قصرنا شوية و فرغت قلبي .... و حان وقت الرحيل ...
رفدت كرطابي و راني نمشي فطريق حتى نحس...واحد دار يدو على كتفي
درت بلخلعة بصح ارتحت كي صبتو امين ( المدرب)
امين : واش لينة
لينة : واش الزين
امين : تأثرت
لينة : ياخويا بعد عليا قتلتني
انا برك قلت هكاك هو زاد طلق روحو عليا كثر انا قريب جبتها فالارض
لينة : اااااه الله لا تربحك
بعد عليا و بدينا نضحكو ممبعد نشوف لخزرة تاعو تحولت لسيريو انا خفت شوية
لينة : واش غير الخير
امين : لينة تعرفي بلي انا نحبلك غير لخير
لينة : باينة
امين : لينة بالنسبة للمدرسة هاديك غير روحي ... متضيعيش فرصة كيما هادي
دايمن امين ينصحني و كل نصائحو قيمة و فادتني بزاف فحياتي و هو لي نسمعلو
لينة :" عبالي بلي فرصة ما تضيعش بصح حبيت نصيب سبب مقنع يخليني ندخلها و نقعد فيها و نتجاهل قاع لمشاكل لي راح يصراولي
امين : بون اول شي لتم تقدري تطوري روحك كثر من جهة لموسيقى و لتم تان قادرة تبيني و تستغلي قدراتك تع الدراسة بالطريقة لي تستاهليها و لينة متنسايش هدا عام برك تع باك و عام يجوز بلخف و ادا درتي كل جهدك قادر يبعتوك للخارج و انا عبالي بلي نتي راكي حابة تبعدي من عائلتك و من هاد لبلاد ...و الشي لي يخليني نقلك هكا هو اني متأكد بلي راح تقدري توصلي لهاد الشي و يبعتوك فاسيلمون للخارج
لينة : صحا رام بعتوني للخارج ..كيفاش ندبر دراهم كيفاش نقدر نعيش
امين : يا بنتي الخارج و هنا مشي كيف كيف عبالك كون تطلعي بالمعدلات لي راكي تجيبيهم دك فالباك و يبعتوك للخارج راح يعاملوك كملكة ...و خاصة كي تكوني مبعوتة من طرف مدرسة مجموعة TFIT
لينة : زعما نقدر نجيب معدل كيما تع دك ...سمعت بلي كلشي صعيب لتماك
امين : صح صعيب لينة بصح روحي شوفي الاساتدة لي يقرو لتم غير من لخارج ... نتي فالليسي الخردة لي راكي تقراي فيه و راكي جيبي 19 كي والو كي تروحي لتم جيبي 25
لينة : هههههههههههه راك بديت تزيد عليها حبيبنا
امين : ههه نن والله مني بصح
لينة : ممم صافيك في رايك كون نروح لتم هو القرار الصحيح
امين : وي
خزرت فيه و تبسمت ...
لينة : هههه غير نتا لي تقنعني
امين مات بلفرحة ... و انا صراحة خممت مليح و امين عندو حق عام مراح يديرلي والو و كيما قالولي لجماعة انا نيفيتي الناس لتم و نروح نقرا و نولي منها نبعد على الخنز تع دارنا لخطرش مدرسة داخلية و منها برك نكمل لقراية نشالله يبعتوني للخارج و انا رح ندير المستحيل باش نقرا مليح ....
كملت مع امين حتى وصلني للدار ....
انا دخلت و هو راح
كي لعادة كانو قاع راقدين الحمدالله دخلت لبيتي ... و قاعدة غير نخمم ...لينة راح تديري القرار الصحيح ...اتخيلي بعد عام متزيديش تشوفي الخنز هادوما ....بلاك ترجعي تعيشي حياة افضل ...بلاك تتهناي من هاد التعب
اول مرة في حياتي نرقد بسعادة ربي يجيب الخير
*بعد مرور شهر*
جاز شهر ..خدمت فيه و بذلت جهد كبير ...و الحمدالله قدرت ندبر دراهم قادر يكفيوني لهاد العام ...
شريت شوية عفايس جدد و دوزان جدد ...
و اليوم هو اليوم المنتظر
نهاية العطلة الصيفية ...و اول يوم ليا فمدرستي الجديدة و بما انو اليوم اول يوم صافيك عادي كي منلبسوش اللباس المدرسي و علا حساب وش قريت بلي هاد المدرسة بزاف سيريو يعني عندنا نهار لي هو ليوم نتعرفو على الاساتدة و الخرطي هداك و غدوة منداك نبداو الدروس عادي خاصة كي عندنا باك...و لي يقعدو لتم يجيبو دوزانهم و قشهم و كل واحد يروح لبيتو ...و بالويكاند نرجعو للدار ..
لبست هكا ..
أنت تقرأ
🎹مَا بَيْنَ الأَسْوَدِ وَ الَأبْيَضِ 🎹 ( باللهجة الجزائرية🎶)
Romanceتعزف علي البيانو 🎹 كأنها ترسم أجمل اللوحات 🎨 تتناغم الأحلام مع الكلمات بين أطراف أناملها التي تمررها برقي غير معهود👑 علي أصابع البيانو🎹 وكأنها تكتب أول سطور لحكاية الزمان كما تريدها هي وحدها 🎬 بحثت العالم عن امثالك 🔭 لم أجد... فأنتي مميزة...
