خزرت خزرت حتى خيرت غرفة
نسيي زهري و خلاص
رحت و حطيت يدي عالباس
و جيت ندخل ...حتى
وائل : واش راكي ديري *بحدة*
يارببيييي خلعني قريب حبس قلبي
درت بزربة خزرت فيه
حتى نشوفو بدا يقرب ليا ...و انا نبعد
حتى وصلت للحيط
كان يخزر فيا بطريقة تخوف بزاف
موالف يخزر فيا بالشر بصح كيما هاد الخزرة
انا سكت محبيتش نهدر ...صراحة خفت منكدبش ...حتى
وائل : وش كنتي ديري دك
لينة : داخلة لبيتك باش نقراو
بدا يضحك بسخرية بصح فجأة رد الوجه السيريو
وائل : و هاديك بيتي *بصراخ*
عيط بأقوى معندو و قرب كثر ليا ...
انا لتم زبل طلعلي جني و جن واحد يعيط عليا
لينة : اااااي كالمي روحك !!! مام انا منيش مشتاقة ندخل لأي بيت و من دارك اوك !!! انا لمهبولة لي جيت اصلا لهنا
بلا اي تفكير بعدتو من طريقي و جيت رايحة
حتى نحس حد شدني من يدي ....حبست و درت خزرت فيه
لينة : اطلقني !!!!
وائل : متدخليش قاع لتم ...متقربيش من هاديك البيت
لينة : مام انا منيش ميتة باش ندخل ليها اوك !! و باش يكون فعلمك عندي عقل و نفهمك كون تقولهالي نورمال...اوه سمحلي ! نسيت بلي نتا تحب دير دراما و تزيد عليها
قاعدة نهدر بدون توقف راني نغلي و هو يخزر فيا مخلوع
لينة : اطلقني نروح !!!
نحيت يدي من يدو بعنف و كملت طريقي .....
بصح العنيد الكلب جا في طريقي و قاطعني
وائل : حبيت نطلب منك حاجة
جابهالي بلعقل و ببرائة تقوشي مش هداك لي كان كي لوحش دك
عندو انفصام شخصية سور ....
معليش لينة كالمي روحك كاااالمي
لينة : وش تسحق !
انا برك قلت هكاك قرب لعندي و شدلي يدي انا مالشوك مقدرت ندير والو
وائل : بون عبالي بلي غلطت معاك بزاف ...و دك عرفت الغلطة تاعي ...نتمنى تسامحيني ...و رح نكون ممتن ادا ولينا اصدقاء و مرحش ننسا خيرك كون تعاونيني فالقراية. ....لازم نجيب مليح ...لازم نبين لبابا بلي انا مشي شخص سيء ...عالاقل نحسن علاقتي معاه ...
قالها بطريقة بزاااااف بريئة و صادقة كي كان يهدر كانو عينيه يلمعو ....و معمرين بدموع
صراحة انا ملقيتش وش نهدر و تخلعت ديك الدقيقة...
وش راه صاري ...وشبيه يهدر هكا ..
قاعدة غير نخزر فيه مخلوعة منو
حتى نشوفو بعد مطريقي
وائل : ما راح نجبرك علي شي ...تحبي قعدي و عاونيني اوك..و ادا حبيتي تروحي انتي حرة ...و حتي وش كاين فلعقد منطبقوش ...عالاقل حاولت
انا تبلوكيت فديك الدقيقة و تخلطولي قاع الافكار و المشاعر....ملقيتش وش ندير
باش نكون صريحة...كان يبان بزززااف صادق في كلامو ...و كي جبد باباه صوتو كان يرعش ...كأنو مش وائل تماما ...كأنو شخص آخر ..حسيت انو هادي هي حقيقتو و الشي لي يبينو قدام الناس تمثيل برك ....
ملقيتش وش ندير...صراحة غاضني ...
مفقتش قاااع كيفاش ....
حتى صبت روحي درت للاتجاه المعاكس
لينة :وريلي بيتك اجري عندنا بزاف عفايس نديروهم ليوم ....
انا برك قلت هكاك
وائل : اوووووه لينة كنت عبالي بلي قلبك طيب ميرسي ميرسي
كان يهدر بفرح كبيييير و جا قدامي و كانت الابتسامة واصلة لوذنيه
وائل : نوعدك بلي منخيبش ضنك ....
انا خزرت فيه و أومأتلو ....
علاش راني ندير هكا ؟؟...علاش سامحتو بلخف و رجعت نقريه ....لينة ارجعي لعقلك ...كيفاش وائل يرجع هكا في غضون ثانية
مشي نورمال ....
بصح ...
