كيد النساء

كيد النساء17

بقلم (ايلاف احمد زروق)
#كيدالنساء الحلقة١٧
حليمة:يعني ي ولدي عرفت انو ابوك عرس صاح
محمد:اي عرفت ي امي اتي حاتطلقي يعني
حليمة لالا لي اطلق ات زول متعلم وفاهم انو الشرع حلل ليو اربعة مش كدة ما لازم اطلق يعني
محمد:طيب لي شنو تاني ما بجي هنا انا اصلآ ما فارق معاي ان جا ولا ما جا
حليمة:لالا ي محمد مهمآ كان دا ابوك ولازم عليك احترامو وتحبو ابوك ما عمل غلط عشان نحنا نعاقبو ابوك عمل شرع ربنا وصاح احنا مرات بنغضب ونزعل بس في النهاية دا شرع وما غلط بس غلطتو انو ما كلمني عشان كدة انا اخدت منو موقف لكن اكيد حانرجع كلها مسألة وقت بس ونرجع احسن من قبل ات بس ما تخت في بالك الضيق واوعا تكره ابوك
محمد :انا ما كارهو ي امي لكن انا بس متضايق منو لأنو اكيد اتي زعلانة ومتضايقة هو الناقص ليو شنو ي امي عشان يعرس تاني زي مؤيد صاحبي امو ماتت عشان ابوهو عرس فيها ماتت كان عندها القلب لمن عرفت زعلت وماتت وهو لحدي هسي ما داير يسامح ابوهو مش معناها بضرك ي امي
حليمة مستغربة في كلام ولدا وحاسة كأنها بتتكلم مع زول كبير وليو خبرة سنين حتي انها خجلت من كلمة ابوي الناقصو شنو عشان يعرس
حليمة :ي محمد ام صاحبك دي كان عندها مرض عشان كدة ماتت من الخلعة وان ما عيانة ما كان ماتت من الخبر وبعدين صاحبك دا ما بيعرف القدر اليوم هو البقتل ومافي زول بكون سبب لي موت زول دا اليوم ودي حاجة معلومة
محمد:عارف انو مافي زول بموت بي سبب زول بس هي زعلت ومن الزعل ماتت يعني لو ما عرس ما كان ماتت
حليمة:خلاص ي محمد وانا ما ضعيفة عشان خبر زي دا يهزني ولا يضرني ات ما عارف امك ي ولد
محمد:عارف ي امي بس ابوي قال ليك ما جاي تاني
حليمة:ما قال بس عشان انا بقيت ماسكة السغل ما بقدر اراعبهو واراعي الشغل حارات علي عشان كدة مشى مع امو عشان بعد يبقى كويس يجي هنا
محمد:ان شاءالله ما تكوني بتمشي فيني
حليمة:معقولة ي ومحمد انا امشيك ات شكلك كدة داير ابوك ولو داير تقعد معاو بوديك ليو هسي
محمد:ما انا البفوت البيت وما فيو راجل
حليمة:الله يخليك لي يعني ما ممكن يجي يوم وتفوتني براي
محمد:كيف افوتك واتي بتقولي اني سندك
حليمة:لالا شكلك كنت بتصنت لي كلامنا انا وخالك
محمد:لا والله كلو بالصدفة سمعتو
حليمة:تعال لي امك في حضنا مع انك كبرت بس لسة في نظري ولد صغير الله يحفظكن لي ي اولادي (مع انو حليمة بي طبعها قاسية وقوية لكن مع اولادا مرات بتكون اضعف انسان وبرضو عندها القساوة في امور عشان يمشو عديل ودي التربية الصاح ولدك ما تدلعيهو لمن يخسر وبرضو ما تقسي عليو لمن ينفر وي ربي تهدينا لي التربية الصاح😊)
نرجع لي عبدالقوي في غرفتو صحا وكورك لي نعمات تجيب ليو موية عشان يتوضأ يصلي المغرب نعمات جات جابت الموية وادتها ليو اتوضا وقام يصلي عبدالقوي بقا شبه عاجز بمشي بي تقلة في رجولو ويدو الشمال عطلانة صلي المغرب ودخل غرفتو رقد في السرير والافكار تاني بتجيو جاتو نعمات شايلة الشاي كبت ليو وادتوليو وقعدت تتونس معاو
نعمات:هسي حاسي بي شنو ما احسن شوية(وخاتة ابتسامة عريضة في وشها)
عبدالقوي:حاسي اني مخنوق وداير اتنفس بس نعمات وسها اتغير من الابتسامة وقالت ليو مخنوق من شنو انا عارفة انك مغصوب علي لكن اعتبرني غريبة الابتسامة صدقة والكلمة الطيبة صدقة ما خسران حاجة لمن تعاملني كويس
