بقلم (ايلاف احمد زروق)
#كيدالنساء الحلقة ٢٧<br>
بسم الله الرحمن الرحيم أمسيت بي الله منك ي فاطمة مالك جاية حارة كدة سلمي اول وادخلي جوة <br>
حاجة فاطمة:اسمعي ي خلود انا حركاتكن دي فاهماها وان قايلة ولدي ما بمشي بي طوعي تكوني غلطانة بتك تمشي تشوف ليها راجل مرا ولا مرتو ميتة ما تجي تاخد ولدي ال لا ضاق العرس ولا شاف ليو مرا ياخد بتك العذبة دي<br>
خلود:اسمعي اتي ي فاطمة بتي مالا عيبا شنو ولدك امسكيو عليك واحترمي نفسك اتي قاعدة في نص بيتي والليلة كان سيد البيت في ما كان حصل خير هو الجاري ورا بتي ما نحنا الساكنو دا حين تتفضلي برا بيتي <br>
حاجة فاطمة: بيتك كايسة فيو شنو انا هو القاعدة فيو دا بيت الحمدلله بي بيتي جيتك عشان تخلي بتك بعيدة من عبدالله وسيد بيتك كان راجل ما كان بدي ولدي من غير اهل <br>
امنية:ابوي راجل وسيد الرجال وعبدالله ان عرف جيتك دي ما بخليك<br>
حاجة فاطمة:لالا خليو يجي يدقني شوف العذبة فضلة الرجال ليها حس تتكلم كمان عبدالله في الحلم مافي ليك وان لقيتك جيتي ناحية بيتنا تاني الا اكسر ليك كرعيك<br>
خلود:ي فاطمة انا حاسبة لي الجيرة وكلامك دا ما كلتم زول واعي وبأي كان اتطلقت دي قسمتا كدة ما عيب يعيبا <br>
حاجة فاطمة :عيب وستين عيب لمن تعاين ليها لي صبي يجي يعرسا وانا جيرتك ما دايراها جيرة وراها خراب <br>
امنية:هو اتي بتعرفي العيب اصلآ العيب في نص بيتك لكن ما بتشوفيو وانا عارفة وفاهمة عيبكم بتك كانت لاعبة بي ود عمها الحمدلله انا اتعرستا بالحلال واتطلقت بالحلال شمي عفنة بيتك اتي وتعالي اتحدثي <br>
خلود:ي امنية دا كلام شنو البتقولي فيو<br>
امنية:دي الحقيقة ي امي شوفتيها سكتت كيف عشان ما عندها كلام تقولو وعبدالله دا بعرسو بعرسو <br>
حاجة فاطمة:اتي ما بت ابوك الفصاحة واللسان الطويل جايباهو منو العلي سويتو ي خلود بتك ما دايرة اشوفا وعبدالله بعرف اوقفو كيف <br>
امنية:ابوي بقول كلمة الحق لا بنقص لا بزيد <br>
ومرقت منهن حاجة فاطمة والغضب مالي عينيها <br>
وصال صحت من النوم لقت البت قاعدة وجات عليها مسكتا من قميصا وقالت ليها انا قلت شنو مش قلت بعد تنتهي ما اشوفك هنا <br>
اسمهان:فكي لي قميصي انا اتصلت لي صاحب البيت وقال لي مافي كلام زي دا اقعدي لمن اجي انا<br>
وصال:اتي اتصلتي بيو لي شنو مش قلت ليك امشي تمشي بي سكات من غير ما يعرف حتي<br>
اسمهان:انا جيت عشان أستاذ عمار ما جبتيني اتي وبمشي بي كلامو هو<br>
وصال:يعني الحسنة ما جاية فيك مش كدة <br>
عمار جا داخل لقاها ماسكاها من قميصا وبتكورك فيها<br>
عمار بي نهرة وصال وصال قبلت لقتو جنب الباب<br>
عمار:دا شنو البتسوي فيو فكي بت الناس انا قلت ليها تقعد<br>
وصال:تقعد لي شنو بعد خلصت شغلا <br>
عمار:جا عليها ونتل يدها منها وقال لي اسمهان تمشي ومسك وصال اداها كف لمن سكتت وبقت تعاين فيو <br>
وصال:بتضربني انا ي عمار حصلت كمان تمد يدك علي<br>
عمار:واكسر راسك كمان الاولاد ليهم ساعتين جو صحيتي شوفتيهم اكلتيهم شربتيهم عشان عارف انك مهملة قلت ليها تقعد وانتي ولا هاميك ماسكة بت الناس الماسكة اولادك دا تعامل ليك<br>