بلاك راهو صادق ...بلاك صح حاب يقرا و ندم علي كلش
هديك الدقيقة جاتني في راسي ...اللحظة نهار السي هارون ضربو بكف و بدا يعيط عليه
باينة بلي علاقتو متوترة معاه ...و مشي غير هادي لي تبين كاين بزاف اوقات يبينو بلي علاقتهم مشي مليحة
انا راح نبذل مجهودي باش نقريه و فنفس لوقت ملازمش نامنو كليا ...مزال كاين احتمال الكذب ...
و انا نخمم هكاك حتي وصلنا لبيتو ..خزر فيا و تبسم
وائل : تفضلي
دخلنا و رحنا شدينا بلاصتنا
بلا ما كثرت هدرة بديت نقري فيه و صبتو حاول فالتمارين ...صح مدارش كلش صحيح بصح تطور ملحوظ بديت نقري فيه و هو كان يتبع خير ملبارح....
*بعد مرور ساعتين*
جازو ساعتين يعني خلاصت الحصة لليوم...صراحة وائل كان هايل و بدا يتطور
وائل : اااوه اخيرا عييت ههههه
لينة : هه مزال لخير للقدام غير وجد روحك
وائل : راني واجد متخافيش
لينة : جيد ...المهم هادو تكارينات تع اليوم هاك حلهم و غدوة ان شاء الله نصحوهم
وائل : حاضر
لينة : لوقت باش نروح ...ايا باي
تبسم معايا و انا نضت رفدت كرطابي و جيت رايحة...
وائل : نعيط لكاش وحدة توريلك الطريق؟؟
لينة : منقولش لالا
تبسم و ناض ...عيط لوحدة باينة خدامة عندهم من لبستها
انا برك شفتها تفكرت الماكلة تع لبارح
جيت رايحة حبست
لينة : حقا ...نتا لي بعتت الماكلة تع لبارح
وائل : اوووه كيفاش فقتي ههههههه
لينة : ههه العساس قالي
وائل : عجباتك ياخ؟!؟
لينة : ايه...ميرسي
وائل : بلا مزية هههه
تبسمت معاه بسيف مزالها لحالة بيزاغ السيد من نهار عرفتو و حنا نضاربو ...
المهم رحت مع هاديك المرأة ...تبان فأواخر الثلاثينات
حتى بعدنا من غرفة وائل
مريم : هاي انا مريم هههه
لينة : اوه ..هاي مريم انا لينة
مريم : هههه ربي معاك
لينة : ههه علاش
مريم : ياختي راكي جوزي كل يوم مع السيد الصغير
لينة : هههه علاش وش فيها
خزرت فيها باستغراب
مريم : نخاف نهدر هنا ...هايا نخرجو للحديقة و نقصرو
انا مفهمت فيها حبة بصح
لينة : اوك
رحنا للحديقة
مريم : باش نكون صريحة مقبيل شفت وش صرالك معاه كي جيتي تدخلي لهاديك الغرفة
لينة : والله مفهمتش علاش دار هكاك
مريم : دك انا نفهمك...هاديك الغرفة هي غرفة اخت السي وائل الصغيرة... بما انو وائل الاكبر صافيك من صغرو والف وحدو و كلشي ليه حتى نهار كان غي عمرو 12 سنة ...امو حملت و جابت طفلة ...السي هارون و مرتو قررو ميقولوش لوسائل العلام عليها حتي تكبر احتراما لخصوصية العايلة...و ففترة حمل ام وائل كانت فبلاد اخرى ...المهم ماشي هدا المهم...كي زادت الطفلة و على عكس ما كنا متوقعين وائل فرح بزاف و مغارش منها قاع ...بلعكس ولا يجبها لانو من صغرو مسكين و هو وحيد والديه دايمن مسافرين عمرو ما تلقى لحنان و تربى علي يد الخدامات صافيك كي جات هتو لقا معامن يلعب ...حتى جا النهار لي وائل انسيستا عالخدامات باش يخلوه يخرج ختو للحديقة ...ختو كان في عمرها 3 سنين
كانت تقدر تمشي بيان سور ...المهم انسيستا عليهم و السي وائل عنيد بزاااف ...صافيك خلاواه ...راح خرج يلعب معاها حتي لتم صرات الفاجعة.....راحو ...صابوها فالبيسين تغرق ...و وائل واقف بدون اي حركة...كانت هادي اكبر فاجعة لي بدلت قاع احوال العائلة هادي و بدلت السي وائل....للاسف الاخت الصغيرة ماتت ...السي هارون و مرتو قريب هبلو ...و ملتم و هو شاحن على وائل قالو نتا لي قتلتها بلعاني لانك غرت منها ...لعبو بعقل السي هارون العائلة تاعهم لي فلخارج ...برك باش ينحو وائل من منصب الوريث ...و السي هارون من حزنو علي بنتو امنهم ..و ملتم و هو كاره وائل .. و اي عفسة يديرها وائل السي هارون يعمل منها الف قصة ...كان رح يتحقق هدف عائلتو لي فلخارج لكن دخلت امو و سلكت الوضع ...عرفت كيفاش تسايس راجلها و تبدلو وش كاين في عقلو ... لكن كره اسي هارون لوائل مقلش مزال داير في راسو بلي هو سبب موت بنتو ...هاديك للغرفة لي جربتي تدخليها خي غرفت الاخت الصغيرة....و من نهار ماتت واخد مادخل ليها من غير وحد الخدامة عينتها ام وائل تدخا تنظفها خطرة فالشهر و تبقا مغلوقة .. من يوم الحادثة هاديك ...حتى السي وائل و تبدل رجع بدون قلب و رجع سيء بزااف هاد الشي خلا السي هارون يزيد يشحن عليه كثر...و كما راكي تشوفي لحد الآن مزالها العلاقة هكاك.... و عبالي بلي سكعتي بأمر خطبتو مع نهاد ....هاد الشي سيفو عليه باباه بسبب صفقة عمل قالو مفدت فوالو عالاقل فيد الشركة...
