة:ههه والله ضحكتيني ي حاجة فاطمة انا اصلآ عبدالقوي ما هاميني كان جا معاي ولا مشى معاك واحسن انو ماشي معاك اتي ابقي عشرة عليو انا مافاضية ليو زاتو مافي زول بخلي بالو من الشغل غيري مالو الكتير دا بروح ساي لو اهملناو وزي ماشايفة مافي غيري <br>
حاجة فاطمة:شغل شنو البتمسكيو اتي اخوهو قاعد بمسكو هو عبدالقوي ما بثق فيك تاني<br>
حليمة: وانا ثقتو اسوي بيه شنو ما فارقة معاي كتير ودعتكن الله <br>
وصال:بلا رجعة ان شاءالله<br>
حليمة: اتي والمعاك (ومشت حليمة علي شغلا وخلت وراها ناس دايرين يطرشقو من المغص لاقاها عبدالله برا )<br>
عبدالله:ماشة وين ي حليمة عبدالقوي مارقنو الليلة <br>
حليمة:نازل في بيتكن انا المقعدني شنو ماشة علي شغلو واقف من سفرتو قصدي من عرسو لازم اشوف في شنو <br>
عبدالله :طيب عديلة بتصل اطمنك عليو بعد نصل البيت<br>
حليمة:ان شاءالله
بي هناك حاجة فاطمة مع بناتا اتن المرا الما عندها فهم الاسما نعمات دي ما جات مالا الله يقرفا <br>
وصال:فتناها مع الاء وبنات امنة البقعد معاهن منو <br>
حاجة فاطمة:ما تقعدي معاهن اتي هسي عبدالقوي حايفهم انها مافارق معاها وهي زاتا ما عندها فهم راجلا في المستشفى مفروض شبر ما تزح من هنا تقعد لمن يمرق انا بس دايرة حليمة تشوفا احي انا منكن الما بتفهمن عشان النار تاكلا ان شاءالله تاكلا نار جهنم<br>
امنة:ي امي ما تدعي عليها كدة انا والله مستغربة فيكن عملت ليكن شنو المرا دي عبدالقوي قصر منكن في شنو عشان تشتتنو كدة وتفرقنو من اولادو ي امي حرام عليك والله ربنا بسألك من البتسوي فيو دا المرا مهما كان ام اولادك ما تدعي عليها والله ما شايفة منها اي غلط والبتسوي فيو دا ردة فعل طبيعية <br>
حاجة فاطمة:خلاص عليك الله ي امنة انا براي راسي موجعني ما تملي لي راسي بي محاضراتك دي<br>
امنة :اي الحقيقة ما مرة ما بتقبلوها قلتي لي عبدالقوي عرس عرس ليك ي امي بتغلغلي في المرا لي شنو <br>
حاجة فاطمة:اتي ماشايفة اخوك جوة بي سببا هي العملت ليو كدة وخلتو يد شغالة ويد لا دايراني اديها تعظيم سلام<br>
امنة:لو جينا لي الحق ي امي اتي السبب في انوعبدالقوي يصل لي المرحلة دي لو ما عرستي ليوحليمة ما كان ضرتو ودي ردة فعل اي مرا الضر حار ي امي واتي مرا زيك زيها وانا كمان مرا لو اتعمل فيني كدة مابقبلو ولا بتحملو وحليمة مافيها عيب يخلي الراجل يعرس فيها والدة وشايلة بيتا<br>
حاجة فاطمة:انا وريتك انو عرس عبدالقوي من المرا دي شرط عشان يتم عرس الاء ما دايرة اعيدو ليك<br>
امنة:واتي لي شنو تقبلي بي حاجة زي دي الاء مالا ناقصة ولا كبرت عشان تخليهن يتحكمو فيك وعشان تبني بيت تهدي اسرة بي حالا ي امي وانا عارفة انو دا ما السبب بس عشان عندك تار قديم مع حليمة دايرة تاخديو بس اتزكري ي امي اتي الخليتي حليمة بقت كدة فما تلوميها تاني<br>
وصال:اتي قصدك ي امنة نسكت ليها كدة لالا ماجادة اتي<br>
امنة:ي وصال لو انتي مكان حليمة بتعملي شنو تصرفك بكون كيف لمن راجلك يعرس فيك (وصال سكتت وما ردت)اها سكتي لأنو ما عندك جواب لي سؤالي حاتكون زي حليمة ويمكن اصعب من ردة حليمة بالعكس حليمة هادية واتقبلت الامر بي هدؤ شديد لو احدة غيرا كان سمعتكن ما سمعتكن لكن قابلتكن عادي واتن البديتن معاها<br>
وصال:معناها ما بتعرفي حليمة والهدؤ البتكلمي عنو دا الهدؤ ما يسبق العاصفة وانا دا المستغربة فيو ودايرة اعرف هي ناوية علي شنو.....
م تنسو التصويت 😍😍😍💓
يتبع.....
أنت تقرأ
كيد النساء
Mystery / Thrillerللكاتبة إيلاف زروق/تتحدث عن خيانه الرجل للمرأه حينهاتبدأ مكايدها له