وصال:دا كلو عشان الشغالة دي عندك معاها شنو للدرجة دي تخليك تضربني ليها<br>
عمار:انا ما ضربتك عشانا انا كان من زمان مفروض اضربك عشان تمشي عديل معاي جيتي لي شنو ي وصال مش قلتي ما طايقة العيشة معاي الجابك شنو<br>
وصال:اصلا انا كل مرة بقول ليك كدة الجديد في الموضوع شنو <br>
عمار:الجديد انو انا خلاص برمجت حياتي ولقيت انو نحنا قادرين نعيش من غيرك <br>
وصال:اسمع ي عمار الكف دا حاتدفع تمنو غالي <br>
عمار:اكتر من الدفعتو ما اظن انا ما داير اشوفك في وشي وان دايرة تقعدي اقعدي لكن نحنا عايشين حياتنا من غيرك عادي جدآ ومشى منها خلاها مصدومة من الحصل وما قادرة تقرر اي قرار <br>
حليمة صحت لقت عبدالقوي مرق دخلت شربت موية ودايرة تدخل لقت لؤي وعمر بلعبو برا مرقت عليهم سمعت صوت بكا طفل جاي من ناس فتحية وعاينت لقت حاج ابراهيم سايق معاو ولدين وبت قالت ديل اولادو ماشاءالله فتحية جادة يعني ان شاءالله ربنا يهنيها بيهم ودخلت علي بيتا جوة<br>
فتحية مبسوطة بالأولاد الكبير ولد وبعدو بت والأخير ولد كان ببكي شديد وفتحية بتسكت فيو وبتلعب فيو وحاج ابراهيم مافاتم نهاي قاعد معاهم وفتحية اول مرة تشوف حاج ابراهيم قاعد بي رواقا من سنين قبل ما يتزوج عليها<br>
حاج ابراهيم:ما عارف اشكرك كيف ي فتحية دا جميل عمري ما بنساهو ليك <br>
فتحية:هو نحنا بيناتنا شكر ي ابراهيم الاولاد ديل من جو ودخلو الفرحة للبيت الكئيب دا انا كنت من زمان متمنية لحظات ذي دي اسمع فيها صوت طفل يبكي ويلعب في بيتي لمن حليمة تفوت اولادا معاي انا الفرحة بتكون ما سايعاني بحس بي انو الدنيا دي برا طفل ماليها طعم وكنت لمن اتزكر عرسك اتوجع ولمن اتزكر الاولاد الجبتهم كنت بنبسط ليك علي الاقل قدرت تجيب الما قدرت اقدمو ليك<br>
حاج ابراهيم:عارف اني مقصر منك وانشغلت بي اولادي وكانو عامييني والنسوان كانو شواطين بشغلوني عنك واغضبت رب العالمين بعدم العدل اتي الصبرتي معاي ايام الشدة وعشرة سنين وما عارضتي رغبتي جزيتك بي الاهمال اعفي لي ي فتحية اعفي لي من حقك عارف انو العملتو فيك استاهل اتحرم كن مرة وطفل دا عقاب رب العالمين لأني هجرتك بي الشهور <br>
فتحية:ربنا بسامح انا منو عشان ما اسامح عافية ليك ي سيد بيتي كفاية انك ختيت فيني الثقة وسلمتني اولادك <br>
حاج ابراهيم:كيف ما اسلمك ليهم ي فتحية انا ان فتشت الدنيا جت ما بلقى زيك زول يهتم بي اولادي وعارفك مرا بتحبي الخير والحقد ما عندو مكان في قلبك <br>
فتحية:ان شاءالله اكون قدر المسؤولية دي <br>
حاج ابراهيم:قدرا ان شاء الله <br>
حاجة فاطمة رجعت بيتا وامنية اتصلت بي عبدالله وورتو بالحصل كلو عبدالله جا من الورشة ولقى انو قاعدة وجات<br>
عبدالله:دا شنو السويتيو دا ي امي بتمشي تنبذي البت في بيتا وتنبذي امها وابوها <br>
حاجة فاطمة:اي بمش وتاني بمش عندك كلام لمن تقنع من الفصيحة قليلة الادب دي بتعايرني انا بي اختك <br>
