انا رفدت كراسي كي لعادة و كملت وش بديت ....حتى فجأة عم السكات و الصمت و الهدوء و كلش
طلعت راسي... حتى نشوف الحالة قاع هاجت فجأة و لبنات قاع راحو يجرو خرجو برا و المشكل راحو معاهم شوية دراري بهالل بقاو غير شوية فلكلاصة
حتى نسمع لعياط و منعرف واش ...و انا من بلاصتي كنت قادرة نشوف لبرا ...واحد سيد باين عليه مشي غير ثري...فااااااحش الثراء ساعتو ملبعيد يلمع منها الالماس
و لبنات موراه تقوشي شافو كاش امير ولا منعرف واش
و هو يمشي و مخشن روحو و شعب قاع موراه ...
حتى نشوفو داخل لكلاستنا و المعجبين تاعو برا قدام لكلاسة يشوفو
انا مدرتلوش قيمة و حبطت راسي كملت نكتب
حتى فجأة عاود عم الهدوء
و انا اي دونت كاغ هههه ني غير نعاود فيها عبالي
المهم مدخلنيش قاع قاعدة في عالمي
حتى نحس عبد وقف قدامي
طلعت راسي صبتو هداك سيد مشهور *وليت نسميه هكا*
كان واقف امامي و يخزر فيا بخزرة بيزاغ ...
تقوشي قتلتلو والديه
قعدنا مدة هكاك حتى نشوف زوج دراري جاو يجرو عندي واحد فيهم حكم كرطابي و لوخر شدني من يدي انا برك شفت هكاك نضت و بدو ن اي كلام منحبش نكثر هدرة .. نحيت يدي ملول و لوخر نحيتلو كرطابي و خزرت فيهم خزرة تع تعاودوها راحت فيكم
و بكل هدوء قعدت فبلاصتي
و كملت نكتب و لجماعة برا قاع تتفرج و كلاصة فارغة غير انا و سيد مشهور و هدوك زوج دراري باينين اتباع تاعو
خزر فيا واحد منهم
هشام : اااي نوضي هادي بلاصة السيد وائل
انا خزرت فيه و تبسمت ابتسامة جانبية تع سخرية
و كملت نكتب مرديتش
هشام : ااااي قتلك نوضي هادي بلاصتو
لينة : ....
هشام : ااااي نوضي خيرلك ...
حتى نسمع هداك السيد مشهور نطق
وائل : هشام اخرجو ...باين قمامة هاد العام راسها شوية يابس ...لازم نكسرو
هداك لي اسمو هشام شد صاحبو و خرجو يجرو بكل خوف و قعد ليسي قاع قدام باب لكلاصة يتفرج تقوشي فيلم
مستر مشهور ربع يديه
وائل : ممم بيدما مزال مدرت شي نوضي و خليني نقعد فبلاصتي
خزرت فيه ملفوق للتحت و ضحكت ضحكة سخرية
لينة : بلاصتك ؟؟ علاش مكتوبة على اسم باباك
بدا يضحك كي لبهلول
وائل : ههههه علاش معبالكش شكون انا ؟؟؟
خزرت فيه ملفوق للتحت مجددا
لينة : لازم عليا نعرفك ؟؟
وائل : ههههههههههه
هو برك بدا يضحك لجماعة قاع ناضو يضحكو تبع و قول بع
حتى نشوف واحد طفلة لابسة روبة قصيرة قاع وش كاين و مزيرة و مونتو تع فرو حسيتها في عرس مشي فمدرسة
نهاد : هههههه معليش وين راكي قاعدة و هاد لمدرسة كامل تاع عائلتو بب ...عالاقل قبل ما تدخلي هنا بمنحة خيرية *ضحك* كنت درتي شوية بحث هههههه انسة قمامة
بداو قاع يضحكو
ممبعد هداك مستر مشهور خزر فيها بكل فخر
وائل : هههههه قمامة كيما هادي كي جيهم فرصة دخول لمدرسة مجموعة عائلتي و لي راح تولي تاعي عن قريب ...يتخلعو مساكن صافيك ينساو قاع مستواهم و منين جاو
انا قاعدة نخزر فيهم و عفسة ما تحركت فيا ههههههه رفدت ستيلو تاعي و كملت نكتب ...
