တော်ဝင်ချစ်သက်သေ [JIKOOK]

19

Unicode

စာအုပ်ဖတ်နေရင်းက
အခန်းတံခါးတွန်းဖွင့်လိုက်သံနဲ့အတူ အတွင်းသို့ ဝင်လာသည့်သူအား လှမ်းကြည့်လိုက်သည် ။
Seokjin Hyung က သွားစရာကိစ္စရှိသည်ဟု ဆိုကာ ခွင့်တိုင်ထားသဖြင့် ဒီနေ့ အဆောင်မှာ မရှိချေ။တံခါးဝနားမှာ မှောင်နေပေမယ့်
အရိပ်ကြည့်တာနဲ့တင် မည်သူဆိုတာကို သိနေရသည်။

"Taehyung .. ဘယ်သွားပြီး ပြန်လာတာလဲ ?"

"Hoseokie Hyung "

အနည်းငယ်ဖျော့တော့နေသည့် လေသံနဲ့အတူ
သူ့နံဘေးနားမှာ ထိုင်ချလိုက်သည့် Taehyung ရဲ့ မျက်နှာအား Hoseok ကြည့်နေမိသည်။

"ထုံးစံအတိုင်း ကျောင်းပြင်ခိုးထွက်ခဲ့တာ"

ခါတိုင်း တောက်ပနေသည့် မျက်ဝန်းတွေက
သိသိသာသာ .. မှိန်ဖျဖျဖြစ်နေသည်ကို အခန်းမီးရောင်အောက်တွင် မြင်ရသည် ။

သက်မတစ်ချက်ချကာ ဘာမှမဟုတ်သလို
ခေါင်းတစ်ချက်ခါလိုက်၍ Hoseok ထံကို လှမ်းကြည့်ခဲ့သည့် Taehyung ရဲ့ မျက်ဝန်းတွေက ရုတ်ချည်းလင်းလက်လာကာ ဟန်ဆောင်၍ ပြုံးလိုက်တာကိုလည်း တွေ့ရသည်။

သူတို့ နှစ်အတန်ငယ်ကြာ သိခဲ့ကြသည်မှာ အလကားမဟုတ် .. Taehyung တစ်ခုခု ဖြစ်နေတာကို ... သူ အတပ်သိသည် ။
မေးချင်မိတာတွေ များပေမယ့် Taehyung
မဖြေမှာကို သူ သိသည် ။

"အရက်ရော သောက်လာတယ်မလား? "

"အင်း .. နည်းနည်း "

"ဘာဖြစ်လို့လဲ !? "

ခပ်တိုးတိုး သူ့အမေးစကားကြောင့် Taehyung ရဲ့ မျက်ဝန်းတွေက အနည်းငယ် ပြူးကျယ်သွားသည် ။

"ဘာကို ဘာဖြစ်ရမှာလဲ ..
Hoseokie Hyung ရဲ့"

"မလိမ်ပါနဲ့ကွာ ..ခုတလော တစ်ခုခုတော့ ဖြစ်နေတယ်မလား !! ဘာကိစ္စမို့လို့လဲ"

ထိုသို့ပြောလိုက်တော့ Taehyung မျက်နှာမှာ
အပြုံးတို့ ဖြစ်ထွန်းလာပြန်သည်။ ပြီးတော့ သူ့အနား တိုးကပ်လာကာ လက်မောင်းကို တွဲကိုင်၍ ပုခုံးပေါ် မှီချလိုက်သည် ။
အရက်နံ့စွက်သော ကိုယ်သင်းရနံ့က Hoseok
နှာခေါင်းထဲ ဝင်လာသည်။

"ငါတို့ အစ်ကိုကိုတော့ လိမ်လို့ မရဘူးပဲ !!
ဟီးဟီး "

ပျော်ရွှင်စွာ ကလေးတစ်ယောက်လို တဟိဟိ
ရယ်မောနေသည့် Taehyung ကို သူ
တစ်ချက် လှမ်းကြည့်ကာ အရှေ့စားပွဲပေါ်မှ
ဖယောင်းတိုင်မီးအား ငေးလိုက်သည်။