عبدالله:خلاص كدة استرحتي يعني بتستفيدي شنو لمن تغلينا وتخلينا نمشي بي رايك اتي العايشة معانا دايرة تتزوجيها اتي انا لي اربعة سنة بحاول ارضيك بس انتي رافضة اخواتي عرسو بقيت انا بس منتظر متين ترضي <br>
حاجة فاطمة:ان داير العرس علي الليلة قبل بكرة اعرس ليك اي بت لكن البت دي تمرقا من راسك فهمت<br>
عبدالله:مارق ي امي فايت ليك البيت والدنيا كلها عشان ترتاحي<br>
حاجة فاطمة:امرق ان مرقت بتهددني بي مرقتك دي <br>
ومشى عبدالله علي الورشة زهجان قفلا ومشى علي صاحبو شال منو العربية وطلع بيها وكان متوتر شديد وزعلان دقت ليو امنية وقالت ليو ات وين قال بيها ماشي ساي ماعارف وين <br>
امنية:وسايق وات كدة ارجع ي عبدالله عليك الله <br>
عبدالله:ما راجع ي امنية خليني ياخ وقفل منها وماشي بالعربية وزايد السرعة عمل حادث بالعربية والناس اتلمت فيو واسعفوهو المستشفى وكان تعبان شديد واحد شال التلفون واتصل بي اخر رقم واتلقى رقم امنية <br>
امنية جاها الاتصال من عبدالله وردت الو عبدالله اها ان شاءالله رجعت جاها صوت غريب وقال ليها ما عبدالله لكن صاحب الرقم دا عمل حادث وهسي في المستشفى امنية قعدت تبكي وبتقول في ياتو مستشفى ووراها المستشفى وهي لسة بتبكي جاتا امها في شنو ي امنية <br>
امنية:عبدالله ي امي عمل حادث وهسي في المستشفى <br>
خلود:لا حول ولا قوة الا بالله ربنا يكتب السلامة <br>
امنية:انا ماشة اكلم اهلو وماشة ليو في المستشفى <br>
خلود:اتي جنيتي دايرة المرا دي تدقك <br>
امنية:ما وقتو ي امي هسي لازم يعرفو انا ماشة عليهم <br>
ومرقت امنية والدموع جارية وبتبكي جات داخلة لقت نعمات جاية من اوضتا وحاجة فاطمة شكلا جوة <br>
نعمات:امنية في شنو مالك بتبكي <br>
امنية:عبدالله عمل حادث وهسي في المستشفى <br>
نعمات:وبعلي مالو عبدالله حاجة فاطمة سمعتا وجات مارقة شافت امنية وقالت في شنو جيتي لي شنو وبتتبكي كمان امرقي من بيتي دا <br>
امنية:عبدالله عمل حادث ي خالتي وتعبان في المستشفى <br>
حاجة فاطمة:دي تمثيلية عشان أرضى بالعرس مش مافي ليكم<br>
نعمات:ي خالتي تمثيلية شنو ما شايفة حالتا كيف وقالت ليك ولدك تعبان في المستشفى حاجة فاطمة وقعت اغمى عليها<br>
ونعمات بتكورك عبدالقوي كان نايم صحا بي كوراك نعمات جا جاري عليهم لقا امو واقعة وبقي يقول لي نعمات مالا امي الحاصل شنو ودي منو المرقت هسي دي<br>
نعمات:عبدالله عمل حادث ولمن عرفت وقعت <br>
عبدالقوي:حادث وين وبتين وعرفتي كيف<br>
نعمات:كلمتني امنية هسي وهي مرقت ماشة المستشفي <br>
عبدالقوي جاب موية وصحا امو ومشو المستشفى وامو طول الطريق بتبكي وما سكتت وصلو المستشفى لقو امنية والناس كتيرة و عبدالله في العمليات لسة ما طلع <br>
نعمات اتصلت بي وصال وكلمتا وصال قامت مخلوعة ولبست ومرقت جات المستشفى تبكي شديد<br>
الدكتور مرق من عبدالله كلهم جو جارين ليو......<br>
بكرة ان شاء الله الحلقات الأخيرة انتظروني بكرة دي اخر واحدة انزلت الليلة وشكرآ😍😍😍😍😍😍
م تنسو التصويت😍
يتبع.....
أنت تقرأ
كيد النساء
Mystery / Thrillerللكاتبة إيلاف زروق/تتحدث عن خيانه الرجل للمرأه حينهاتبدأ مكايدها له
