كيد النساء الحلقه ٣ بقلم (ايلاف احمد زروق)
عبد القوي:حليمة كيفكم طيبين ان شاءالله<br>
حليمة:طيبين مافي عوجة خير مالك داقي علي ما من عوايدك جاي بدري البيت ولا شنو دايريني اجهز ليك حاجة<br>
عبد القوي:دايرك تجهزي لي شنطة صغيرة عندي سفرية اسبوع كدة <br>
حليمة قلبها فراها عرفت انو كلام وصال صاح وعبد القوي عرس وقالت ليو من متين بتسافر ي عبدالقوي دي جديدة شغلك كلو جوة والمن برة بجيبو ليك جمال اخوي دي سفرية شنو الطلعت لي بيها عبد القوي ارتبك وقال ليها شغل ي حليمة وبعدين انا لي متين اعتمد علي جمال اخوك لازم اعرف الشغل الزمن ما معروف قالت ليو صحي والله الزول يعمل حساب لي الزمن ما معروف الخيانة والخساسة كترت بقيت نفسك ما تضمنا خلي باقي الناس اتي ي حليمة قصدك شنو بي كلامك دا قصدي شنو يعني ي عبد القوي الله يسهلا عليك مع السلامة بعد تجي ماشة اجهز ليك الشنطة خلاص عديلة دايرين حاجة اجيبا ليكن معاي اي دايرين هو شنو المادايرنو مش قلت مسافر اسبوع جهز لينا خضار ولحمة حقت اسبوع واغشى معاك جيب التموين <br>
تموين شنو ي حليمة جبتو قبل أسبوعين كمل <br>
اي كمل داير تتفكر في اكل اولادك ي عبدالقوي <br>
لالا ما اتفكر لكن التموين بقعد شهرين كتير يعني ما شوية<br>
قسمتو ي عبدالقوي صدقة لي اولادي جيب التموين كلو ما تنقص حاجة فيو واصرف لي ١٠ الف دايراها في يدي<br>
سمح ي حليمة كلو بسوي ليك ما عارفك بتكوركي وزهجانة كدة مالك اها يلا مع السلامة <br>
حليمة بقت تكلم روحا والله عملا وعرس اول مرة ما يناقشني في حاجة هين ي عبدالقوي ان ما خليتك تسف التراب وتتمنى رضاي اصبر بس ومشت تجهز ليو الشنطة <br>
وختت الهدوم والصابون وكل احتياجاتو لمن شالت الريحة التركيبة حقتو عبد القوي بتعطر بي تركيبة عشان عندو حساسية بعمل تركيبة هادية ما نفاذة جاتا فكرة خبيثة ومرقت علي فتحية جارتا اتي ي فتحية العطر الزيتي حق المسك الاديتك ليو بدري تتذكري قلتي لي عجبني وبقي ريحتك المفضلة ما بتعملي غيرو <br>
فتحية:اي كيف ما بتزكرو الجبتي من ام سلمة الدلالية وقالت ليك ريحتو ما بتمرق من الجسم وجا يمرق روح راجلك عبدالقوي 😂😂(عبدالقوي عندو حساسية من المسك واي عطر قوي مرة كدة حليمة لقت عطر زيتي بالمسك عند الدلالية وعجبا وشالتو واتعطرت بيو لمن جا عبد القوي وشما الريحة بقي يتعطس ويقول ليها دا شنو ي حليمة ما عارفاني عندي حساسية من الريحة القوية جنيتي اتي واليوم داك عبدالقوي عيونو ووشو اتورم من الريحة ويعطس اسبوعين ما قام من السرير ولا النوم ما بنوم )<br>
حليمة:اريتو كان مرق روحو ولا يعمل فيني كدة اتي عارفة هسي دقا دايرني اجهز ليو شنطة قال مسافر عرفتي ي فتحية معناها كلام وصال صاح وانا خلاص عبدالقوي ماباقية عليو لكن ماببردو ليهن كدة وقاعدة ليو كدة بس اضيقا عليو في الداخلة والمارقة <br>
فتحية: واتي جهزتي ليو الشنطة مش <br>
حليمة:اي جهزتها هسي وجيتك جاي اسألك من العطر <br>
فتحية:الله يصبرك ي حليمة كلو بي مرور الزمن بتمحي ما تشيلي هم <br>
حليمة:ان شاء الله مع اني ما اظن انسى ي فتحية ارح كدي جيبي الريحة دايراها دايرة اشوفا <br>
فتحية:دايرة بيها شنو ي حليمة اوعي تكوني دايرة تتعطري بيها يعني عشان ما يجي عليك ولا شنو <br>
حليمة:دايراها ي فتحية كدي جيبيها سمح النقوم اجيبا ليك<br>
اها هاك ليها ماباقي فيها شي والمرة تاني ما جاتني <br>
حليمة:لالا دي كتيرة وبجيب ليك فيها باقي اها ودعتك الله <br>
عرفتو حليمة دايرة تسوي شنو دايرة تلخبط العطر الزيتي مع ريحة عبد القوي عشان الحساسية تقوم عليو وبالفعل عملت كدة وختت ليو الريحة وقفلت الشنطة ومشت جهزت غداها وجهزت روحا وبقت منتظرة عبد القوي يجي ...........<br>