هي تهدر و انا مشوكية
كل كلمة تقولها تزيد تخلعني كثر ...ياربي هذا قاع صرالو.....
قلبي تقسم مالقصة هادي ...صحيح انو حياتي مش اسوء من هك
بصح انا نفهم معنى انو ابوك يكرهك و ميحملكش
عبالي بلي هدا اصعب شي قادر يحس بين الانسان
يحس روحو منبوذ من شخص من لحمو و دمو
يحس روحو عبيء على الشخص لي نورمالمون يكون سندو فلحياة
كأنو ابوك ميت بصح مزالو عابش
بزاف واعرة لحالة...
زيد الم تع فقدان ختو لي علي حساب هدرتها كان يحبها بزاف
الهدرة و الحكاية لي قالتهوملي
خلاوني نزيد نصدق وائل كثر...و نتفهم حالتو و تصرفاتو
لينة : بعدما حكيتيلي الحكاية...تفهمت تصرفات وائل ...و رح نبذل جهدي باش يطلع فالقراية و يعاود يرد علاقتو مليحة مع باباه
مريم : والله نتمنى هاد الشي من قلبي ...و ربي معاك هههه عبالي بلي يهبل و تصرفاتو تقلق مي راكي عرفتي السبب دك
لينة : وي ههه دك نقدر نصبر عليه
كملت هدرت شوية مع مريم و جيت راجعة للدار
طريق كامل و انا نخمم فهاد الشي ...
معباليش علاه بصح هدا وائل ولا يبانلي كأنو لغز ...
و لازم نعرف الحل تع هاد اللغز
صحيح انا و هو مختلفين تماما من ناحية المستوى المعيشي ...بصح عندنا نفس الألم ...و نقدرو نفهمو بعضنا ...لانو كما قتلكم شيء صعيب جدا
تغيضني عمري مين نشوف
اطفال يعاملو والديهم كي الزبل حشاكم جوست لأنو عيطو عليهم ولا ...
انا نموت باش نسمع صوت ماما تعيط عليا لمصلحتي ...
نموت و نسمع ماما توبخني باش تردني للطريق الصحيح
لكن وش ديرو.. هادي هي الحياة
كاين ناس لي يتمناو نعمة الوالدين
و كاين ناس عندهم و مش حامدين ربي ...
راني نخمم هكا حتي وصلت للاقامة
رحت ديرلكت رقدت لانو خمت بزاف راسي وجعني ....
*بعد مرور......*
STOOOOOP
هاي لقد عدت
ان شاء الله تكونو قاع ملاح هههه واش راه غالبكم ولا غالبينو
ان شاء الله يعجبكم البارت ههه و مزال بزاف احداث مفاجئة رام جايين
صحا فطوركم💗
و نلتقي في البارت القادك💗
أنت تقرأ
🎹مَا بَيْنَ الأَسْوَدِ وَ الَأبْيَضِ 🎹 ( باللهجة الجزائرية🎶)
Romanceتعزف علي البيانو 🎹 كأنها ترسم أجمل اللوحات 🎨 تتناغم الأحلام مع الكلمات بين أطراف أناملها التي تمررها برقي غير معهود👑 علي أصابع البيانو🎹 وكأنها تكتب أول سطور لحكاية الزمان كما تريدها هي وحدها 🎬 بحثت العالم عن امثالك 🔭 لم أجد... فأنتي مميزة...