عبدالقوي:ما منك والله انا بس مشتاق لي محمد ولي اسامة ولي شقاوة عمر ولؤي كنت لمن اجي من الشغل زي الوقت دا هم حوالي محمد بتونس معاي دا الفاهم العاقل واسامة بسمع لينا وعمر ولؤي بتشاكلو كالعادة وامهم..وهنا سكت
نعمات:كمل امهم مالا انا شفتها في المستشفى والله مرا مافيها كلام تحس بي هيبتا وشكلا زولة فاهمة
عبدالقوي:عشان كدة انا اخترتها مع انو قالو لي طبعا صعب واهلا ناس مرتاحين وهي وحيدة ما معاها بت اتخيلي يعني مدلعة بس قلت مافي غيرا ياها هي بس ولا بلاها
نعمات الكلام وجعا واتزكرت كلام امها انو ما تقول انو حليمة احلى منها وحبت تغير الموضوع اولادك اساميهم حلوة ما عندك بت ولا شنو
عبدالقوي:لا ما عندي ياهن بس اربعة اولاد مستند عليهن في الدنيا وان شاءالله بعد الموت ياهن البشيلوني
نعمات:عمرك طويل ان شاءالله وربنا يخليهن ليك اشرب الشاي برد عليك ما بتشرب تاني
عبدالقوي:اصلآ بشربو بارد حليمة كانت بتبردو لي وتجيبو عشان نشرب سوا
نعمات:انا عشان لسة ما عرفت عنك حاجات يمكن لكن بعد اعرف اكيد بسعدك
عبدالقوي:نعمات انا ما دايرك تفهميني غلط اتي عارفة انو انا اتزوجتك لي شنو انا ما بقدر ابعد من اولادي وحليمة مستحيل تتقبل بيك كزوجة يعني ممكن اتوقع منها اي حاجة بعد عرس الاء ي ريت نفترق انا ما داير اظلمك معاي ما بقدر اسعدك والله بس ي ريت تكوني اتي الطالبة الطلاق عشان الاهل يعني
نعمات:ات بتقول في شنو انا مستحيل اعمل كدة اطلب الطلاق انا براي كدة منحوسة الناس بقولو علي شنو تاني ما صدقت خلاص مأساتي انتهت خليني في زمتك بس ما طالبة منك حاجة تاني ولو داير ترجع لي حليمة ارجع ليها بس خليني في زمتك وبمش لي حليمةافهما كل حاجة زي ما داير بس ما بطلق والله
عبدالقوي:بس كدة حرام اخليك في زمتي بس اسم مرا علي الورق دي معصية ما بقدر
نعمات:ات مالك انا رضيانة بيك كدة عليك الله بس طلاق لا وقعدت تبكي لي عبدالقوي انا امي ممكن تموت فيها
عبدالقوي:طيب خلاص بطلي نواح ياخ الله يقدم الفيها الخير ان شاءالله ما معروف ربنا كاتب لينا شنو
نعمات :اي قول كدة ربنا يقدم لينا الخير ي رب
حليمة صلت المغرب وقعدت مع اولادا قعدت المغرب بتسوي في الشاي جابت الكباية ودايرة تبردو اتزكرت انو عبدالقوي مافي وبقت تقول ي ربي بس الصبر كيف يتنسي لي ويمرق من بالي شالت الشاي ومعاو بسكويت ومرقت الصالة لقت محمد والاولاد قاعدين يتشاكلو ضحكت ضحكة طويلة كدة خلاص ي عمر ولؤي كفاكم يوميآ الموال دا ما بنتهي
محمد:هم مزاجن كدة لازم يومي يتشاكلو
حليمة :الله يعيني عليكم بس وهنا عمر ولؤي جو عليها
عمر: اتي ي امي ابوي ما جاي الليلة برضو
لؤي:لالا بجي هسي مش كدة ي امي
محمد:ابوي مشغول شوية وبعد ينتهي بجي
حليمة عاينت لي محمد بي ابتسامة انو فهما دايرة تقول شنو
اسامة:في شنو ي امي ابوي ما حصل غاب مننا كدة
حليمة :الشغل ي اولاد عشان يأمن ليكم اكلكم وشرابكم والعيشة الحلوة العايشنها دي لازم بابا يتعب ولا كيف ي اسامة
اسامة:اي اكيد بس برضو زمان كان بكون مشغول لكن ما بطول مننا كدة
محمد:طيب تعالو نتصل عليو نشوفو محمد مسك تلفونو ما لقى رصيد ي امي ممكن تلفونك عشان اتصل بيو
حليمة:اي طوالي هاك اتصل عليو واخدو راحتكم تب محمد شال تلفون امو واتصل علي ابوهو وجاهو جرس....