و انا هكاك حتى نشوف هداك وائل حكم الكراس تاعي و جا حا يرميه
و هداك لكراس اغلى ما عندي ...فيه كلشي ...فيه قاع حياتي
كل مقطوعاتي كل ما ألفت
هو قبل ما يرميه انا جاني الشيطان الداخلي تاعي
نضت حكمتو من يدو بقوة و نحيتهولو و عطيتو بكف *تع الهنودة بيان سوغ*
طراسة تع يدي جات في وجهو
ناس قاع شهقو ملخلعة و هو قعد بهاديك الوضعية و هاديك العوريانة لي جات معاه فتحت فمها مشوكية
اما انا بكل هدوء...رديت كراسي فوق الطابلة و قعدت عادي كلي ما صرا والو
و حنا هكاك حتى نشوف الجماعة لي كانو قدام الباب قاع بداو ينتاشرو كل واحد يروح لكلاصتو و لي يقراو معايا قاع رجعو ...و نشوف السيد هارون واقف قدام كلاصتنا
انا برك شفتو وقفت احتراما ليه كيما دارو قاع التلاميد تع كلاستي
هداك مستر مشهور برك دار شافو ملامح وجهو تبدلت كليا كان يبان وحش دك راه يبان كثر ...حسيتو كان رايح يقتلو .
دخل مستر هارون
هارون : كل واحد يشد بلاصتو
المشكل انو كنا قاع شايدين بلاصتنا غير مستر مشهور ...
حنا قعدنا و مستر مشهور كان واقف فوسط لكلاصة و ماورا حتى احترام للسيد هارون ...
هارون : كل واحد يشد بلاصتو قلت
قالها هاد المرة بصوت اعلى و بصرامة اكثر
مستر مشهور صاب بلاصة فارغة راح قعد فيها و بدا سيد هارون
هارون : المهم ليوم جيت خصيصا على طالب فهاد القسم
قاع دارو خزرو في مستر مشهور ...سور جا علاجالو
هارون : و هاد طالب هو لينة ****
هو برك قال هكا قاع خزرو فيا و تشوكاو ...صراحة انا و تشوكيت هههه
هارون : لينة : هي من اهم الطلاب عندي و انا شخصية طلبت منها تنظم لمدرستنا ...و هدا بسبب قدراتها العالية و ذكائها ...نتمنى تتعلمو منها و تاخدوها قدوة
و هو يهدر حتى ترفع يدها ديك طفلة تع مقبيل
نهاد : سيد هارون قصدك دخلت بمنحة خيرية ؟؟
سيد هارون تبلوكا و خزر فيا ...عرفت بلي معرفش وس يقول ...و لهاد الشي قررت ندخل بكل هدوء
لينة : وي بمنحة خيرية كيما راكي تشوفي باينة بلي جيت من عائلة فقيرة
و تبسمت بكل برود
بداو قاع يخزرو فيا مشوكيين من صراحتي الزيادة
انا مشي كيما هما انا منحشمش بحياتي ...و منخافش مالحقيقة جيت هنا باش نقرا ماشي باش نستعرض ثروتي ولا .....
هارون : المهم نتمنى تاخدوها كقدوة لكم ...و منسحقش مشاكل هاد العام مدابيكم
و برك قال هكاك خزر في مستر مشهور و خرج
هو برك خرج مستر مشهور راح و خبط لباب اونديغي تع باباه
هو برك خرج بداو يتهامسو
**** 01 : شفت... خزر في وائل
****02: باينة راهو عليه اصلا نورمالمون يعاود يماه لي طلعاتو...
****03 : باينة بلي جاب هاديك القمامة كي قارية بزاف باش تعاود تطلع بسمعة المدرسة
****04: اصلا وائل مشي مربي و مخلوع بدراهم ...تقوشي مشي قاع وليد سي هارون
امممم دك بديت نفهم عقليتهم هههههه وش هاد التنوفيق مقبيل برك كانو كي لكلاب مستعدين يلحسولو صباطو حشاكم و دك رام يهدرو فيه و يقولو مش متربي
دك فهمت علاش حاسب روحو هكا هاد الشي وليد السي هارون ...
ااااه ياربي من اول يوم بداوني المشاكل ...كوني قوية لينة متخلي حد يهزمك
محبيتش نزيد نسمع زمرهم كثر رفدت كرطابي و خرجت ندور ...
راني ندور و نستكشف فليسي
و فلحديقة لكبير هاديك
حتى وصلت لواحد لبلاصة خالية بصح سمعت فيها صوت العياط
كنت مكملة طريقي حتى نشوف السي هارون مع هداك مستر مشهور لي علا حساب ما سمعت اسمو وائل...
انا تخبيت مور الحيط باش ميشوفونيش ...جيت دايرة نبدل طريق حتى نسمع ......
STOOOOOOOOOOP
أنت تقرأ
🎹مَا بَيْنَ الأَسْوَدِ وَ الَأبْيَضِ 🎹 ( باللهجة الجزائرية🎶)
Romanceتعزف علي البيانو 🎹 كأنها ترسم أجمل اللوحات 🎨 تتناغم الأحلام مع الكلمات بين أطراف أناملها التي تمررها برقي غير معهود👑 علي أصابع البيانو🎹 وكأنها تكتب أول سطور لحكاية الزمان كما تريدها هي وحدها 🎬 بحثت العالم عن امثالك 🔭 لم أجد... فأنتي مميزة...