بي هناك حاجة فاطمة وبناتا جهزو البيت والاكل وجهزو الضبيحة والفرحة والانبساط ظاهرة عليهن من ضحكن وشماتتن في حليمة النايمة علي قفاها ودا كان شرط عبد القوي انو حليمة ما تعرف حتي زواجو دا وراهو قصة بنعرفا في الحلقات الجاية لكن وين وصال قلبا حارقة علي حليمة ونفسها تشوفا مكسورة ومغلغلا دايرة توافيها اول بي اول كانت فاهمة انو حليمة بعد تعرف النار بتولع ودا الدايراو وصال دايرة حليمة بي سبب المشاكل تتطلق لكن حليمة فكرت كويس وفهمتا ودايرة تلعب براحة عليهن كلهم حاجة فاطمة:ي الاء ي بت دقي لي اخوك شوفيو وين قولي ليو تعال اتغدا معانا عشان المغرب يمرق علي عروسو يجيبا <br>
الاء:سمح ي امي واتصلت عليو.......الو عبدالقوي امي مستنياك بي الغدا قالت ليك ات وين<br>
عبد القوي:أيوة ي الاء ماشي علي بيتي وبجي عليكم ان شاء الله ...طيب خلاص عديلة ي امي قال ماشي علي بيتو وبجي بي جاي <br>
حاجة فاطمة:ان شاء الله بس العقربة دي ما تمسكو انا عارفاها هسي تحقق معاو تحقيق الله يحفظو منها ومن زنها ونبحيها <br>
وصل عبد القوي بيتو ولقي الاولاد قاعدين يتغدو سلم عليهن ودخل الاوضة لقي حليمة وسلم عليها وغير هدومو <br>
حليمة:النسوي ليك الغدا مسافة ترتاح شوية <br>
عبدالقوي:لالا ي حليمة ما داير لي غدا ماشي اتغدا مع امي <br>
حليمة:الله يعدلا عليك وسلم لي عليها وبوس لي راسا
عبدالقوي اتلفت علي حليمة فجأة وبقا مستغرب في البرود الهي فيو وكلاما الأخير وبقا يقول في نفسو المرة دي جنت ولا فعلآ اتغيرت لالا مستحيل الناس دي كلها تتغير حليمة ما تتغير اها نان مالا تكون عرفت عرسي لالا لو عرفت اكان قلبت الواطة وهو بفكر وسارح فيها قاطعت تفكيرو حليمة ها اراجل ها اكلني بتعاين فيني كدة مالك جنيت
بس هدي حليمة البعرفا كوراك ونبز في شنو الليلة قالبة خلقتك
حليمة:كيفن قالبة خلقتي ياهني زاتي حليمة لا بنهز ولا بنلز زي الجبل لا بخاف لا بعرف الخوف باقي ات المتغير شوف روحك مالك ما مايل ي حليمة مضغوط في الشغل وفي السفر الجا فجأة دة واول مرة ابعد منك كدة
حليمة:ان شاء الله البعاد ما يطول ما كلو بي يدك ي عبدالقوي اها جبت القروش
عبدالقوي:اي جبتهن هاك ليهن اها معاكن سلامة اتأخرت علي الناس ديل وشغالين اتصال
حليمة:الله يعدلا عليك والعربية البجيبا منو
عبدالقوي:بقا يتمتم اااااا ي هسي ماشي لي امي وبخلي عبدالله يقدمني والعربية بخليها عندو
حليمة:عربية شنو البتخليها عند اخوك احنا دافعين فيها دم قلبنا تفوتاكدة تتعولق (حليمة قاصدة كدة وعارفاو ما مسافر لكن حركة العربية دي عندها فيها فهم وعارفة عبدالقوي عشان يتفكا منها بجيبا ليها البيت )
عبدالقوي:خلاص ي حليمة بخليو يجيبا ليك ومرق منها ركب عربيتو ومشى ناس امو والعرس تما وجاب العروس بيت امو واخواتو يدقو ويزغردتو زي الاول مرة يعرس ووصال صورتن فيديو عشان ترسلو لي حليمة (بيت حليمة في منطقة وبيت نسابتا في منطقة بعيدة منها هي ساكنة قريب لي بيت ابوها ) وفعلا رسلت الفيديو وحليمة كأنها كانت منتظرة اللحظة دي وشافت الفيديو وشبعت بكى وبقت تقول هي ذاتا ان جابا علي معصعصة كدة وشينة شنا دي بجيبوها فيني انا ضرة ي المغفل وشوف ديل يجرتقن فيو ويغنن التقول صبي الله لا كسبك عافية ي عبدالقوي تشمت فيني الناس وفجأة ابتسمت وقالت هو انا بخليك تشوفا ولا تضوقا ي عبدالقوي شوف انا محضرة ليك شنو ي ابو اولادي..........
متابعة ي بنات عشان تلقو القصة ما تروح عليكن
وادوني رايكن فيها🤗🤗🤗🤗🤗
ي بنات اعملو لي طلبات صداقة حأضيفكن في قروب فيو احلي العطور والبخور السودانية وطرق للكبرتة بي فهم😍😍😍😍😍😍😍😍😍😍😍
<br>
بقلم (ايلاف احمد زروق)
م تنسو التصويت😍😍😍💓
يتبع.....
أنت تقرأ
كيد النساء
Mystère / Thrillerللكاتبة إيلاف زروق/تتحدث عن خيانه الرجل للمرأه حينهاتبدأ مكايدها له