تلفون عبدالقوي اتصل وقال لي نعمات جيبي لي التلفون دا
جابتو ليو نعمات ولقت المتصل ام اولادي
نعمات:دي دي مكتوب ام اولادي دي حليمة صاح
عبدالقوي بي كوراك جيبيو اكيد في حاجة حليمة ما بتتصل ساي الله يستر ما يكون واحد من الاولاد حصلت ليو حاجة
ورد عبدالقوي الو حليمة خير ان شاءالله في حاجة الاولاد كويسين ومحمد كان فاتح الاسبيكر
محمد:ابوي كيفك معاك محمد احنا كويسين ما تخاف علينا
عبدالقوي:الحمدلله ي ولدي طمنتني عليكن كيفكم كويسين تب وامكم كيف كويسة
محمد:كويسين ي ابوي ديل اخواني بسألو منك هاك اسامة
اسامة:ابوي كيفك ات كويس انا كويس الحمدلله ات وين ي ابوي طولت ما جيت ما انتهيت من الشغل دا
عبدالقوي:قربت ان شاءالله ما باقي شي خلي بالك من نفسك واخوانك كيف عمرولؤي
عمر ولؤي في وقت واحد ياابوي ات كيف تعال لينا نحنا دايرنك جاي متين ات وحليمة حاضرة المكالمة وكانت بس شايلة هم اولادا وفي نفس الوقت كبريائا وعزة نفسها مانعاها من انها تتنازل وخايفة تفقد الاولاد المتمسكين بي ابوهن شديد وابوهن الفي صوتو شوق وندم والكل شوية بسأل منها اولادا وانو هي كيف وبوصي محمد عليها
عبدالقوي كان بتكلم مع اولادو بي شوق وكأنو ليهو سنين منهم ونعمات القاعدة ومراقبة وحاضرة المكالمة وبتسمع في عبدالقوي يسأل من حليمة طول المكالمة ويوصي عليها كأنها بنتو ولا طفلة صغيرة حست انو قدر شنو عبدالقوي بحبها ومتمسك بيها مع انو قال تاني ما راجع ليها بس كان بكضب بس ما اكتر وعرفت انو مستحيل تاخد محل حليمة مهمآ كان التمن بس قالت لازم تحاول وان فشلت بس تكون مرا في زمتو وبس بعد عبدالقوي وبتكلم مع لؤي لؤي قال ليو هاك امي ي ابوي وادا التلفون لي امو الاستقبلتو بي ابتسامة
حليمة:عبدالقوي كيف امسيت طيب تب ات
عبدالقوي:بعد سمعت صوتكم بقيت كويس الحمدلله ي حليمة كيفك اتي وكيف الاولتد شايفاهم مشتاقين لي كيف اول مرا اعملا واطول كدة
حليمة:اي فاقدنك والله وهسي اتزكروك بي قعدة المغرب وشراب الشاي فقالو يتصلو عليك
عبدالقوي :هسي كنت بحكي لي نعمات انوما بشرب الشاي حار وانو المغرب دا في بيتي ليو طعم تاني
حلسمة لمن سمعت اسم نعمات اتكهربت وقالت ليو تسلم خلي بالك من نفسك مع السلامة
عبدالقوي:ي حليمة حليمة دي مالا دي
نعمات انبسطت انو حليمة قفلت التلفون في وشو عبدالقوي قالا بي عفوية بس نعمات فكرت لي اسما لمن قالو وحليمة قفلت في وشو لكن عبدالقوي ما فهم هي لي شنو قفلت في وشو (ودي حاجات صغيرة الراجل ما بفكر ليها وما بكون قاصد حاجة بس نحنا عقلنا الخبيث دا بصور حاجات صعبة خلاص زي مثلآ حليمة فهمت انو عبدالقوي داير يوصل ليها انو مبسوط مع مرتو وكدة ولحدي ما عبدالقوي وقف من الانصال الكان بحاول فيو حليمة ما ردت ما فهم هي قفلت لي شنو )
حليمة لمت العبايات وغسلتن وكوتن ودخلت الدولاب شافت انو الوقت اتأخر اتوضت صلت العشا ونامت
عبدالقةي نعمات جات جابت ليو دهان للدلك اليومي لليد لكن عبدالقوي قال ليها نادي لي امي تسويو لي
نعمات:لي شنو حتي لمس ما المسك ات مالك بتعاملني كدة
عبدالقوي:ما تضيعي زمني وزمنك امشي نادي امي
نعمات:حاضر حاضر(ومشت نادت امو وقالت ليها انوعبدالقوي ابا يخليها تعمل ليو الدهتدان والدلك وقال دايرك تجي تسويو ليو اتي دي
حاجة فاطمة:عملتي ليو شنو لمن ابا يخليك تدهني ليو
نعمات: ما عارفة وما قال لي حاجة بس قال لي نادي لي امي....
م تنسو التصويييت😍😍😍💓
يتبع....